A GUARDA

ANABAM: REXISTRAMOS UNHA NOVA ESPECIE PARA O BAIXO MIÑO

Asociación Naturalista "Baixo Miño" / A Guarda

 Trátase da "Argiope trifasciata", unha araña da que non tiñamos información da súa presenza nesta bisbarra. O achado produciuse onte nos viveiros Toxal, onde traballa Miguel Fernández Lomba, quen nos enviou un par de fotos da mencionada araña, preguntándonos cal era o seu nome, sendo identificada por Agustín Ferreira, presidente desta asociación. Deste xeito, das catro especies de "Argiope" presentes na Península Ibérica, temos dúas no Baixo Miño, a máis común de todas a Araña avespa ou araña tigre (Argiope bruenniche) á que se suma estoutra. Non podemos descartar, por outra banda, dado que apareceu nun viveiro, que a súa presenza poida deberse a unha introdución accidental a través dos produtos comercializados no mencionado viveiro.       

 Noso agradecemento a Miguel Fernández Lomba por facernos chegar as fotografías e pórse en contacto con nós, o que nos permitiu rexistrar este interesante dato. 

A GUARDA

A REPÚBLICA DOS SONHOS

Música e irmandade na 2ª Gala da Lusofonía 

▪Este  sábado, 23 de novembro, no Centro Cultural de A Guarda 

  

Infogauda / A Guarda

 O Centro Cultural acollerá este sábado 23 de novembro, ás 21:00 horas a 2ª Gala da Lusofonía, onde se celebrará a riqueza da lusofonía en colaboración co  Instituto Galego de Análise e Documentación Internacional (IGADI) e a Deputación de Pontevedra.  

 A gala, titulada “A República dos Sonhos” e presentada pola xornalista Esther Estévez, promete unha experiencia única de irmandade cultural entre Galicia e o universo lusófono, que inclúe a música, entrevistas e conexións internacionais, nunha noite inspirada pola obra da escritora brasileira Nélida Piñón.  

 No marco do proxecto “Tecer pontes co mundo, construír pontes coa lusofonía”, a gala servirá para explorar a fondo os soños, lendas e historias que unen Galicia e o mundo lusófono, abordando temas como a emigración, a cultura e o comercio. O evento será retransmitido en directo pola IGADI TV, a través do seu canal de YouTube, xa que se espera unha participación ampla e aberta.  

 As persoas interesadas en acudir de xeito presencial poden apuntarse cumplimentando o correspondente formulario.  De non encherse a cabida do salón de actos, abrirase ao público sen necesidade de inscribirse.

A GUARDA

A Agrupación Musical de A Guarda vai ofrecer un concerto en honra a Santa Cecilia 

▪ Este sábado 23 de novembro, ás 17:00 horas na igrexa parroquial de Santa María

Infogauda / A Guarda 

 A Agrupación Musical de A Guarda co seu Grupo de Iniciación e a banda de música vai ofrecer un concerto para conmemorar a festividade de Santa Cecilia, patroa dos músicos e dos poetas. 

 O concerto - organizado pola Agrupación Musical de A Guarda, coa colaboración do Concello guardés e a igrexa parroquial - celebrarase este sábado, 23 de novembro, ás 17:00 horas na igrexa parroquial de Santa maría de A Guarda.

O ROSAL

O humor como arma contra o tabú con ‘DeseXo’, de Talía Teatro  

• O auditorio municipal acollerá este domingo 24 de novembro, ás 19.00 horas, esta reflexión cómica sobre a sexualidade, ao abeiro da programación posta en marcha polo Concello con motivo do 25N   

Coa dirección de Diego Rey e as interpretacións de Marta Ríos e Dani Trillo, ‘DeseXo’ utiliza o humor como vehículo para abordar cuestións como a ausencia dunha educación sexual axeitada

Foto: C.O.R.

Infogauda / O Rosal 

 O auditorio municipal do Rosal converterase nun escenario para reflexionar, rir e aprender. No marco da programación do 25N, Día Internacional para a Eliminación da Violencia contra as Mulleres, o Concello aposta polo teatro como ferramenta para o cambio social coa obra ‘DeseXo’, un espectáculo co que Talía Teatro chegará este domingo 24 de novembro, ás 19.00 horas, ao Rosal para falar claramente de sexo.  

 Unha obra que supón unha chamada de atención sobre as consecuencias dunha educación sexual deficiente, baseada máis na pornografía tanto real como social, que na formación e no diálogo aberto. Como sinala a concelleira de Igualdade, Beatriz Rodríguez, “queremos ofrecer á veciñanza unha experiencia que, ademais de entreter, nos faga reflexionar sobre o mundo no que vivimos e que estamos transmitindo ás novas xeracións”.  

 Coa dirección de Diego Rey e as interpretacións de Marta Ríos e Dani Trillo, ‘DeseXo’ utiliza o humor como vehículo para abordar cuestións como a ausencia dunha educación sexual axeitada, a súa substitución polo aprendido na pornografía ou nas redes sociais, os estereotipos sexistas ou a presión social nas relacións afectivo-sexuais. Unha peza creada co asesoramento da sexóloga Bárbara Penas, achegando rigor e frescura a unha obra que promete deixar pegada.  

 O espectáculo preséntase como un xoguete cómico no que o público seguirá ás personaxes a través das súas publicacións nas redes sociais, observando como afrontan os seus medos, desexos e relacións nunha sociedade que é a vez á máis sexualizada da historia e a máis tabú. “O 25N non se trata só de denunciar a violencia machista, senón tamén de previr as súas raíces, moitas veces alimentadas pola desinformación, os estereotipos e a falta de diálogo”, recalca a concelleira.  

 ‘DeseXo’ terá entrada de balde ata completar a cabida. Dende o Concello anímase a toda a veciñanza a participar nesta actividade, que forma parte da ampla programación posta en marcha durante o mes de novembro para continuar revolucionando mentes, concienciando e educando en igualdade.

ENOLOXÍA

Adega Pateira leva a súa tradición e historia vitivinícola á Feira Castes 

• Do 22 ao 25 de novembro, na Praza de Abastos de Vilagarcía de Arousa

Benito Álvarez Gándara / Redacción / O Rosal

 Este domingo 24 de novembro, a adega Adega Pateira, do Rosal, participará na xornada central da Feira Independente do Viño Castes, un evento que se celebra na Praza de Abastos de Vilagarcía de Arousa do 22 ao 25 de novembro. Esta feira consolidouse como un punto de encontro para profesionais do sector e afeccionados ao viño, cun programa repleto de actividades para destacar a riqueza e a innovación na cultura vitivinícola. 

 Adega Pateira, coñecida polo seu compromiso coa elaboración de viños de autor con identidade propia, presentará durante esta xornada as súas catro referencias máis destacadas: 

• Viño Rosal Pateira, expresión fiel da terra do Rosal. 

• Loureira Buraca, unha homenaxe ás variedades autóctonas galegas. 

• Albariño Pampaloa, fresco e elegante. 

• Pampaloa Tradición, un Albariño envellecido en barrica de carballo francés. 

 A adega, con raíces familiares, leva desde 1990 recuperando viñedos históricos da rexión. En 2016, o seu proxecto culminou coa creación dunha pequena adega que non só produce viños excepcionais, senón que tamén traballa por revitalizar as terras vitivinícolas do Rosal. "Cada botella reflicte o noso respecto pola tradición e o noso compromiso co futuro", destacan desde a adega. 

Un espazo para amantes do viño e profesionais 

 A Feira Castes non é só un escaparate para descubrir novos viños, senón tamén unha oportunidade para conectar con proxectos innovadores como o de Adega Pateira. As actividades programadas inclúen catas, talleres e charlas en torno ao viño, todas deseñadas para resaltar a arte e a dedicación detrás de cada etiqueta. 

 Desde o Concello de Vilagarcía, destácase a importancia deste evento como un impulsor do enoturismo e unha plataforma para pequenas e medianas adegas que desexan mostrar o seu traballo ao público xeral e ao sector profesional. 

Un domingo para degustar tradición e innovación 

 O domingo 24 será unha xornada crave para Adega Pateira, que convida a todos os asistentes a descubrir os seus viños e mergullarse na riqueza vitivinícola do Rosal. "Queremos compartir co público a nosa historia, os nosos valores e, por suposto, a alma dos nosos viños", sinalan os responsables da adega. 

 A Feira Castes está aberta ao público desde o venres 22 ata o luns 25 de novembro, e ofrece unha experiencia única para amantes do viño e profesionais do sector.

O ROSAL

As novas xeracións toman a palabra no pleno infantil do Rosal  

▪ Concello e alumnado do CPI Manuel Suárez Marquier celebraron un encontro no que fixeron propostas para unha participación activa e efectiva de infancia e mocidade na toma de decisións municipais  

 

A alcaldesa, Ánxela Fernández Callís, e a concelleira de Igualdade e Voluntariado, Beatriz Rodríguez, na celebración dun novo pleno infantil no auditorio municipal do Rosal

Foto: C.O.R.

Infogauda / O Rosal  

 As nenas, nenos e adolescentes rosaleiros tomaron este mércores a palabra na celebración dun novo pleno infantil no Rosal, unha iniciativa que reafirma o compromiso do Concello coa participación activa da infancia e mocidade na toma de decisións do futuro municipal.  

 No marco do Día Mundial da Infancia, o auditorio municipal encheuse de ideas, ilusións e propostas formuladas polo alumnado do CPI Manuel Suárez Marquier, que estivo acompañado na sesión plenaria pola alcaldesa, Ánxela Fernández Callís, e a concelleira de Igualdade e Voluntariado, Beatriz Rodríguez.  

 O acto contou coa participación de estudantes de 4º, 5º e 6º de primaria e de 1º, 3º e 4º da ESO, que presentaron ante o Goberno municipal e os seus compañeiros e compañeiras diferentes propostas para mellorar o dereito á participación infantil e xuvenil no ámbito local. As intervencións, perfiladas con gran creatividade e sentido crítico, puxeron de manifesto a importancia de escoitar e integrar as ideas das novas xeracións nas políticas municipais.  

 Durante o encontro, a alcaldesa agradeceu ao CPI Manuel Suárez Marquier e ao alumnado a súa implicación para continuar “dando voz á rapazada, clave para un futuro máis igualitario, participativo e respectuoso coas necesidades de todos e todas. Dende o Concello estamos traballando para formar parte da rede de Cidades Amigas da Infancia porque cremos firmemente en que a sociedade debe construírse contando cos nosos nenos, nenas, mozos e mozas”.  

 “Cómpre escoitarvos, intentar comprender e recoñecervos a vosa capacidade de observar a realidade, de interpretala e de representar os intereses dos outros. Coa vosa ollada poderemos repensar e seguir a construír un modelo de vila mellor, un Rosal fermoso, inclusivo, sostible, igualitario e dinámico, o mellor lugar para poder xogar, compartir e vivir”, recalcou a rexedora.  

 Neste pleno infantil tamén se puxo en valor a experiencia da rapazada rosaleira na súa participación no Foro de XII Foro Infantil de Unicef no Parlamento de Galicia, no que defenderon o papel fundamental que ten unha participación da infancia e da mocidade activa, real, efectiva e segura na toma de decisións municipais. Ademais, abordouse a posibilidade de participar no encontro estatal do grupo de participación infantil e xuvenil do Rosal, ‘Fogaricos’, un nome escollido polo seu gran significado en cabaqueiro: traballar con paciencia e dedicación.  

 A concelleira de Voluntariado aproveitou para animar ao alumnado a sumarse a ‘Fogaricos’, “un espazo para dar forma ás ideas da rapazada, fomentar o debate e fortalecer o papel das novas xeracións no presente e no futuro do Rosal”.  

 Este pleno infantil supón un paso máis na aposta do Concello por unha participación cidadá inclusiva e transformadora, reafirmando o seu compromiso coas xeracións máis novas. “A sociedade que soñamos só é posible coas voces de todas e todos, incluídas as máis novas, que sempre teñen moito que achegarnos, que ensinarnos e sobre o que falarnos”, concluíu a alcaldesa. 

TOMIÑO

O Concello continúa coa aposta pola mellora da eficiencia enerxética 

•  O pavillón polideportivo de Goián, un dos máis utilizados do municipio, aforrará a partir de agora máis dun 60% de enerxía eléctrica 

Os concelleiros Lois Vázquez e Rubén García Filgueiras, no pavillón polideportivo de Goián, onden veñen de finalizar as obras de eficiencia enerxética levadas a cabo

Foto: C.T.

Infogauda / Tomiño

 As concellerías do Ciclo da Auga e Eficiencia Enerxética e a de Benestar Social e Deportes, dirixidas por Lois Vázquez e Rubén García Filgueiras, respectivamente, veñen de finalizar as obras de eficiencia enerxética levadas a cabo no Pavillón Polideportivo de Goián, con cargo a unha subvención de máis de 12.300 euros procedente do Fondo de Cooperación Local destinada a intervencións de eficiencia enerxética en edificios de titularidade municipal e con poboación inferior aos 15.000 habitantes.  

 A obra consistiu na substitución de todas as luminarias do pavillón goianés, que ata o de agora eran de vapor de mercurio e dunha potencia de 400 W. As novas luminarias,  que pasaron dun total de 30 a 36, incorporan a tecnoloxía LED, conseguindo deste modo unha mellora da eficiencia enerxética de máis dun 60 %, con respecto o gasto anterior.  

 “Con esta intervención logramos renovar o sistema de iluminación dunha instalación utilizada por numerosos colectivos e equipos deportivos durante todo o ano, co que o aforro que teremos a partir de agora será moi importante, ademais de tratarse dunha tecnoloxía moito máis eficiente e sostible”, explicou o concelleiro de Eficiencia Enerxética.  

 Este proxecto, que representa un paso máis na procura da consecución dos Obxectivos De Desenvolvemento Sostible (ODS) e do Pacto das Alcaldías polo Clima e a Enerxía (PACE), súmase a outras actuacións xa feitas e que se farán nun futuro para seguir na liña da mellora e da sostibilidade.  “Esta luminarias proporcionarán unha mellora na visibilidade na comodidade e no desfrute dos usuarios e usuarias do pavillón de Goián, continuando coa folla de ruta seguida por este goberno para a posta a punto de todos os equipamentos deportivos do concello”, comentaba o concelleiro de Deportes. “Paso a paso, seguimos traballando para que todos os veciños e veciñas poidan desfrutar das infraestruturas de Tomiño nas súas mellores condicións”, sinalou García.

TOMIÑO

Teatro, formación, presentación dun libro e curso de autodefensa, actividades para o 25N en Tomiño

▪ A lectura do manifesto será o día 25 ás 12.30 horas no Seixo e estará a cargo de "Sachos Violetas"

Infogauda / Tomiño

   O Concello de Tomiño conmemora o 25N Día Internacional para a Eliminación da Violencia contra as Mulleres con teatro, actividades de formación para o alumnado do IES Antón Alonso Ríos, presentación dun libro e curso de autodefensa para mulleres.  

 O programa arranca o venres 22 de novembro co Curso de Autodefensa para Mulleres, que se desenvolverá até o 27 de decembro. Será na Salgosa de 16.30 a 18.30 horas. As prazas son limitadas polo que é necesario inscribirse previamente.  

 Por outra banda, o alumnado do IES participará dunha actividade formativa denominada “Facendo comandos” con “Sachos Violetas”.

 O sábado 23 de novembro continúa a programación con “No solo duelen los golpes”, un monólogo teatral de Pamela Palenciano. Pamela Palenciano é unha actriz andaluza de teatro e activista feminista coñecida pola obra que trae a Tomiño; un relato autobiográfico sobre a violencia de xénero, a través do humor e a ironía.  Será ás 21.00h no auditorio goianés. Entrada 5 euros. 

 

 O día 25N o Salón de Plenos do Concello acollerá ás 12h a presentación do libro “Sempre libres e vivas” de Uqui Permui. E media hora despois terá lugar na praza do Seixo a lectura do manifesto contra a violencia de xénero, a cargo de “Sachos Violetas”, previa marcha do alumnado do IES ata o Seixo.

COMARCAS

Luis López fai balance dos investimentos da Deputación no sur da provincia: 23 M€ en obras en 15 concellos e un impulso inédito ao deporte, á cultura e aos colectivos 

• O presidente provincial, acompañado pola deputada Nava Castro, iniciou en Ponteareas unha rolda de encontros informativos comarcais para repasar os proxectos e programas postos en marcha pola Deputación ao longo do ano 2024 nas comarcas da provincia

O presidente da Deputación de Pontevedra, Luis López, acompañado pola alcaldesa e deputada, Nava Castro, na rolda de prensa celebrada hoxe en Ponteareas

Foto: Rafa Estévez

Infogauda / Comarcas

 O presidente da Deputación de Pontevedra, Luis López, destaca un investimento de case 23 millóns de euros neste ano 2024 nos concellos do sur da provincia a través de programas como o +Provincia, o Plan Extraordinario de Infraestruturas Deportivas, o PON2030 ou en diversas actuacións do servizo de Infraestruturas. O mandatario provincial iniciou este mércores en Ponteareas, acompañado pola alcaldesa e deputada, Nava Castro, unha rolda de almorzos informativos con medios de comunicación locais para facer balance das iniciativas postas en marcha pola Deputación nas comarcas. "Este encontro é o primeiro da media ducia que temos previsto realizar polas comarcas da provincia de Pontevedra co obxectivo de facer un balance do feito e do que queda por facer, intercambiar impresións e analizar o labor da Deputación nestes quince concellos do sur da provincia", explicou o presidente López.  

 Despois da apertura do encontro por parte da rexedora Nava Castro, tomou a palabra o presidente provincial Luis López, para detallar os grandes proxectos emprendidos na capital do Condado, que teñen na posta en marcha do plan director do Castelo de Sobroso, dotado con 1,5 millóns de euros un dos plans máis sobresaíntes para dinamizar un atractivo que suma xa 2.000 visitas máis ca o ano pasado. Ademais, a Deputación investiu máis de dous millóns de euros a través de diferentes iniciativas do +Provincia, o Plan de Infraestruturas Deportivas ou o PON2030. Así mesmo, Ponteareas converteuse este en punto de saída dunha etapa de La Vuelta, un dos eventos deportivos máis seguidos do mundo; e tamén do Gran Camiño, a máis importante carreira ciclista de Galicia. No eido cultural, celebrouse a primeira edición da residencia artística Artistea e colaborouse na celebración do Rock in Río Tea.  

 Do mesmo xeito, a pegada na Deputación en Ponteareas está tamén nos 177.000 euros investidos para remodelar o campo de fútbol de San Mateo, os máis de 30.000 euros en apoio a clubs deportivos do concello, a cooperación con máis de 53 entidades culturais e 20.000 euros do Cultureae o +Música ou os 60.000 euros en apoio a seis entidades veciñais e 110.000 euros para doce comunidades de auga do +Aqua.  

 "Nava Castro é xestión, ideas, visión, modernidade, solvencia e proxección exterior. É, en definitiva, a mellor aliada de Ponteareas dentro e fóra da Deputación. En quince meses como alcaldesa ten convertido este concello nun referente a moitos niveis", salientou o presidente provincial antes de detallar unha serie de proxectos comúns nos que cooperan a administración provincial e municipal. "Todo isto é obra da Deputación e, por extensión, de alguén que pide tanto como dá: de Nava Castro", subliñou o presidente López.  

Municipalismo nos 15 concellos do sur da provincia  

 A continuación, repasou Luis López os proxectos máis destacados postos en marcha nos restantes concellos do sur da provincia. No caso de Mondariz, sobresae o medio millón de euros destinado a área deportiva da Lagoa e o compromiso adquirido co novo alcalde de executar 2,5 millóns de euros en investimentos estratéxicos como a reforma da estrada entre Sabaxáns e Cernadela, a senda de Fozara ou a reparación da ponte sobre o Tea. En Mondariz-Balneario, destínanse 330.000 euros para o acondicionamento da segunda planta da casa consistorial; nas Neves, medio millón de euros para a praza de Santa María de Liñares ao abeiro do PON2030; e Salvaterra recibe máis de 1,2 millóns de euros do ente provincial para proxectos como a humanización da rúa da Forca.  

 Na comarca do Paradanta, a Deputación está a executar en Arbo a mellora da contorna da Igrexa de San Sebastián por 420.000 euros; na Cañiza, destina 630.000 euros para financiar a totalidade da obra do campo de fútbol de Augas Férreas; en Covelo, financia con 370.000 euros a obra do ximnasio municipal; e en Crecente, inviste 430.000 euros para modernizar o campo de fútbol do Concello.  

 Na comarca do Baixo Miño, A Guarda recibe un apoio de máis dun millón de euros para a actuación no Edificio Sinde; no Rosal, achega 130.000 euros para adecuar o camiño de Marzán; en Tui colabora no 80 % do custo da transformación da zona da Corredoira e tamén na mellora da contorna da praza de abastos; en Tomiño, destina 1,3 millóns de euros para a rehabilitación enerxética da casa da cultura e 460.000 euros para o saneamento de Carregal; e en Oia, 400.000 euros para reformar a praza de abastos. Ademais, en Salceda de Caselas o ente provincial mobiliza 130.000 euros para mellorar as piscinas municipais.  

 Un resumo de obras que recollen tamén outras actuacións en distintos ámbitos da vida social, deportiva e cultural destas comarcas como son a colaboración co festival transfronteirizo Ikfem, o impulso ao patrimonio arqueolóxico a través de Trazas ou as incontables reunións con colectivos e rexedores destes municipios.  

Demandas ao goberno central  

 Con todo, hai proxectos e desafíos que están fóra do marco de competencias da Deputación, pero que cuxa atención é moi necesaria. "O sur da provincia está agardando por actuacións imprescindibles para o noso progreso económico, que dependen da vontade do Goberno de España, e aí si me gustaría que houbera un consenso que superara cores políticas e intereses partidistas", afirmou o presidente López reclamando que se dea prioridade á conexión ferroviaria de alta velocidade entre Vigo e Porto, así como axilizar a saída sur e mellorar a liña do Miño. Do mesmo xeito, reclama bonificacións na AP-9 ou consenso para o estatuto traballador transfronteirizo ou para o dragado do Miño.  

 "A partir do 1 de xaneiro, co novo orzamento, continuaremos desenvolvendo o novo plan de infraestruturas deportivas duplicado, outro +Provincia de récord e o Plan Provincia Extraordinaria. O que significa que teremos un 2025, como mínimo, igual de prometedor que o actual 2024", augurou o presidente da Deputación.

ECONOMÍA

A sanidade privada da provincia de Pontevedra, en loita “por un convenio digno xa” 

• Arredor dun cento de traballadoras/es comezou hoxe un calendario de mobilizacións cunha protesta diante do centro médico Concheiro de Vigo

 

Concentración de persoal da sanidade privada da provincia de Pontevedra, diante do centro médico Concheiro de Vigo

Foto: CIG

Infogauda / Vigo

 O persoal da sanidade privada da provincia de Pontevedra iniciou hoxe a súa loita para reclamar “un convenio colectivo digno xa” cunha concentración diante do centro médico Concheiro de Vigo. A patronal abandonou a última xuntanza da mesa de negociación como medida de presión para intentar que as protestas, que continuarán nas vindeiras semanas, non se fixesen efectivas. 

 As centrais CIG, CCOO, UGT e CSIF convocaron as mobilizacións para reclamar unhas condicións de traballo dignas para as traballadoras/es adscritas/os ao convenio de Hospitalización Privada da provincia de Pontevedra, o único das catro provincias que queda sen renovar. 

 As principais demandas pasan por negociar unhas táboas salariais “acordes coa realidade na que vivimos” e porque se retribúa o traballo en domingos e festivos. Tamén se reclama unha redución da xornada anual, tal e como se recolleu nos convenios asinados no resto de provincias, que incluíron ademais o cobro dos domingos e festivos. 

 Segundo explican dende a CIG-Saúde, na reunión da mesa negociadora constituída en setembro de 2020 que tivo lugar este luns 18 de novembro a parte empresarial ameazou a parte social con levantarse e interromper as conversas se non se desconvocaban as concentracións previstas para as vindeiras semanas demandando un convenio digno.  

 “Hai que lembrarlle á patronal que as mobilizacións foron esixidas polas persoas traballadoras do sector nas asembleas informativas realizadas o pasado 7 de novembro ao coñecer a inmobilidade das propostas achegadas até esa data”. Por iso queren deixar moi claro que a parte social non cederá a esta “chantaxe” e continuará a defender os dereitos das persoas afectadas por este convenio, “polo que manteremos o calendario de protestas establecido”. 

- Mércores 27 de novembro ás 12:00 horas no hospital Vithas Fátima de Vigo (Vía Norte, 48).  

- Mércores 4 de decembro ás 12:00 horas na Confederación de Empresarios de Pontevedra, en Vigo (García Barbón, 104). 

- Mércores 11 de decembro ás 12:00 horas no centro médico Vithas en Pontevedra (Eduardo Pondal, 68).

ECONOMÍA

Alda Hotels abre o seu segundo hotel na cidade de Pontevedra  

▪ Trátase da 22ª apertura da cadea no que vai de ano, co que alcanza xa os 12 establecementos na provincia 

Unha das habitacións dobre do hotel Alda Centro Pontevedra

Raquel Silva / Pontevedra 

 O grupo galego Alda Hotels acaba de inaugurar o hotel Alda Centro Pontevedra, un aloxamento dunha estrela e 26 habitacións que reforza a posición da compañía como unha das cadeas con maior crecemento en España. Situado no centro urbano da cidade, Alda Centro Pontevedra (Rúa Augusto González Besada, 5), anteriormente coñecido como hotel Comercio, é o segundo establecemento da firma en Pontevedra tras a apertura en 2017 de Alda Estación Pontevedra, e convértese ademais no duodécimo aloxamento da cadea na provincia. 

 O novo hotel que se une ao portfolio da compañía destaca pola súa localización estratéxica, a dous minutos camiñando do Concello e da zona vella, e a menos de 300 metros dos principais monumentos, e polo seu fácil acceso aos principais atractivos turísticos da zona, tanto ás praias como a outras localidades como Vigo, Sanxenxo ou Santiago de Compostela. 

 O 2024 foi un ano crave para Alda Hotels, coa apertura de 23 novos establecementos en diferentes comunidades, 14 delas producíronse en Galicia, o que lle permite seguir consolidando o seu liderado na rexión. A cadea sumou tamén 4 aloxamentos en Castela-A Mancha, ampliando a súa presenza no centro de España, 2 en Castela e León, e un en cada unha das comunidades de Cantabria, Aragón e Navarra. Con estas incorporacións, Alda Hotels alcanza unha rede de 95 aloxamentos, dos cales 87 xa están en funcionamento. 

2025: un enfoque na mellora tecnolóxica 

 Tras un período de crecemento acelerado, Alda Hotels pon o foco na mellora continua como eixo da súa estratexia para 2025. A compañía apostará pola implementación de solucións tecnolóxicas avanzadas que permitan automatizar tarefas repetitivas e mellorar a eficiencia operativa nos seus aloxamentos, á vez que optimiza a experiencia dos clientes. 

 Alda Hotels é unha cadea galega que se consolidou como unha das marcas de referencia no sector hostaleiro en España. Cunha oferta variada e aloxamentos estratexicamente situados, a compañía combina calidade, accesibilidade e compromiso co desenvolvemento local en cada unha das súas aperturas. 

VIGO

Vitrasa desaproveita a oportunidade de chegar a acordos e condena a cidade a sufrir novas mobilizacións   

Comité de empresa de VITRASA / Vigo

 Tras dúas xornadas de mediación nas que a dirección de Vitrasa non foi capaz de realizar unha oferta que permitise desbloquear a negociación, as mobilizacións reactivásense no día de hoxe en forma de paros parciais. Durante o primeiro día de reunión a concesionaria non presentou nada novo a pesar de solicitar eles a mediación, aludindo novamente ás perdidas de viaxeiros/as e a que o reequilibrio recibido por parte do Concello de Vigo de máis de 18 millóns de euros non lle permite cubrir as perdas derivadas da pandemia. 

 Na segunda xornada a postura empresarial cambiou un pouco, expondo un aumento da proposta rexeitada fai máis dun mes por parte do comité: do 0,5% no ano 2025 a cambio de eliminar a prima de absentismo (sobre 350 euros por traballador). Á parte deste mínimo incremento por parte da concesionaria, as tan necesarias melloras sociais que reivindican as persoas traballadoras non foron atendidas, pretendendo que o persoal estea dispoñible as 24 horas e un mínimo descanso na xornada de tan só 5 minutos cada 3 horas de condución, factores que empeoran notablemente as actuais condicións do persoal de condución e que influirían negativamente na seguridade dos viaxeiros/as. 

 Nun último intento de desbloquear o conflito, o comité de empresa acabou solicitando un incremento do 0,9% sobre a oferta realizada pola empresa para este ano 2024, que foi negado pola dirección e que puxo punto final a esta mediación. Este mínimo incremento solicitado polo Comité suporía arredor de 135.000 euros de desembolso, cando a última achega do Concello de Vigo é de 12 millóns de euros. 

 No comité estamos moi defraudados/as pola postura da dirección de Vitrasa, xa que a día de hoxe ademais de estar a perder mais dun 14% de poder adquisitivo e de deixarlle claro á empresa que renunciabamos a recuperar os salarios perdidos, o que supón un aforro de máis de 3,5 millóns de euros para Vitrasa polos anos 2021 a 2023, néganse a pechar un acordo por unha cantidade tan ínfima como 135.000 euros despois de recibir millóns. Quédanos claro que Vitrasa non pretendeu nunca solucionar este conflito. 

 Facemos un chamamento ao Concello de Vigo para a NON RENOVACIÓN DA CONCESIÓN a unha empresa que o único que quere é recortar un servizo esencial como é o transporte nunha cidade e engordar o seu peto a conta do diñeiro público e de empobrecer as persoas traballadoras.  

 Doutra banda, denunciamos que unha vez máis o Concello impón uns servizos mínimos abusivos e que volven deixar os arrabaldes da cidade -zona que máis necesita deste servizo esencial- desatendido. Finalmente, seguimos agardando unha resposta ás solicitudes de reunión realizadas por este comité ao alcalde.

ECONOMÍA

Un 90% do persoal de ZF Lifetec secunda a folga contra o despido de tres compañeiros 

•  Arredor de 300 persoas participaron na manifestación convocada pola maioría do comité da compañía de automoción con sede en Vigo

Coincidindo co paro arredor de 300 persoas percorreron en manifestación o polígono vigués do Caramuxo

Foto: CIG

Infogauda / Vigo 

 A maioría do comité de empresa de ZF Lifetec España (antiga Dalphimetal) cualificou de “éxito rotundo” a xornada de folga convocada hoxe para rexeitar o despido de tres traballadores. Coincidindo co paro arredor de 300 persoas percorreron en manifestación o polígono vigués do Caramuxo, facendo paradas nos dous centros de traballo da empresa do sector da automoción para reclamar a readmisión dos despedidos. 

 A convocatoria -da que unicamente se desmarcou CCOO- foi lanzada pola maioría da representación sindical tras o despido obxectivo de tres traballadores con varias décadas de antigüidade na empresa (25, 26 e 38 anos). Dende o comité rexeitan que as rescisións de contrato estean xustificadas, tal e como sostén a dirección, e lembran que dous dos afectados estiveron de baixa recentemente por doenzas derivadas de riscos psicosociais. 

 Por iso consideran que as causas económicas, organizativas e da produción esgrimidas por Dalphimetal para xustificar a decisión “son unha escusa para aforrar custes desfacéndose do persoal con máis antigüidade”.  

 Durante a xornada o persoal desenvolveu concentracións diante das instalacións da compañía ao inicio da quenda de noite (22:00) e da de mañá (5:00). Posteriormente unhas 300 persoas participaron na manifestación que percorreu o polígono industrial a partir das 12:30 horas e que foi facendo paradas ás portas dos dous centros de traballo da empresa ao berro de “Despedidos readmisión” e “Non ao despidos en Dalphimetal”. 

 Ao remate da marcha tomaron a palabra os representantes das tres organizacións sindicais convocantes, a CIG, UGT e CUT. Por parte da CIG falou o presidente do comité de empresa, Eduardo Ruanova, que lamentou a decisión da empresa e cualificou a xornada de “histórica” xa que “é a primeira vez que se lle dá unha resposta tan contundente á dirección”.  

 Ruanova agradeceu tamén a solidariedade amosada polo cadro de persoal e por outros/as delegados/as do sector da automoción que participaron na protesta. Finalmente, censurou a actitude dos representantes de CCOO por non ter convocada a folga nin as mobilizacións.

ECONOMÍA

Unha xornada de folga na empresa F. Segura Vigo polo despido de dous candidatos da CIG 

• A central convoca un paro de 24 horas e mobilizacións o vindeiro martes día 26 de novembro

Foto: CIG

Infogauda / Vigo 

 A CIG vén de anunciar a convocatoria dunha xornada de folga na empresa F. Segura Vigo para o vindeiro martes 26 de novembro tras o despido de dous candidatos da central ás eleccións sindicais. Ademais do paro de 24 horas haberá concentracións diante dos dous centros de traballo que esta compañía do sector da automoción ten en Gondomar e no Porriño. 

 Tal e como explican dende a CIG-Industria de Vigo, a dirección de F. Segura (que mercou parte da antiga Plastic Omnium) decidiu rescindirlle o contrato a dous traballadores nada máis coñecer que integraban a candidatura da central ao colexio de persoal técnico e administrativo.  

 A compañía alega que se trata de despidos obxectivos por causas organizativas e da produción, “pero o verdadeiro motivo - segundo a CIG-Industria de Vigo - é en clara represalia polo feito de que estas dúas persoas ían concorrer como candidatos ás eleccións sindicais”.  

 A transnacional francesa Plastic Omnium optou hai aproximadamente ano e medio por venderlle ao grupo valenciano F. Segura os dous centros de traballo cos que contaba na comarca de Vigo, un en Gondomar e outro no Porriño. Recentemente a CIG decidiu promover eleccións para configurar o comité de empresa (para o que se escollerían 6 delegados/as entre o persoal especialista e 3 entre o técnico e administrativo).  

 “Pois ben, o pasado venres día 15 a empresa estivo preguntando entre o cadro de persoal quen se presentaba pola CIG, e dúas persoas que recoñeceron que eran candidatos foron despedidos o mesmo día a última hora da mañá”. Por iso a central, ademais de convocar folga e mobilizacións, demandará xudicialmente a nulidade dos despidos.  

 As protestas terán lugar coincidindo co paro de 24 horas que se desenvolverá entre as 6:30 horas do martes 26 até as 6:30 horas do mércores 27. E terán lugar nas instalacións de F. Segura no polígono da Pasaxe, 26, Vincios (Gondomar) e na Avenida Principal, 247, do Porriño ás 6:30, 14:30 e 22:30 horas “para reclamar a readmisión dos dous compañeiros e para que se garanta que as persoas traballadoras se poidan presentar libremente ás eleccións sindicais”. 

CAMPOSANCOS (A GUARDA)

A COMPAÑÍA HELIOS TEATRO PRESENTA “Y A USTED ¿QUÉ LE SUCEDE? ”

▪ O sábado 23 de novembro, ás 20:00 horas, na Casa da Comunidade de Montes de Camposancos

Ricardo Rodríguez Vicente / Camposancos

 O teatro está, de novo, a punto de chegar a Camposancos. Grazas a asociación Rego de Vicosán, coa colaboración da Comunidade de Montes e ao abeiro do plan Culturea, da Deputación de Pontevedra; o sábado 23 de novembro, ás 20:00 horas, na Casa Cultural da Comunidade de Montes Veciñais en Man Común de Camposancos, poderemos desfrutar cunha representación da obra  “Y a usted ¿qué le sucede?”.

 Dirixida por Alejandra Abreu, a peza teatral será posta en escea polo elenco actoral da compañía Helios Teatro. 

 A trama xira sobre un grupo de pacientes con trastorno obsesivo compulsivo que coinciden na sala de espera da consulta dun gran psicólogo. O doutor retrásase e na espera sucédense divertidas e peculiares situacións.

 Trátase dunha proposta cultural para pasar uns momentos divertidos en boa compaña.

 A entrada é de balde, ata completar á cabida.

O ROSAL

Tarde de música, homenaxe e emoción no Rosal co concerto de Santa Icía 2024  

▪ A Agrupación Musical do Rosal conmemora este día cun concerto, coa colaboración especial do pianista Javier Ares, e unha homenaxe a Antonio Granja e Suso González  

▪Este sábado 23 de novembro, ás 19.00 horas, no auditorio municipal. Entrada de balde   

Infogauda / O Rosal

 O Rosal prepárase para vivir unha xornada especial para conmemorar Santa Icía, patroa dos músicos. A Agrupación Musical do Rosal organiza para este sábado 23 de novembro, ás 19.00 horas - con entrada de balde - un espectacular concerto que encherá o auditorio municipal de emoción e talento para celebrar unha das citas máis agardadas do ano.  

 Baixo a batuta de Javier Alonso, o concerto contará cun programa excepcional que inclúe a benvida aos novos membros da banda, que debutarán nunha tarde repleta de grandes momentos. Nesta ocasión, a Agrupación contará ademais coa colaboración especial do pianista Javier Ares, catedrático no Conservatorio Superior de Música da Coruña, que achegará a súa mestría cunha actuación que promete ser inesquecible.  

 Outro dos momentos destacados será a homenaxe a Antonio Granja e Suso González, figuras clave na Agrupación Musical do Rosal, cunha dedicación e legado que deixaron unha fonda pegada na comunidade musical rosaleira. A Agrupación aproveitará o concerto de Santa Icía para compartir ademais co público a ledicia do primeiro premio acadado recentemente no Certame Galego de Bandas.  

 Dende o Concello convídase a toda a veciñanza a gozar dunha tarde única de música, recoñecemento e celebración, consolidando así o concerto de Santa Icía como unha cita imprescindible no calendario cultural do Rosal. 

O ROSAL

300 anos de historia no corazón do Rosal  

▪ O Concello celebra unha nova edición das Xornadas de Patrimonio cunha charla o 22 de novembro sobre o retablo barroco da igrexa de Santa Mariña 

  

Infogauda / O Rosal  

 O retablo barroco da igrexa de Santa Mariña está de aniversario: 300 anos, tres séculos de historia que o converten nun auténtico tesouro cultural do Rosal. Para conmemorar este fito, o Concello celebra unha nova edición das Xornadas de Patrimonio o vindeiro venres 22 de novembro, ás 20.00 horas, na igrexa de Santa Mariña, cunha charla na que este histórico retablo será o protagonista. 

 A actividade contará coa participación de D. Julio Ramos Rodríguez, párroco do Rosal, quen achegará unha visión única grazas a unha intensa investigación no arquivo parroquial a través da que descubriu a data de construción do retablo e o nome dos artesáns que lle deron vida colocándolle o pan de ouro. Porén, o autor do retablo continúa a ser descoñecido. 

 O párroco estará acompañado ademais por Juan Manuel Monterroso, catedrático de Historia da Arte da Universidade de Santiago de Compostela, que contextualizará este retablo nunha análise máis ampla falando da ‘Forma, devoción e ilusión. Aproximación histórica ao retablo barroco galego’. 

 A alcaldesa do Rosal, Ánxela Fernández Callís, destaca a importancia de celebrar un ano máis estas xornadas de balde abertas a todos os públicos, “unha oportunidade excepcional para poñer en valor o noso legado histórico e para achegar á veciñanza a riqueza artística, cultural e patrimonial que temos tan preto de nós”. 

 Pola súa parte, o concelleiro de Patrimonio, Carlos Villanueva Domínguez, anima a toda a veciñanza rosaleira a participar nesta xornada e achegarse un pouco máis á historia do retablo de Santa Mariña, “unha xoia que merece ser coñecida e celebrada. É un orgullo poder compartir esta parte da nosa historia cunha actividade que une coñecemento, arte e comunidade”.

VILA NOVA DE CERVEIRA

Autarquia desafia 200 alunos a projetar o futuro do Castelo de Cerveira através de curtas-metragens  

O Presidente da Câmara Municipal de Vila Nova de Cerveira  com alunos numa visita o Castelo de Cerveira

Foto: C.M.V.de C.

Irene Pinheiro / Vila Nova de Cerveira

 ‘Curtas do Castelo’: este é o mais recente projeto cultural e comunitário que, ao longo do ano letivo 2024/2025, envolverá cerca de 200 alunos a frequentar a Escola Básica e Secundária e a ETAP de Cerveira na criação de curtas-metragens centradas no Castelo de Cerveira. Lançado pela Câmara Municipal, no âmbito do projeto ARCHETICS financiado pelo programa URBACT, o presente desafio incentiva os jovens a reinterpretar e redescobrir o Castelo, reforçando o sentimento de identidade e coesão social na comunidade e dando contributos para que o Castelo volte a ser um símbolo vivo e ativo da história, economia e turismo.  

 A dinamização deste projeto de curtas-metragens sobre o Castelo de Cerveira pressupõe o envolvimento de alunos em contexto escolar. Quatro turmas (5º ao 8º anos) do Agrupamento de Escolas de Vila Nova de Cerveira e três turmas do ensino secundário (10º ao 12º anos) da ETAP Cerveira vão colocar à prova a sua criatividade, promovendo o conhecimento histórico e cultural local e a construção de novos corredores culturais que refletem e disseminam os valores europeus comuns, através da exploração da relação entre o Castelo de Cerveira e a vida local, recorrendo à história, a lendas locais, ou até mesmo a visões futuristas do papel do Castelo na sociedade.  Para o Presidente da Câmara Municipal de Vila Nova de Cerveira, “este laboratório comunitário urbano incide numa premissa fulcral do trabalho encetado: o futuro. Esta iniciativa conecta a juventude como essência do desenvolvimento futuro e as potencialidades que o Castelo tem para o futuro”. Rui Teixeira acredita que “o envolvimento de vários públicos de faixas etárias diversas permite reunir reflexões e propostas diferenciadas que possam ajudar a devolver a centralidade do Castelo na vida social da comunidade. Espero que as curtas-metragens apresentadas possam mesmo projetar o nosso ‘ex-libris’ no futuro, voltando a ser um ponto de referência dentro e fora das muralhas”.  

 ‘Curtas no Castelo’ tem subjacente um processo criativo devidamente delineado, com visitas guiadas ao Castelo para aprofundar a sua história e importância; e a realização de oficinas de cinema, de forma a capacitar os jovens na vertente audiovisual e cinematográfica, com formação em guionismo, tecnologias e técnicas. Temas como lendas locais, personagens históricos ou eventos importantes podem ser abordados, bem como a mistura de factos históricos com elementos de ficção ou fantasia, permitindo uma abordagem mais livre.  

 As filmagens devem priorizar tecnologia acessível para gravar e editar as curtas-metragens, permitindo que os alunos se envolvam diretamente no processo sem a necessidade de utilizar outros equipamentos; bem como o processo de edição também deve ser com recurso a plataformas simples. Pelo cariz comunitário, este projeto culmina com um Festival de Curtas do Castelo, no qual serão exibidas as curtas-metragens, além de assegurar uma Exposição Online, com publicação dos trabalhos em plataformas digitais como o YouTube, permitindo um alcance mais amplo e uma maior interação com o público.  

 De realçar que esta iniciativa resulta de uma proposta incluída no Plano de Ação Integrado, do Grupo de Ação Local afeto ao projeto ARCHETICS, financiado pelo programa URBACT, do qual o Município de Vila Nova de Cerveira faz parte juntamente com mais nove cidades da União Europeia, partilhando a presença de um património ligado a um passado controverso, e abrindo novas perspetivas e oportunidades que potenciem esse património dissonante. 

TOMIÑO

Os escolares de Tomiño agradecen o seu dereito á información e á participación na toma de decisións 

▪ A alcaldesa presidiu o pleno infantil celebrado hoxe no marco do Día Internacional dos Dereitos da Infancia, oportunidade na que nenos e nenas propuxeron formas para incrementar e mellorar a súa participación na sociedade  

O pleno estivo presidido pola alcaldesa de Tomiño, Sandra González, acompañada polo concelleiro de Mocidade, Agustín González. No hemiciclo tamén estiveron dous representantes de cada centro educativo máis dous voceiros do Voces Novas, de Tomiño

Foto: C.T.

Infogauda / Tomiño 

 Agradecer a creación do Consello da Infancia e Adolescencia Voces Novas, como órgano de comunicación e participación deste sector da poboación co resto da sociedade e concretamente co Concello de Tomiño, foi a tónica xeral do discurso do alumnado representante dos cinco colexios que participaron hoxe no pleno infantil celebrado esta mañá no Auditorio Municipal de Goián.  

 O pleno estivo presidido pola alcaldesa de Tomiño, Sandra González, acompañada polo concelleiro de Mocidade, Agustín González. No hemiciclo tamén estiveron dous representantes de cada centro educativo máis dous voceiros do Voces Novas, de Tomiño. A rexedora explicou que o pleno celebrábase no marco do Día Internacional dos Dereitos da Infancia, que se conmemora o 20 de novembro, coa consigna especial de propor formas de incrementar e mellorar a participación dos menores na vida pública.  “En Tomiño temos un compromiso firme coa infancia e a mocidade; esforzámonos para que a vosa participación sexa algo real, activo e transformador”, afirmou González. E nesa liña, resaltou a creación do Consello Voces Novas no ano 2017 que “sirve como unha canle permanente para que as vosas propostas, ideas e inquedanzas sexan escoitadas e teñan un impacto real nas decisións que tomamos no Concello”.  

 A alcaldesa lembrou ademais que Tomiño foi un dos primeiros concellos de Galicia nomeado por UNICEF “Cidade Amiga da Infancia” polo traballo desenvolto nese eido “para que Tomiño sexa un lugar no cal a infancia sexa respectada, valorada e protagonista”, asegurou.  

 Os escolares fixeron tamén outras suxestións e propostas de mellora como no caso do CEIP Pintor Antonio Fernández de Goián, a creación dun pavillón deportivo, ou no de Barrantes, a  instalación dunha caixa de correo en cada centro educativo, para comunicar ideas, problemas ou propostas, Asemade, pediron que un representante do Concello visite os colexios cada un tempo, ou a creación dun apartado na web municipal para facer suxestións ou preguntas ao goberno. 

 No CEP Pedro Caselles Beltrán reivindicaron o dereito á participación a través de Voces Novas e suxeriron a creación dunha ludoteca, máis actividades extraescolares e a posibilidade de elixir textos para a futura biblioteca.    

 Pola súa banda, o CEIP de Sobrada, solicitou un buzón infantil no Concello, un consello infantil intercentros, e o deseño dunha aplicación para poder participar por internet. O CEIP de Tebra pediu tamén un buzón de peticións e suxeriu tamén un transporte para levar aos representantes dos distintos coles a falar periodicamente cos gobernantes municipais. 

TUI

Robín Trigas inaugura este xoves a mostra “Después de que nos hayamos ido” 

▪ O pintor, afincado en Tui, presentará a súa obra na Sala Municipal até o 11 de xaneiro  

Infogauda / Tui

 Este xoves, 21 de novembro, ás 19.30 h, na Sala Municipal de Exposicións do Concello de Tui, no edificio Francisco Sánchez, terá lugar a inauguración da exposición “Después de que nos hayamos ido” de Robín Trigas.  

 A mostra poderá visitarse até o 11 de xaneiro de luns a venres de 9 a 14 h e de 15.30 a 20.30 h e os sábados de 9 a 13 h.   

 Robín Trigas, natural de Ourense, vive na actualidade en Tui. Os seus primeiros recordos son pintar e debuxar, e viaxar por un mundo creativo. Marino mercante de profesión descubriu outros lugares e outras persoas durante doce anos, até que decidiu dedicarse plenamente á arte. Para iso trasladouse a Londres, tras un breve paso por Madrid, onde se formou na  prestixiosa Heatherley School of Art e na Chelsea School of Art. Tras ano na capital británica, onde formou a súa familia. Sempre que puido seguiu pintando. Volveu a España, para asentarse inicialmente en Vigo e dende hai anos en Tui.   

 Na exposición que dende este xoves vai presenter en Tui “Después de que nos hayamos ido” reflexiona a través da pintura sobre “a nosa presenza no planeta terra, a nosa relación con el e o efecto que podería ter nas nosas vidas o reconciliar a nosa condición de humanos coa nosa condición de terrícolas”.  

 Recolle Roberto (Robín) Trigás as palabras do xornalista norteamericano Alan Wiseman no seu libro “The world wothout us” que “Sen nós, a terra seguirá e perdurará…, sen ela, nós porén, non poderiamos tan sequera existir”.    

 A  concelleira de Ensino, Cultura e Mocidade, Sonsoles Vicente Solla, indica que esta exposición mostra unha escolma da produción de Robín Trigás na que salienta a súa relación coa paisaxe que aborda con técnicas propias como son a encáustica (unha técnica milenaria caracterizada polo uso da cera como aglutinante dos pigmentos, a mestura ten efectos moi cubrintes e é densa e cremosa, a pintura aplícase cun pincel ou cunha espátula quente) e a técnica nihonga (que significa técnica xaponesa e esta baseada no uso  como medio de cola animal, mesturada con pigmentos).