CAMPOSANCOS (A GUARDA)

O Concello de A Guarda adxudicou ás obras de mellora do camiño e o lavadoiro do Aloque  

Un ben patrimonial enmarcado no Camiño Portugués da Costa no que serán investidos 11.960,10€

 Camiño do Aloque, en Camposancos (A Guarda)

Foto: C.A.G.

Infogauda / Camposancos (A Guarda) 

 O executivo municipal do Concello de A Guarda, que preside o alcalde Antonio Lomba Baz, informa que ven “de adxudicar por 11.960,10€ o proxecto para a mellora do camiño e do lavadoiro do Aloque no barrio de Sáa en Camposancos, un ben patrimonial enmarcado no Camiño Portugués da Costa. 

 Estas actuacións levaranse a cabo a través dunha subvención para a rehabilitación e a sinalización do patrimonio histórico-cultural da Deputación de Pontevedra”. 

FONTE E LAVADOIRO DO ALOQUE: UN PATRIMONIO CON MÁIS DUN SÉCULO DE ANTIGÜIDADE

 Segundo indican desde o executivo municipal “a fonte e lavadoiro do Aloque é un ben patrimonial da Guarda cunha antigüidade de, cando menos o 1918, segundo os datos que se conservan nas pedras da súa construción. Un ben que se porá en valor cunha actuación específica para a súa recuperación e rehabilitación integral que consistirá na mellora do inicio do camiño do Aloque co camiño de Sáa, a recuperación do solado co enlousado primitivo e orixinal deste camiño, a eliminación dos engadidos de morteiro alleos ao manancial e lavadoiro do Aloque, reconstrución de muros, reposición dos pavimentos, recuperación da pía, abrevadeiro e canles de condución de auga, entre outros. 

 Unha actuación que pretende manter e fomentar parte do patrimonio arquitectónico local, como son os lavadoiros, antigos puntos de traballo e sociabilización dos veciños e que ultimamente constitúe un lugar de paso para os peregrinos de todo o mundo que percorren o Camiño Portugués da Costa ao seu paso pola Guarda”.

A GUARDA

30 colectivos guardeses participarán na III Mostra Asociativa 

O sábado día 11 de maio, desde ás 16:00 horas, na a Alameda da vila

 Infogauda / A Guarda

 Este sábado día 11 de maio de 2019 a Alameda da Guarda será o escenario, unha vez máis, da celebración da terceira edición da Mostra Asociativa, un evento multicultural no que as asociacións da vila son as protagonistas dando a coñecer o seu traballo a todos os asistentes.

 

 Un total de 30 colectivos e asociacións do municipio participarán ao longo dunha gran xornada cargada de actividades e unha intensa programación para todas as idades, que este ano arrancará ás 16:00 horas.  

 Ademais dos stands individuais de cada colectivo, nos que tamén se realizarán actividades paralelas e se informará máis pormenorizadamente sobre os servizos e obxectivos de cada Asociación/colectivo, a III Mostra asociativa conta coa seguinte programación de actividades:  

Programa

16:00h – Actuación conxunta entre A Boalleira e Na Revolta 16:30h – Exhibición de Danza Centro Do-Majó 

18:00h – 18:45h – Bloque de actuacións conxuntas entre a Asociación Vento Mareiro, Rock´n´Rolla, Xamaraina e o Coro Arpegios-Cantábile. 

18:45h – Actuación da Agrupación Musical de A Guarda 

19:15h – Serán coas actuacións dos grupos Do Lusco ó Fusco e Vento Mareiro 

20:00h Actuación das Pandereteiras da Agrupación Cultural Guardesa 

20:30h Actuación de Xerock   

 A maiores ao longo da tarde haberá actividades paralelas nas que se inclúen a realización dunha alfombra floral, práctica deportiva de remo ergómetro, un obradoiro de hockey e patinaxe, un obradoiro de decoración de palma, un obradoiro de henna, un obradoiro de chapas, unha exhibición de patiñaxe, xogos, circuito e actividades de airsoft, obradoiro de nós mariñeiros, sopas de letras, aparellos mariñeiros, photocall e moito máis.  

 Dende o Concello de A Guarda faise un chamamento á participación da cidadanía este sábado, para por manifesto unha vez máis a importancia do asociacionismo, a colaboración e a implicación da sociedade en diferentes colectivos, para levar a cabo accións asociativas de interese xeral con diferentes temáticas e fins.  

 Video promocional

A GUARDA

FORMACIÓN

Entrega dos diplomas do curso de formación de camareiros-as en bares e restaurantes   

O alcalde de A Guarda, a concelleira de Turismo e o técnico de formación, cos asistentes ao curso de camareiros de bares e restaurantes, que recibiron seus correspondentes diplomas

Foto: C.A.G.

Infogauda / A Guarda

 Por segundo ano a Concellería de Turismo do Concello de A Guarda organizou un curso gratuíto para a formación de camareiros/as de bares e restaurantes, que tivo lugar entre os meses de febreiro e abril.  

 O obxectivo principal foi o de formar a novos camareiros, algo esencial de cara á profesionalización dun sector tan importante para A Guarda como é o turismo e a hostalería, ofertando á veciños e visitantes un servizo de calidade e profesional.  

 A programación estivo deseñada para que as persoas participantes adquirisen as nocións básicas na adecuación do local, reposición do material, servizo de alimentos e bebidas en mesa e barra, e atención ao cliente no servizo de restaurante e bar.  

 O curso tivo unha duración total de 80 horas, das cales, 40 horas estiveron destinadas á formación teórica e práctica, como a montaxe de mesas e ambientación da sala, identificación e limpeza dos utensilios e menaxe, preparación de alimentos e bebidas seguindo as normas de manipulación e hixiene alimentaria, incluíndo tamén formación en alérxenos e manipulación de alimentos.   

 O alumnado tamén recibiu o diploma de manipulador/a de alimentos. Ademais esta formación completouse coas indicacións en alérxenos.   

 A esta formación se lle engadiron outras 40 horas de formación práctica non laboral en bares e restaurantes da Guarda, axustadas segundo o perfil e necesidades de cada alumno, promovendo tamén a posible incorporación deste alumnado ao mercado laboral local de xeito inmediato de cara a vindeira tempada estival.

A GUARDA

A Guarda acolle a celebración do Geolodía19 

Terá lugar o domingo día 12 de maio, cunhas ascensións guiadas ao Monte Santa Trega  

 Infogauda / A Guarda

 Este domingo celébrase en todo o país unha nova edición do Geolodía, toda unha serie de excursións gratuítas coordinadas pola Sociedad Geológica de España, guiadas por xeólogos e abertas a todo tipo de público. Na provincia de Pontevedra a actividade está organizada por un equipo de docentes da Facultade de Ciencias de Mar e a Escola de Enxeñaría de Minas e Enerxía, coordinados polo profesor José Bienvenido Díez, quen adianta que este ano a visita que se propón é unha ascensión ao monte Santa Trega, un itinerario no que se irán explicando diferentes aspectos xeolóxicos desta contorna. “É media hora de subida moi suave e, en principio, a previsión meteorolóxica é boa polo que agardamos que todo sexa un éxito”, indica Diez.  

Máis de 80 inscricións en apenas unhas horas 

 A duración da cada unha das excursións é de arredor de dúas horas e están previstas un total de seis saídas: a primeira será ás 09.00 horas e logo haberá outra cada media hora ata a partida do último grupo, prevista para as 11.30 horas. En total ofértanse 180 prazas e o punto de encontro é o ascenso do monte Santa Tegra. As persoas interesadas en participar teñen de prazo ata as 14.00 horas do vindeiro xoves día 9 para anotarse na web. “As inscricións abríronse este mesmo luns e xa temos 82 prazas cubertas”, salienta Díez, quen admite que esta actividade conta xa cunha comunidade moi fiel de seguidores e seguidoras. “O grupo  con saída prevista para as 11.00 horas xa está completo e agardamos que nestes días se cubran todos”, recalca o coordinador.  

 Xunto a Diez participan nesta actividade o decano da Facultade de Ciencias do Mar, Miguel A. Nombela; a directora da Escola de Enxeñaría de Minas e Enerxía, Elena Alonso; así coma os investigadores Anxo Mena, Gonzalo Méndez, Santiago Pozo e Teresa Rivas. “Xunto a nós contamos tamén coa colaboración dun grupo amplo de alumnos e alumnas de doutoramento”, salienta Diez.   

Entre castros e granito 

 Segundo explican os organizadores, o percorrido desta edición é moi accesible a calquera persoa interesada e, de cara a que poidan ver con antelación o tipo de contidos que se van tratar en cada unha das paradas, elaboraron unha pequena guía na que se explica, de xeito moi divulgativo, os principais contidos da visita. Parten da descrición do río Miño como construtor de paisaxes e, en especial, céntranse no seu tramo final, un importante estuario no que predomina a sedimentación. “Veranse os distintos tipos de estuarios en función do grao de mestura das augas fluviais coas mariñas e buscaremos tamén os motivos polos que a parte final do estuario está practicamente rechea de sedimentos”, salientan no texto da guía.  

 Noutra das paradas afondarán nas principais causas dos cambios climáticos e como estes afectaron á costa galega e ás poboacións castrexas como as do monte Santa Trega.   

 Especial protagonismo terá o granito, tanto o do monte Santa Trega coma dos montes circundantes, fonte de orixe dun recurso moi importante, o caolín, por cuxa explotación e aplicación industrial destacou este municipio. “Falaremos de como se forma o caolín a partir do granito e das condicións que deron lugar, entre o Mioceno e o Holoceno, aos xacementos de caolín da zona e, nesta liña, descubriremos as evidencias do aproveitamento destes caolíns desde o Neolítico e durante a cultura castrexa”, recalcan.  

 A actividade, gratuíta e guiada, celébrase este domingo día 12 de maio no Monte Santa Trega.

GOIÁN

David Leirós, do CEIP Pintor Antonio Fernández, gaña o concurso de debuxos para o cartaz da Festa das Trincadeiras 2019 

O fallo do xurado, formado por varios artistas e persoas relacionadas ca arte, produciuse o venres pasado

David Leirós Fernández amosando o seu debuxo, xunto con varios alumnos de 5º de Primaria do CEIP de Goián

Foto: C. T.

Infogauda / Goián

 David Leirós Fernández, de 5º de Primaria do CEIP de Goián (Tomiño) foi o gañador do concurso de debuxos para a creación do cartaz anunciador da décima edición da Festa das Trincadeiras, que se celebrará o 15 de xuño próximo.  

 O  debuxo de David Leirós foi elixido entre medio centenar de obras realizadas polo alumnado de 5º e 6º de Primaria do CEIP Pintor Antonio Fernández. O xurado estivo formado por escultores, pintores e persoas relacionadas ca arte, coma Magín Picallo, Cuqui Piñeiro, Carlos Fernández, Eulalia Jackson e Zara Pousa.  

 O pasado 26 de abril presentouse no Centro Goianés o programa da X Festa das Trincadeiras na que haberá actuacións, xogos, exposicións de fotografías, concursos de arroces, sobremesas  e cilantro, etc.  

 Os debuxos estiveron expostos dende ese día ata o  pasado venres día 3 de maio, en que se seleccionou o gañador, que foi obsequiado cun lote de libros doados por Edicións Xerais.  

 Como punto final daquela presentación, as persoas asistentes puideron  visionar o vídeo “O espírito das Trincadeiras”, dirixido por  Senén Outeiro.  

 Toda a información sobre a historia desta festa e as actividades que se van realizar, pódense consultar na páxina de Facebook “Festa das Trincadeiras”.  

 A Romería das Trincadeiras, é unha festa enxebre onde os veciños e veciñas de Goián celebran dende o ano 1990, a defensa do monte comunal das Trincadeiras, que se pretendía expropiar e utilizar para a construción da autopista Vigo-Porriño. Goián opúxose a esta expropiación e, tras acadar o seu propósito, celebra cada ano o espírito das Trincadeiras. Os veciños acuden a esta romaría lembrando aquel movemento que alzou a todos en pé de garda, subidos nos chimpíns e tractores que desfilan ata o lugar.

EDUCACIÓN

Os colexios As Solanas (A Guarda), San José e Serra de Vincios (Gondomar), e Mestre Manuel Garcés (Tomiño), foron os  gañadores do concurso escolar posto en marcha por Eu Rural

A segunda edición de Creando Rural remata con 3.300 votos do público 
 

 

O alcalde de A Guarda e a concelleira de Cultura, Educación e Xuventude, coas profesoras e alumnos do CEIP Plurilingüe As Solanas premiados no concurso Creando Rural

 

Infogauda / Redacción

 Gran resposta de participación na segunda edición do concurso escolar Creando Rural, posto en marcha pola Asociación de Desenvolvemento Galicia Suroeste Eu Rural co obxectivo de implicar a novos colectivos na difusión e animación  do desenvolvemento rural e da Medida Leader entre a poboación residente no ámbito territorial do Grupo de Desenvolvemento Rural 14 (GDR 14) (Baiona, Fornelos de Montes, Gondomar, A Guarda, Mos, Nigrán, Oia, Pazos de Borbén, O Porriño, Redondela, O Rosal, Tomiño e Tui).  

 En total, 10 aulas de 7 centros escolares de 5 municipios do territorio presentaron os seus proxectos a concurso para participar nalgunha das dúas categorías aberta, educación infantil e primaria. Os colexios participantes foron, por concellos:      

Gondomar:         

· CEIP Serra de Vincios         

· Centro de Educación Infantil San José     

A Guarda:         

· CEIP Plurilingüe As Solanas     

Nigrán:         

· CEIP Mallón     

Redondela:         

· CEIP de Laredo         

· CEIP Plurilingüe de Quintela     

Tomiño:         

· CRA Mestre Manuel Garcés – Escola da Aurora     

Proxectos gañadores  

 Á numerosa participación hai que sumarlle o éxito de resposta do público na votación popular, xa que se recibiron un total de 3.291 votos. De estes, 2.582 foron para a categoría de educación infantil e outros 709 para a categoría de primaria. Así, as aulas gañadoras por votación popular foron:      

· 6º O Centro de Educación Infantil San José (Gondomar) – categoría educación infantil

· 1º EP CEIP Plurilingüe As Solanas (A Guarda) – categoría educación primaria  

A alcaldesa de Tomiño con profesoras e alumnos do CRA Mestre Manuel Garcés – Escola da Aurora   

 

O alcalde de Gondomar cos alumnos e profesoras do Centro Educación Infantil San Jose e do CEIP Serra de Vincios (Gondomar)

                                                               

 Por outra banda, debido á calidade dos proxectos presentados a concurso na categoría de educación infantil, o tribunal decidiu por unanimidade outorgar dous premios ex aequo para recoñecer o gran traballo levado a cabo polo alumnado e profesorado participante. A estes dous premios hai que sumarlle o da categoría de educación primaria. As clases gañadoras da votación do xurado foron:      

· 3 e 6º O CEIP Plurilingüe As Solanas (A Guarda) – categoría educación infantil     

· CRA Mestre Manuel Garcés – Escola da Aurora (Tomiño) – categoría educación infantil     

· 2º EP CEIP Serra de Vincios (Gondomar) – categoría educación primaria     

 Como premio os gañadores da categoría infantil realizarán unha excursión dun día de duración á Granxa Escola Corazón de Carballo, situada en Tomiño, o vindeiro 15 de maio. Mentres, pola súa parte, os vencedores na categoría de educación primaria visitarán o 28 de maio o centro de actividades na natureza FervenzAventura, en Silleda.  

 Ademais, as aulas gañadoras recibiron este martes os parabéns e un diploma acreditativo de mans dos alcaldes e alcaldesa dos seus concellos. Así, o rexidor da Guarda Antonio Lomba Baz acudiu acompañado da concelleira de Cultura, Educación e Xuventude, Mª Elena Baz Rodríguez, ao CEIP Plurilingüe As Solanas, gañador de dous premios; a alcaldesa de Tomiño e presidenta da Asociación de Desenvolvemento Galicia Suroeste Eurural, Sandra González Álvarez, felicitou aos gañadores do CRA Mestre Manuel Garcés-Escola da Aurora; e Juan Francisco Ferreira González, alcalde de Gondomar, visitou aos vencedores do centro de educación infantil San José e do CEIP Serra de Vincios.  

 Dende a Asociación de Desenvolvemento Galicia Suroeste Eurural quérese dar a noraboa a todos os gañadores e gañadoras do concurso e agradecer a todos os centros escolares que se presentaron a súa participación e implicación no proxecto. Un agradecemento que se fai extensible tamén a todos aqueles docentes que se inscribiron para participar coa súa aula nesta segunda edición de Creando Rural pero que por diferentes motivos non puideron presentar os seus traballos finais a concurso.

A GUARDA

FORMACIÓN

CURSO DE ELABORACIÓN DE COMPOSTAXE ORGÁNICO


Gratuíto e dirixido a persoas desempregadas

Infogauda / A Guarda

 No marco do proxecto "XE-MENTE - Las semillas de la diversidad", o Centro San Xerome organiza un curso gratuíto para persoas desempregadas, de elaboración de compostaxe orgánico. 

 Datas de realización: Do 20 de maio ao 6 de xuño de 2019. 

 Nº de horas: 45 horas (teoría, práctica e visitas a empresas) 

 Prazas limitadas: 12 participantes

A GUARDA

CULTURA

Nova sesión de Contos Contados, Día das Letras Galegas

O sábado día 11 de maio, ás 11:30 horas, na Biblioteca Pública Municipal da vila

 Infogauda / A Guarda

 Este sábado día 11 de maio ás 11:30 horas, na Biblioteca Pública Municipal de A Guarda, terá lugar a primeira sesión de Contos Contados do mes de maio, adicada especialmente ao Día das Letras Galegas. 

 Neste oportunidade realizarase un obradoiro adicado a Antón Fraguas, no que os asistentes colorearán as fichas didácticas "Primavera das Letras" con ilustracións inspiradas na vida e  obra de Antón Fraguas. Este material é unha iniciativa da Real Academia Galega. 

 As sesións de Contos Contados atraen este ano a numerosos pais e nais, avós e avoas, acompañados dos seus fillos e netos, incrementando notablemente a participación con respecto a anos pasados. 

 Dende o Departamento de Cultura convídase unha vez máis a asistir a esta actividade.

A GUARDA

Dúas bandeiras azuis ondearán novamente este verán nos areais guardeses 

Nas praias de Area Grande e O Muíño (Camposancos)

A Senda Litoral, tamén foi recoñecida co distintivo de sendeiro azul

Infogauda / A Guarda

 A Asociación de Educación Ambiental e do Consumidor (ADEAC) e a rama española da Federación Europea de Educación Ambiental (FEE) deron a coñecer esta semana a listaxe de praias españolas recoñecidas con bandeira  azul para esta tempada estival, entre as que se atopan os areais guardeses de Area Grande (marítimo) e O Muíño (fluvial), como xa avanzamos no día de onte, neste xornal dixital transfronteirizo.  

 Ámbalas dúas praias renovan un ano máis o distintivo acadado dende o ano 2009 (Area Grande) e 2010 (O Muíño) e co que saliéntase a súa calidade medioambiental e de servizos.   

 Así, os areais volverán contar este verán cos criterios esixidos polo distintivo de bandeira azul: paneis informativos, actividades de educación ambiental, análise da calidade das augas, servizo de limpeza e recollida de residuos, servizo de salvamento e socorrismo, e instalación de duchas e aseos.   

 Amais do recoñecemento ás praias, A Guarda conta coa Senda Litoral - con preto de 5 km de lonxitude en total -, recoñecida como Sendeiro Azul. O sendeiro, que renova tamén o distintivo dende o ano 2013, comunica as praias do Muíño (Camposancos) e Area Grande pasando polos areais de O Carreiro, A Ribeira e Fedorento.

TOMIÑO

DEPORTES

Éxito rotundo das actividades nas parroquias do pro-grama ‘Deporte para todas as persoas’

Máis de cen inscritas/os nas actividades que se desenvolven en Sobrada, Tomiño e Tebra  

Participantes nunha da crases que cada semana se desenvolven en Sobrada, Tomiño e Tebra

Foto: C. T.

 Infogauda / Tomiño

 Grande acollida das actividades gratuítas desenvolvidas nas parroquias tomiñesas dentro do programa ‘Deporte para todas as persoas’, posto en marcha pola Eurocidade Cerveira-Tomiño en instalacións municipais de ambos os dous concellos. Máis de 100 persoas xa están inscritas e participan nas clases que cada semana se desenvolven en Sobrada (mércores), Tomiño (xoves) e Tebra (venres) e que cada vez suscitan máis interese entre a poboación. Son actividades como ximnasia de mantemento e pilates coas que os participantes din sentirse mellor físicamente.  

 De xeito paralelo, Vila Nova de Cerveira ten en marcha tamén tres grupos de actividades deportivas gratuítas nos IPSS (Institucións Particulares de Solidariedade Social) dirixidas a un perfil de público diferentes, especialmente xente de maior idade.  

Inscrición  

 Máis de 200 persoas participan nas actividades gratuítas do programa transfronteirizo ‘Deporte para todas as persoas’ e que inclúe, ademais das modalidades deportivas en parroquias de Tomiño e IPSS de Cerveira: piscina en familia nas instalacións municipais de Cerveira, con natación e iniciación ao medio acuático para nenas e nenos de 3 a 12 anos acompañados dun familiar os primeiros sábados de cada mes (18.45 h, hora galega), e actividades para maiores de 55 anos, todos os martes (10.30 h) en Cerveira e os xoves (10.00 h) no local da Asociación Vontade de Tomiño. Ambas as dúas tamén cunha boa acollida por parte da poboación.  

 Este programa deportivo comezou unha nova tempada en setembro de 2018 e estará aberto ata novembro deste ano, agás no mes de agosto, no que se fará un parón estival. Todas as persoas interesadas en participar poden aínda inscribirse vía online, cubrindo o formulario que atoparán na web da Eurocidade, ou de forma presencial na oficina de Cooperación Transfronteiriza, situada no segundo andar do Concello de Tomiño (Praza do Seixo). Máis información no teléfono 986 184 598, en horario de 08.00 a 15.00 horas.  

Programa Interreg  

 Estas actividades deportivas que invitan aos veciños edos dous municipios a compartir prácticas saudables forman parte da Axenda Estratéxica para a Cooperación Transfronteiriza Amizade Cerveira-Tomiño, un proxecto cofinanciado ao 75% polo Programa INTERREG VA POCTEP, fondos FEDER da Unión Europea.

O ROSAL

Os socialistas do Rosal presentan a súa candidatura ás Eleccións Municipais

O sábado día 11 de maio, ás 12:00 horas, no Centro Social Polivalente 

Infogauda / O Rosal 

 

 Os Socialistas de O Rosal presentan este sábado día 11 de maio, ás 12:00 horas, no Salón Multiusos do Centro Social Polivalente do Rosal, a súa candidatura ás Eleccións Municipais.  

 Nese evento, que será presentado por José Manuel Domínguez Freitas, ex alcalde de A Guarda, intervirán Modesto Pose, senador electo polo PSdeG-PSOE e o candidato á Alcaldía polo PSdG-PSOE, José Carlos Martínez Crespo. 

 Os Socialistas de O Rosal lembran que “o 26 de maio vanse celebrar eleccións municipais ás que José Carlos Martínez Crespo preséntase como candidato para a Alcaldía do Rosal polo PSdG-PSOE. Nesa data estamos chamados as urnas para definir a composición da futura Corporación Municipal do Rosal. 

 A candidatura do PSdeG-PSOE é unha aposta rupturista cas vellas tendencias e renovada”. Está formada polas seguintes persoas:

 1.    JOSE CARLOS MARTÍNEZ CRESPO 

 2.    JUANA ROSA MACEIRAS RIOMAO 

 3.    MIGUEL ÁNGEL RODRÍGUEZ VELASCO 

 4.    BEGOÑA DOMÍNGUEZ CERQUEIRA 

 5.    LUIS GIRÁLDEZ GIRÁLDEZ 

 6.    MARÍA CONCEPCIÓN ALONSO RODRÍGUEZ

 7.    JOSE MANUEL GÓMEZ CAMPOS 

 8.    MILAGROS LORES TORRES 

 9.    MATÍAS MARTÍNEZ MARTÍNEZ 

10.   SILVIA RODRÍGUEZ DURÁN 

11.   JOSE LUÍS GÓMEZ TRIGO 

12.   CARMEN MARÍA RODRÍGUEZ LAGOS 

13.   JULIO VICENTE GONZÁLEZ

 En decraracions a este xornal dixital transfronteirizo, José Carlos Martínez Crespo afirma: “O proxecto progresista que lidero está comprometido cun Rosal plural, como a nosa veciñanza, igualitario dende a diversidade, inclusivo, pensado a partir dun modelo de convivencia que soubemos construír e que non podemos deixar que se perda.”

OIA

MOVEMENTO OIA PRESENTA SÚA CANDIDATURA ÁS ELECCIONS MUNICIPAIS DO 26-M

O venres día 17 de maio, ás 20:00 horas, no Centro Cultural de Pedornes, e o sábado día 18, nas escolas de Loureza

 

Xoán Lois Vila - terceiro pola esquerda -, candidato de Movemento Oia á Alcaldía de Oia, con María Andura Giráldez, Oscar Suárez Álvarez, Loreto Dorado Silva, José Miguel Sánchez e Ana Rodríguez González

Infogauda / Oia

 O próximo venres 17 de maio ás 20:00 horas, Movemento Oia presentará a súa candidatura no Centro Cultural de Pedornes, en Oia e o sábado 18 nas escolas de Loureza. 

 Encabezada polo concelleiro Xoán Lois Vila, a lista conta nos primeiros lugares coa presenza de María Andura Giráldez, Oscar Suárez Álvarez, Loreto Dorado Silva, José Miguel Sánchez e Ana Rodríguez González. No acto tamén se dará a coñecer os principais obxectivos que conformarán o programa político que esta agrupación presentará nas vindeiras eleccións municipais de maio, e o traballo realizado estes anos no Concello. 

 Xan Lois Vila, candidato de Movemento Oia á Alcaldía

 En decraracións a este xornal dixital transfronteirizo, o candidato á Alcaldía de Oia, Xan Lois Vila salientou: "Movemento Oia é unha asociación que nace do movemento 15-M que se integra nas mareas municipais. En Marea é a segunda forza política do Parlamento galego que toma iniciativas e expón unha oposición eficaz no mesmo. E que dá liberdade ás mareas locais que equivalen aos círculos de Podemos para que fagan o que entendan que é mellor para as persoas e a cidadanía nos seus concellos. 

 En Movemento Oia temos afíns a Podemos, Anova, Esquerda Unida, etc. e o obxectivo e os fins son os mesmos, por tanto nestas eleccións municipais somos os representantes naturais de todas esas sensibilidades políticas". 

 Na convocatoria á presentación oficial da candidatura, Xoán Lois Vila fai referencia en que presentan "unha nova proposta cun grupo de persoas comprometidas coa sociedade actual e real de Oia, de todas as idades e profesións, que traballan día a día en diferentes movementos sociais e veciñais en favor da veciñanza e dos seus dereitos". 

 Afirma que teñen "un proxecto para Oia e un equipo para levalo a cabo. Oia ten futuro se somos capaces de canalizar tódalas necesidades dentro dun entorno sustentable que permita crear traballo, riqueza e fixar poboación para dar un futuro ós mozos e servizos para tódolos veciños". 

 "A cidadanía demanda transparencia, participación e que a institución municipal estea ao servizo das maiorías sociais", afirma Xan Lois Vila.

CRISTELOS (TOMIÑO)

A DEPUTACIÓN DE PONTEVEDRA MELLORARÁ A SEGURANZA VIARIA DA EP-3101 NO LUGAR DE CRISTELOS EN TOMIÑO CUNHA NOVA GLORIETA  

A actuación comezará no verán e incluirá redutores de velocidade, un itinerario peonil seguro e unha nova parada de autobús

 Infografía da ubicación e acabado da rotonda

Fonte: D.PO.

Infogauda / Tomiño 

 “O departamento de Mobilidade da Deputación de Pontevedra resolverá a situación de inseguranza viaria que existe na intersección da estrada provincial EP-3101 no lugar de Cristelos dentro do Concello de Tomiño coa construción dunha nova glorieta”. Así o de ven de adiantar o deputado Uxío Benítez Fernández, quen a súa vez afirma: “A actuación inclúe non só unha rotonda para regular o tráfico, senón tamén a instalación de elementos redutores de velocidade, a delimitación dunha zona de circulación peonil e unha nova parada de autobús, así como novos servizos de alumeado e drenaxe”.  

 Segundo Benítez, “a mellora da seguranza viaria na zona vén obrigada debido ao tránsito de peóns, coches e buses, xa que existe unha parada do autobús escolar que non está convenientemente sinalizada e tampouco hai un itinerario peonil seguro, posto que non hai cunetas e a beiravía está invadida de maleza”.  

 O proxecto aprobado pola Deputación inclúe unha ampliación da calzada para a instalación da rotonda no punto quilométrico 3+780, onde será preciso un pequeno desmonte. A nova intersección resolverase cunha nova ronda de diámetro exterior de 28 metros e dous carrís de catro metros cada un. Disporase de áreas peonís na nova parada de bus con espazos de sección media útil de 2,5 metros e crearase unha nova rede de alumeado público con 10 unidades de iluminación led, catro delas nunha columna no anel interior da nova glorieta.   

 O orzamento para esta actuación é de 131.441,31 euros, se ben existe unha proposta de adxudicación que será aprobada na vindeira mesa de contratación que rebaixa substancialmente a licitación ata os 108.964,8 euros. A intención é que a formalización do contrato se realice nas vindeiras semanas, polo que o inicio da obra quedará para principios de verán. O prazo de execución logo do comezo dos traballos será de cinco meses.

GANDEIRÍA

A Deputación de Pontevedra e o Colexio Oficial de Veterinaria impulsan a identificación de 400 exemplares de gando equino dos montes de todas as comarcas da provincia  

O programa permitirá identificar 140 équidos da Serra da Groba, 65 de Gondomar, 25 de Moraña, 60 de Cerdedo-Cotobade, 50 da Estrada e 60 doutras zonas da provincia

Carmela Silva, presidenta da Deputación de Pontevedra con Luis Núñez Desiré, presidente do Colexio Oficial de Veterinaria

Foto: D. PO.

Infogauda / Pontevedra

 A Deputación de Pontevedra e o Colexio Oficial de Veterinaria veñen de acordar a identificación de ata 400 exemplares de gando equino que viven en réxime de liberdade ou semiliberdade nos montes da provincia, dando así resposta á inquedanza das comunidades de montes e ante a inacción da Xunta de Galicia. En total, a institución provincial inviste na actuación 9.600 euros co obxectivo de preservar o valor etnográfico, turístico, medioambiental e sostible das explotacións gandeiras tradicionais, ao tempo que impulsar o cumprimento da normativa vixente relativa á identificación dos équidos.  

 Para a presidenta da Deputación, Carmela Silva, "hai moitas experiencias para vivir na provincia de Pontevedra e, no caso do gando equino, falamos de tradicións, de algo que nos identifica dunha forma moi especial, que vive libre nos nosos montes onde desenvolve un papel fundamental no coidado e preservación do medio ambiente". Neste eido, Silva incidiu na necesidade de apoiar este tipo de explotacións gandeiras "con todas as garantías" e na importancia de identificar os équidos para cumprir a normativa vixente.  

 Pola súa banda, o presidente do Colexio Oficial de Veterinaria, Luis Núñez Desiré, agradeceu o compromiso da Deputación "que aínda que non ten competencias, con esta axuda para identificar o gando equino marca unha referencia a nivel galego xa que é a primeira administración que o fai". Neste contexto, Núñez explicou que a aportación da Deputación para a identificación dos équidos permite reducir o 70% do custe que suporía esta actuación para as persoas gandeiras.  

 En total, a través desta iniciativa, vanse identificar ata 400 équidos dos que 140 viven na Serra da Groba (Val Miñor e Baixo Miño), outros 40 están vencellados co Curro de Morgadáns (Gondomar), 25 co Curro do Galiñeiro (Gondomar), 25 pertencen ao Curro de Amil (Moraña), 60 ao Curro de Cuspedriños (Cerdedo-Cotobade), 50 son do Curro de Sabucedo (A Estrada) e outros 60 doutros curros da provincia situados na Serra do Suído (comarcas de Vigo, Pontevedra, O Condado e A Paradanta), Monte Xiabre (comarcas de Caldas e O Salnés), na Serra de Conla (comarcas de Terra de Montes e Pontevedra), Monte Castrove (comarcas de Pontevedra e O Salnés), Monte Xaxán (O Morrazo),  Serra do Cando (comarcas de Pontevedra e Terra de Montes), Monte Castro Sebil (comarcas de Caldas e Terra de Montes), montes da Paradanta (comarcas do Condado e A Paradanta) e Serra do Faro do Avión (A Paradanta).  

 O sistema de identificación, tal e como explicou a presidenta, inclúe un documento permanente único, un microchip e unha tarxeta de movemento equino editada pola Fábrica Nacional de Moeda e Timbre. Amais, o gando equino identificado formará parte dunha base de datos.

DEPORTES

FÚTBOL

O SPORTING GUARDÉS RECIBIRÁ O C. D. ARCADE 

O domingo día 12 de maio, ás 5 da tarde no Estadio Municipal A Sangriña

CULTURA

CantarElas  

O novo de LEILÍA      

 

  Leilía: 30 anos de andaina musical

Manuel Roxo / Santiago de Compostela

 Leilía convídanos a viaxar a través das súas melodías, da súa evolución sonora, dos seus cambios  escenográficos... e a percorrer a súa historia, unha historia chea de fabulosos momentos grazas ao seu público sempre fiel, un público ao que regalan esta viaxe musical 30 anos despois.  

 Leilía emprende esta nova aventura coa mirada posta nun novo espectáculo que mostra as súas orixes e o camiño no que levan 30 anos xuntas. "CantarElas" é o título deste novo espectáculo no que combinan os seus temas máis emblemáticos cos máis actuais.