DEPORTES

O CAMPUS JOE ARLAUCKAS - TUI VOLTA Á CIDADE DE TUI

O estadounidense Joe Arlauckas, director do Campus i ex xogador da NBA e do Real Madrid, estará entre os días 4 e 9 de xullo de 2016, ambos inclusive, en Tui 

Infogauda / Tui

 O Campus Joe Arlauckas-Tui volverá abrir as súas portas entre os días 4 e 9 de xullo de 2016, ambos inclusive, datas nas que volverá estar en Tui o estadounidense Joe Arlauckas, director do Campus i ex xogador da NBA e do Real Madrid. 

 A organización do Campus conta coa colaboración e asesoramento de Moncho López, ex seleccionador de España, Portugal e Angola, na actualidade é adestrador do FC Porto. 

 Nesta edición volveremos contar con un staff técnico de auténtico luxo, ademais contaremos coa presenza de adestradores de primeiro nivel, así como tamén recibiremos a visita de varios xogadores ACB que departirán as súas experiencias deportivas cos participantes do Campus. 

 O Campus está enfocado para xogadores de baloncesto nacidos entre os anos 1997 e 2004, que buscan unha mellora física e técnica, ao tempo que comparten experiencias e adestramentos con outros xogadores xa profesionais. 

 Polo Campus teñen pasado xogadores que xa debutaron nas ligas ACB, LEB Ouro, LEB Prata, EBA, Liga portuguesa e na NCAA americana. Xogadores que fan que este Campus de baloncesto de Tui sexa un referente nacional e internacional. 

 As inscricións para esta edición 2016 xa están abertas e poden facerse online na seguinte páxina www.campusjoearlauckastui.com onde ademais atoparán toda a información que precisan sobre o Campus.

VIGO

BEATRIZ FIGUEROA OFRECERÁ UNHA CHARLA FALARÁ SOBRE O CANCRO

Será este mércores día 3 de febreiro, ás 18:00 horas, no salón de actos do IME

Infogauda / Vigo

 Con motivo do Día Internacional do Cancro, a Federación Olívica de Asociacións de Pais de Alumnos (Foanpas) convidou a Beatriz Figueroa a dar unha charla para a comunidade educativa,  e aberta ao público en xeral. 

 Figueroa, activista polos dereitos dos enfermos de cancro, quere achegar a profesores, pais e alumnos a realidade do cancro desde a súa propia experiencia como enferma. Os aspectos psicolóxicos dos enfermos de cancro e a súa familia, teñen que ser abordados por profesionais como os psicooncólogos.   

 O cancro segue sendo unha enfermidade que xera moitos medos e incertezas entre as persoas que rodean ao enfermo. Falar de cancro non é nada fácil, e moito menos cando tes que darlle a coñecer esta palabra a uns nenos.   

 Beatriz recibiu miles de testemuños de enfermos de cancro desde que en maio do 2013 denunciou publicamente a desprotección económica, social e laboral que sofren. E se hai algo no que todos coinciden, é no doloroso recordo  de cando tiveron que dicirlle á súa familia e amigos que tiñan cancro. O que máis preocupa a un enfermo e á súa familia é a reacción ante o cancro dos fillos pequenos ou adolescentes.   

 Ana e Sara, muller e filla de 10 anos de Javier Branco, de Barcelona, gravaron un vídeo para contar como foi ese difícil momento. Susana, desde Avilés, ha envíado unha carta relatando como lle dixo ao seu fillo Borja, de seis anos en 2011, que ela tiña un cancro de mama. Un ano máis tarde, o marido de Susana e pai de Borja, foi diagnosticado tamén de cancro.  

 Alba tiña 11 anos cando escribiu un relato para o colexio sobre a enfermidade da súa nai. A lucense Ana Martínez, que lle foi diagnósticado un  cancro de mama bilateral aos 42 anos, fíxonos chegar o seu propio relato. Cóntanos como a súa filla Alba e o seu fillo menor Manuel, enfrontáronse á enfermidade da súa nai.  Beatriz virá desde Baiona, onde vive co seu marido e fillo pequeno Rodrigo, para darnos o seu testemuño. Fai tres anos, con 45 anos, ingresou por urxencias e o seu diagnóstico foi leucemia aguda.  

 E tamén falará Mónica, de Vigo e compañeira de colexio de Beatriz Figueroa, no que estudaban os seus outras 4 irmás. Nai e profesora, en xuño do 2013 perdeu á pequena das súas irmás, Gemma,  a consecuencia dun cancro. Gemma, que coincidiu con Beatriz nalgunha sesión de quimioterapia, era tamén nai e profesora. 

CHARLA: "Cancro, lección de vida" 
ORGANIZA: Foanpas 
DÍA: Mércores 3 de febreiro  
HORA: 18:00 h.
LUGAR: Salón de actos do Instituto Municipal de Educación.
Camiño do Chouzo, nº 2 (Vigo)

CULTURA

A Xunta de Galicia colabora coa Asociación Cultural Asorey nunha nova edición do certame de escultura Francisco Asorey

O secretario xeral de Cultura, Anxo Lorenzo, reuniuse esta mañá coa asociación para acordar unha nova colaboración coa entidade e garantir así a continuidade desta convocatoria artística

O secretario xeral de Cultura, Anxo Lorenzo, reuniuse esta mañá coa Asociación Cultural Francisco Asorey

Infogauda / Santiago de Compostela

 O secretario xeral de Cultura, Anxo Lorenzo, trasladoulles esta mañá á presidenta e ao secretario da Asociación Cultural Asorey, María del Carmen Abelleira e Vicente Pérez, respectivamente, o compromiso da Xunta de Galicia de colaborar, un ano máis, no Certame Escultórico Francisco Asorey, que en 2016 chega á súa terceira edición. 

 Con esta colaboración, a Consellería de Cultura, Educación e O.U. promove a continuidade deste certame escultórico, creado en 2014, para favorecer a creación artística e recordar a figura do escultor Francisco Asorey.  

Na xuntanza, tamén estiveron presentes o deputado provincial de Cultura e Normalización Lingüística Xosé Leal Fariña, e o Concelleiro de Cultura do Concello de Cambados, Víctor Caamaño, en representación das restantes institucións implicadas nesta iniciativa. 

O ROSAL

AS VOSAS IMAXES

FAI UN PASEO POLA BEIRA DO TAMUXE?

A paisaxe, á Aula da Natureza no Muíño das Aceñas, e un entorno fermosísimo convídannos a disfroitar de un entorno que está moi preto de nós

    Foto: Santiago Baz Lomba
 
    GALERÍA DE IMAXES

GALICIA

Medio Ambiente investirá este ano un total de 230.000 euros para mellorar o Parque Natural de Corrubedo 

A conselleira de Medio Ambiente e Ordenación do Territorio, Beatriz Mato, visitou hoxe este enclave, con motivo da conmemoración do Día mundial dos humidais 

Recordou que este tipo de espazos son “esenciais para o noso presente e futuro”, polo que debemos protexelos das amenazas que sufren na actualidade 

Galicia conta con máis de 1.100 humidais, dos que un total de cinco –incluído o de Corrubedo- están declarados como de importancia internacional 

Mato aproveitou a súa visita para desprazarse ata á EDAR de Ribeira, cuxas obras están a punto de finalizar e que podería comezar a funcionar en período de probas entre os meses de marzo e abril  

A conselleira de Medio Ambiente e Ordenación do Territorio, Beatriz Mato, visitou hoxe Corrubedo

Infogauda / Ribeira (A Coruña)

 A Consellería de Medio Ambiente e Ordenación do Territorio investirá este ano un total de 230.000 euros, procedentes de fondos FEDER, para continuar mellorando o Parque Natural de Corrubedo. Deste total, máis de 100.000 euros vanse dedicar a estudos sobre o medio físico e biótico do espazo e, ademais, vaise reforzar o seu servizo de información, que estará aberto aos visitantes desde mediados de febreiro, e non só no período estival como ata o de agora.  

 Así o anunciou hoxe a titular deste departamento autonómico, Beatriz Mato, que se desprazou ata este enclave con motivo da conmemoración do Día mundial dos humidais. Esta efeméride celebra a data da sinatura, hai agora 45 anos, do convenio sobre os humidais, un marco que rexe tanto en Galicia como en Europa.  

 Os humidais son zonas de terra inundadas permanente ou intermitentemente, con ecosistemas moi ricos que están a medio camiño entre os terrestres e os acuáticos. “A súa protección é esencial, porque escasean e están ameazados. Calcúlase que no último século desapareceron dous terzos do total de humidais do mundo”, alertou Mato, que lembrou que estes espazos “son esenciais para o noso presente e futuro”. En concreto, enumerou entre os seus beneficios: contribúen a encher os acuíferos subterráneos; supoñen unha reserva imprescindible de auga doce; son esenciais para vida dos peixes; constitúen o medio de vida de máis de mil millóns de persoas en todo o mundo; e resultan imprescindibles para a conservación e sostibilidade do medio ambiente, porque absorben precipitacións e almacenan o 30% do carbono da terra, o dobre que os bosques de todo o mundo.  

 Galicia ten actualmente máis de 1.100 humidais, dos que un total de cinco están declarados como humidais de importancia internacional: ría de Ribadeo; ría de Ortigueira-Ladrido; a lagoa e areal de Valdoviño; o complexo intermareal Umia-O Grove, A Lanzada, Punta Carreirón e Lagoa Bodeira; e a lagoa e duna de Corrubedo. 

 Este último, ademais dun humidal recoñecido internacionalmente, é tamén un dos sete parques naturais galegos. Dispón de 1.000 hectáreas e é un dos ecosistemas costeiros máis ricos en flora do norte de España. Só no último ano visitaron este espazo preto de 65.000 persoas. 

 Segundo precisou a conselleira, o compromiso coa súa conservación esténdese tamén aos outros seis parques naturais galegos. A Xunta ten consignado para eles 3,25 millóns de euros en 2016, que se veñen a sumar aos máis de 19 millóns que se teñen investido nestes parques desde 2009. Neste mesmo sentido, Mato lembrou tamén a aposta do departamento por crear unha Rede de parques naturais de Galicia e por unha nova oferta turística “innovadora, sostible e de calidade” como é o proxecto “Starlight en espazos protexidos”.  

Visita a EDAR de Ribeira 

 Logo da súa visita ao parque natural, a conselleira desprazouse ata a EDAR de Ribeira, para coñecer o estado dos traballos nesta instalación e nos dous colectores interceptores que conducirán as verteduras ata esta nova infraestrutura. O orzamento total para esta depuradora supera os 19,3 millóns de euros (dos que a Xunta achega 8,5 millóns), e exemplifica a colaboración entre Goberno central e autonómico.  

 A nova EDAR dará servizos aos núcleos máis poboados do concello: o centro urbano de Ribeira, e as parroquias de Aguiño e Castiñeiras, o que significa unha poboación aproximada e 36.000 habitantes equivalentes. 

 Actualmente, as obras están a punto de finalizar e a previsión é que o período de probas comece o próximo mes de marzo. Esta nova EDAR conta con dúas liñas de auga, estase a executar un emisario submarino, así como sete tanques de tormenta e 13,6 quilómetros de conducións que integran o saneamento da franxa litoral interna de Ribeira.  Mato lembrou, ademais, que o pasado mes de xuño comezou a funcionar a EDAR de Corrubedo e os seus colectores xerais. Dá servizo aos núcleos que forman o entorno do Parque natural de Corrubedo. Na súa construción investíronse preto de 6,23 millóns de euros, que foron executados na súa totalidade pola Xunta.  

 O ano pasado tamén se finalizou a reparación do emisario de Punta Touro, cun investimento propio de 1,85 millóns de euros.  

 “En resumo, desde 2009 téñense investido 28 millóns de euros no saneamento e depuración das augas do concello, dos que a Xunta financiou un total de 17”, resumiu Mato, quen rematou recalcando o “firme compromiso” do Goberno autonómico co medio natural e benestar e calidade de vida dos veciños e veciñas de Ribeira.   

CULTURA

Coa presentación da obra ‘Ramón Lugrís. Sempre Galicia, Sempre Europa’, a Secretaría Xeral de Política Lingüística réndelle homenaxe póstuma ao tradutor ferrolán 

Valentín García lembra “o gran labor que intelectuais cheos de amor e admiración por Galicia, como Ramón Lugrís, fixeron polo europeísmo e a proxección internacional da nosa lingua e cultura” 

O escritor, xornalista e tradutor ferrolán faleceu o pasado 2 de decembro en Cidade Real

Infogauda / Santiago de Compostela

 O libro ‘Ramón Lugrís. Sempre Galicia, Sempre Europa’, sobre este tradutor e xornalista recentemente falecido, presentouse este martes no salón de actos da Secretaría Xeral de Política Lingüística. Trátase da novena entrega da colección Texturas Internacionais que publica o Instituto Galego de Análise e Documentación Internacional (IGADI) co patrocinio da Secretaria Xeral de Política Lingüística da Xunta de Galicia.  

 O titular do departamento, Valentín García, destacou “o gran labor que intelectuais cheos de amor e admiración por Galicia como Ramón Lugrís fixeron polo europeísmo e a proxección internacional da nosa lingua e cultura”. Lembrou como “o inmenso traballo desenvolvido por Lugrís valeu de mostra e exemplo a moitos outros que hoxe fan que nos sintamos orgullosos do volume de obras escritas noutras linguas e traducidas ao galego ou de como as creadas na nosa lingua se editan en países e culturas tan distantes como Rusia ou o Xapón.”  

Grande, Ríos e os colaboradores 

 O libro ‘Ramón Lugrís. Sempre Galicia, Sempre Europa’ fíxose posible mercé ao traballo de Xosé Luís Franco Grande e Xulio Ríos, así como pola achega de materiais diversos sobre a figura do xornalista e escritor ferrolán. Nel tamén colaboran Carlos Baliñas, Miguel Barros e Gonzalo Rodríguez Mourullo. Foi precisamente no despacho deste último, en Madrid, onde lle foi entregado o volume ao propio Ramón Lugrís, quen faleceu apenas semanas despois, o día 2 de decembro, en Cidade Real, onde residía nos últimos anos tras longos periplos en Londres, Nova York ou Barcelona. Contaba con oitenta e tres anos de idade.  

 Por esta proximidade no tempo, o acto de presentación deste martes supuxo tamén unha homenaxe a Ramón Lugrís. Nel emitiuse un breve documental que amosa as diferentes etapas da súa vida.     

O contido da obra 

 O libro ábrese cunha longa entrevista a Lugrís, realizada por Franco Grande e Ríos, e titulada ‘Continúo sendo un convencido europeísta’. A seguir, a obra reproduce catro ensaios que analizan, desde ángulos complementarios, a vida e a obra de Lugrís: ‘No principio foi Ramón Lugrís’, asinado por Franco Grande, quen dá razón do contido integral e analiza dúas conferencias de Lugrís que permanecían parcialmente inéditas; ‘A iso das catro da tarde. Un bypass na tradición galeguista’, de Carlos Amable Baliñas Fernández, quen rememora o tempo compartido con Lugrís nas aulas universitarias dos 50 e mesmo episodios posteriores; ‘Carta a Ramón Lugrís cincuenta anos despois’, onde Rodríguez Mourullo recunca tamén na Compostela daquela década para dar a súa versión da desavinza protagonizada por Piñeiro e el con Lugrís como paciente e comprensivo amigo de ambos os dous; e ‘Tralas pegadas de Ramón Lugrís’, longo artigo de Miguel Barros Puente no que analiza algúns traballos xornalísticos de Lugrís para teorizar sobre o seu pensamento político e as súas lecturas ideolóxicas dos conflitos internacionais sobre os que se manifestou por escrito.  

 O volume remata cunha xenerosa escolma de artigos do propio Lugrís titulada ‘Apuntes británicos (e outros)’: case unha vintena de textos escritos entre 2009 e 2011 que foron compilados, maioritariamente, das páxinas do extinto semanario ‘A Nosa Terra’ e, en menor medida, da plataforma IGADI.org.  

 Un caderno fotográfico final no que se recollen instantáneas do Lugrís neno, mozo universitario e profesional do xornalismo e da tradución con distintos familiares, amigos e diversos persoeiros e intelectuais pon o ramo a esta obra ideada e confeccionada antes do pasamento do autor, polo que cobra un inequívoco sentido de homenaxe póstuma.  

Biografía abreviada de Ramón Lugrís 

 Nacido na cidade departamental en 1932, Lugrís formou parte do grupo inicial do galeguismo organizado en Santiago nos anos 50, arredor de Ramón Piñeiro, de quen foi considerado durante moito tempo a súa ‘man dereita’. Lugrís foi dos primeiros animadores do proxecto europeísta e do federalismo galeguista, se ben nos últimos anos manifestouse máis crítico coa deriva europea.  

 O labor de Lugrís discorreu principalmente polo seu traballo como tradutor (na Organización Internacional do Café ou nas Nacións Unidas en Nova York) e como xornalista en diferentes medios (desde a BBC á axencia EFE).  

 Nos últimos anos pasara a formar parte do Consello Reitor do IGADI, a quen prestaba o seu asesoramento, colaborando ademais con ensaios, relatorios e artigos publicados en diferentes medios e relativos a temas fundamentalmente europeos.

CULTURA

Román Rodríguez salienta, na entrega dos XXI Premios San Clemente, a importancia da lectura na formación dos máis novos 

Pedro Feijoo, Javier Cercas e Colm Tóibín, xa galardoados anteriormente neste certame, recolleron os premios da edición de 2015 

Por primeira vez, e como novidade polas dúas décadas de vida do concurso, participaron como xurado centros educativos de outros países europeos

O conselleiro de Cultura, Educación e Ordenación Universitaria, Román Rodríguez, participou esta tarde na entrega dos XXI Premios San Clemente  

Foto: Ana Varela

Infogauda / Santiago de Compostela

 O conselleiro de Cultura, Educación e Ordenación Universitaria, Román Rodríguez, participou esta tarde na entrega dos XXI Premios San Clemente, un certame creado e organizado polo IES Rosalía de Castro de Santiago de Compostela e cuxa especial simboloxía radica en que son as alumnas e alumnos de varios centros educativos os que exercen como xurado. Durante a súa intervención o titular do departamento educativo da Xunta de Galicia salientou a importancia da lectura na formación dos máis novos.  

 Neste sentido lembrou que o amor pola lectura e o hábito lector chega ao alumnado inculcado polas familias e os docentes. “Un importante legado, sen dúbida, xa que a lectura é unha das principais vías de acceso ao coñecemento, amplía o vocabulario e mellora a capacidade expresiva”. Así mesmo o conselleiro quixo destacar a necesidade de adquirir boas competencias neste ámbito, imprescindibles para unha boa utilización das novas tecnoloxías se non se pode analizar un texto. “Na sociedade tecnoloxizada do século XXI, a información é rápida e continua e esixe unha compresión inmediata”, dixo.  Novidades no certame 

 Na edición de 2015, e celebrando as dúas décadas de vida do certame, por primeira vez o galardón recae en 3 autores que xa o recibiran con anterioridade. Deste xeito, na categoría de Lingua Galega o premio foi para ‘A memoria da choiva’, unha obra de Pedro Feijoo, que xa resultara galardoado en 2014 por ‘Os fillos do mar’; mentres que o de Lingua Castelá foi para ‘El impostor’, de Javier Cercas, autor que xa recibira o San Clemente en 2007 por ‘La velocidad de la luz’. Na modalidade de Lingua Estranxeira o gañador foi Colm Tóibín por ‘O Testamento de María’, escritor que xa recibira en 2012 o premio por ‘Brooklyn’. 

 Así mesmo, incorporáronse ao xurado estudantes de varios centros educativos europeos, en concreto o Hockerill College de Londres, o Lycée Saint Français Xavier de Vannes (Bretaña francesa), o Grimmelshausen Gymnasyum de Gelnhausen (Frankfurt), e a Escola Secundaria de Santa Comba Dão (Viseu). Xunto con eles, foron xurado estudantes do propio IES Rosalía de Castro e dos IES Xelmírez I (Santiago de Compostela), Lucus Augusti (Lugo), Pintor Colmeiro (Silleda) e Ferro Couselo (Ourense) 

Unha iniciativa da comunidade educativa 

 Os Premios Arcebispo Juan de San Clemente naceron dunha iniciativa do director do IES Rosalía de Castro, Ubaldo Rueda, e de dous profesores de matemáticas, Francisco López Piñeiro e Maribel Marín; con tres modalidades – Lingua Galega, Castelá e Estranxeira- e cun xurado conformado por alumnos do propio IES e de outros 4 institutos galegos escollidos cada edición por sorteo. 

 Ademais do que o certame supón no referido ao estímulo do hábito lector entre os estudantes, o éxito do Premio dálle ás alumnas e alumnos que conforman o xurado a oportunidade de compartir unha xornada cos autores galardoados que, ano tras ano, acoden a Santiago de Compostela a recoller este recoñecemento.  

 Nestas dúas décadas de historia o galardón colleitou unha excelente acollida entre os autores, algúns deles premios Nobel, como Mario Vargas Llosa ou José Saramago.

GALICIA

Galicia rexistra en xaneiro 22.555 persoas desempregadas menos que hai un ano 

A secretaria xeral de Emprego, Covadonga Toca, resaltou hoxe que as persoas sen emprego diminuíron nun -8,71% con respecto a xaneiro de 2015

É o vixésimo sétimo descenso consecutivo e o terceiro ano consecutivo que se acada reducir o paro rexistrado nun mes de xaneiro en termos interanuais 

Por provincias baixa en todas na evolución interanual e por sectores na industria e o primario en comparación co mes anterior 

As afiliacións á Seguridade Social creceron nun 1,92% con respecto a hai un ano, o que supón 22 meses consecutivos de aumento, desde abril de 2014 

Toca indicou que os datos sitúan a Galicia en niveis de paro inferiores aos de hai 5 anos e que reflicten que “estamos no camiño da recuperación económica”   

Infogauda / Santiago de Compostela

 Galicia pechou o mes de xaneiro con 22.555 persoas desempregadas menos que hai un ano, situándose o número de persoas sen emprego en 236.447. Polo tanto, os desempregados diminuíron nun -8,71% na evolución interanual –de xaneiro a xaneiro.  

 A secretaria xeral de Emprego, Covando Toca, sinalou hoxe que é o vixésimo sétimo descenso consecutivo interanual e o terceiro ano consecutivo no que se acada reducir o paro rexistrado en termos interanuais nun mes de xaneiro. Así mesmo, destacou que é a maior baixada interanual en termos absolutos de toda a serie histórica, isto é desde 1996. Grazas a esta evolución, Toca afirmou que “a nosa Comunidade sitúase a niveis de paro inferiores aos de hai 5 anos”.  

 Con respecto ao Estado, Galicia segue a presentar un mellor comportamento que o Estado en termos interanuais. Baixa o paro en 0,43 puntos máis que o Estado.  

 A Comunidade autónoma mantén, polo tanto, esta boa evolución interanual do paro rexistrado, aínda que en comparación co mes pasado aumenta nun 3,34%. Ao respecto, Toca explicou que os incrementos de paro rexistrado nos meses de xaneiro son habituais debido ao remate da campaña do Nadal. De xeito, o sector servizos rexistrou o maior incremento, en concreto, en 7.336 persoas. Neste senso, subliñou que estes ascensos vénse producindo ao longo de toda a serie histórica, aínda que resaltou que nos últimos dous anos acadáronse aumentos porcentuais inferiores aos de comezo da crise. “Reflíctese, polo tanto, que estamos no camiño da recuperación económica”, engadiu.  

 En canto aos datos por provincias, o paro rexistrado descendeu de xeito interanual en todas elas. A Coruña rexistrou a maior baixada con respecto a xaneiro de 2015, nun -9,37%, seguida de Pontevedra cun -8,57%; Lugo cun descenso do -8,54%; e Ourense cun -6,97%. Por sectores, e, en comparación co mes anterior, as persoas sen emprego baixaron na industria nun -1,10% e no primario nun -0,09%. 

 Na evolución dos contratos, é preciso sinalar que Galicia pecha xaneiro de 2016 cun 0,43% máis que hai un ano e con respecto ás afiliacións aumentaron nun 1,92% en comparación con hai un ano. Isto significa que xa son 22 os aumentos consecutivos, desde o mes de abril de 2014, nas que Galicia rexistra unha interanual positiva en termos de afiliación á Seguridade Social. “Este dato reflicte que o crecemento estase a consolidar”, rematou Toca.

PORTUGAL

AS VOSAS IMAXES

POR TERRAS DE MONÇAO

                                Foto: Santiago Baz Lomba

GALERÍA DE IMAXES

PORTUGAL

AS VOSAS IMAXES

TRILHOS DE SISTELO

                                Foto: Santiago Baz Lomba

GALERÍA DE IMAXES

A GUARDA

O ENTROIDO GUARDÉS: XENUINO SABOR GALEGO

Os restaurantes de A Guarda ofrecen o típico “Lacón con Grelos” para desfrutar do Entroido  

Arruaz, Brisamar, La Pizzicata, Marusía, O Cangrexal, Porto Guardés, The Celtic Harp, Xantar e Xeito ofertan do sábado 6 de febreiro ao martes 9 o menú por 15 euros por persoa  

Infogauda / A Guarda

 A gastronomía é parte fundamental do entroido galego, por iso, os restaurantes de A Guarda queren unirse á programación da vila ofertando o prato típico destas datas, o lacón con grelos, a prezos populares.  

 Dende o próximo sábado día 6 de febreiro e ata o martes día 9, ambos inclusive, os restaurantes Arruaz, Brisamar, La Pizzicata, Marusía, O Cangrexal, Porto Guardés, The Celtic Harp, Xantar e Xeito, propoñen un menú de entroido composto por un primeiro prato de caldo, un segundo de lacón con grelos e unha sobremesa na que se escollerá entre filloas ou orellas. 

 O prezo por persoa é de 15 euros, e está incluído viño e café.  

 Os veciños do municipio, e tamén os visitantes, poderán desfrutar deste menú nos nove restaurantes adheridos, tanto en horario de comida coma de cea.  

 Desta maneira a hostalería súmase a programación ofertada na vila na que combínase gastronomía, música, tradición, innovación, e por suposto, moita diversión. 

 O Concello de A Guarda anima a todos os seus veciños e tamén aos visitantes que se acheguen durante estas datas, a vivir o entroido guardés e a participar nas actividades programadas.

TUI

EDUCACIÓN E CONCELLO DE TUI ACORDAN FIRMAR UN CONVENIO DE COLABORACIÓN PARA MELLORAR VARIOS CENTROS DA LOCALIDADE  

A Consellería reformará a cuberta do CEIP de Rebordáns mentres o concello reasfaltará as pistas exteriores do colexio de Randulfe 

A maiores, ambas administracións traballarán xuntas para cambiar os falsos teitos de Rebordáns e os ventanais do CEIP Número 2  

O xefe territorial de Cultura e Educación, César Pérez Ares - primeiro pola dereita - reunuise esta mañá co tenente alcalde do concello de Tui, Miguel Ángel Capón Rey - primeiro pola esquerda - asinando un convenio de colaboración entre ambas administracións para mellorar diversos centros educativos de Tui

Infogauda / Pontevedra

 O xefe territorial de Cultura e Educación, César Pérez Ares, mantivo esta mañá unha reunión, na Delegación Territorial da Xunta en Pontevedra, co tenente alcalde do concello de Tui, Miguel Ángel Capón Rey, na que se acordou firma dun convenio de colaboración entre ambas administracións para mellorar diversos centros educativos da localidade.  

 No encontro estiveron tamén presentes responsables da Unidade Técnica da Xefatura Territorial de Educación, e o equipo directivo e a ANPA do CEIP Rebordáns.  

 Os responsables de ambas administración chegaron ao acordo de poñer en marcha varias medidas para mellorar diversos centros educativos de Tui, contando coa colaboración mutua.  

 Así, a Consellería de Educación interviría na cuberta do CEIP Rebordáns co obxectivo de mellorala ante as deficiencias que presenta, e tendo en conta o informe da Unidade Técnica ao respecto. “Trátase dunha obra que ten prioridade polo que a executaremos nos próximos meses”, explicou o xefe territorial.  

 Pola súa banda, o concello comprométese a executar o reasfaltado das pistas exteriores do colexio de Randulfe así como a redacción dun proxecto para facer viable o comedor do CEIP nº 2.  

 A maiores, ambas administracións colaborarán para poder levar a cabo as obras de reposición dos falsos teitos dos colexio de Rebordáns, así como as fiestras do Nº2, co obxectivo de mellorar a eficiencia enerxética deste centro educativo.

PONTEVEDRA

Os deputados populares visitaron esta mañá as instalacións e reuníronse cos traballadores  Ángel Moldes: “o Parque de Maquinarias é o reflexo da parálise que teñen a Deputación e a provincia con este goberno”  

• O deputado Luis Aragunde criticou que os concellos teñan que contratar empresas privadas cando as máquinas e o persoal están parados

• Denuncian que están deixando morrer un parque de maquinarias referente en Galicia, e que está valorado en máis de 5 millóns de euros

Os deputados populares Ángel Moldes e Luis Aragunde mantiveron unha reunión co persoal no Parque de Maquinaria da Deputación de Pontevedra

Infogauda / Pontevedra

 O Partido Popular denuncia o estado de paralización absoluta que sofre o Parque de Maquinaria da Deputación de Pontevedra, que desde o mes de agosto, no que se retiraron as máquinas dos concellos, non se volveron a mover do sitio. Ata as instalacións desprazáronse esta mañá os deputados populares Ángel Moldes e Luis Aragunde, que comprobaron como todas as máquinas do parque estaban aparcadas e os propios traballadores do servizo parados. Para o voceiro dos populares, “esta imaxe é o reflexo do que é realmente a nova Deputación de Pontevedra. O Parque de Maquinarias é un claro exemplo da parálise que teñen a institución e toda a provincia con este goberno”. 

Ángel Moldes e Luis Aragunde supervisando á maquinaria no Parque da Deputación de Pontevedra, en presenza do representante sindical de CCOO na Deputación, Jose Ramón Piñeiro

 Acompañados polos traballadores e polo representante sindical de CCOO na Deputación, Jose Ramón Piñeiro, os deputados fixeron un percorrido por todas as instalacións. Valoraron en máis de 5 millóns de euros toda a maquinaria que está parada, e que facían que o Parque de Maquinarias da Deputación de Pontevedra fora un referente en Galicia. Ademais, a planta de aglomerado, da que saían 1.000 toneladas diarias, tamén está parada, así como os aproximadamente 40 traballadores do servizo.  

ABANDONO AOS CONCELLOS 

 Os populares denunciaron a mala xestión do bipartito, que teñen en total abandono aos concellos mentres todas as máquinas e o persoal están parados. Non entenden que desaproveiten os recursos humanos e profesionais que hai no servizo.   

Os deputados populares Ángel Moldes e Luis Aragunde co representante sindical de CCOO na Deputación, Jose Ramón Piñeiro

 O deputado Luis Aragunde criticou que “os concellos se están endebedando, teñen que contratar empresas privadas para manter os viais municipais e provinciais cando a maquinaria e o persoal da Deputación están parados, sen funcións nin traballo, durante toda a mañá”. Recordou, ademais, que estas máquinas daban un servizo moi importante a todos  os concellos pequenos da provincia. 

 Pola súa parte, o representante sindical de CCOO na Deputación, Jose Ramón Piñeiro, agradeceu o interese amosado polo Partido Popular para buscar unha saída a “esta situación penosa”. Criticou que o novo bipartito está facendo unha política en contra dos intereses da cidadanía, xa que “o parque de maquinarias e os traballadores están parados cando hai necesidades que cubrir en todos os concellos”.   

 “Están deixando morrer isto para logo sacar rendemento ás empresas privadas. Fixeron unha trampa cos orzamentos deste ano, dan máis ou menos a mesma partida económica que o ano anterior, pero ao mesmo tempo restan capacidade operativa”, engadiu o sindicalista. “Polo tanto, nós queremos reclamar que o que ten que facer este goberno é poñerse a traballar canto antes para dar a viabilidade que ten o Parque de Maquinaria, e garantir que teña futuro que se debe, e non deixar morrer isto para logo meter eles as súas empresas privadas para logo sacarlle a rendibilidade”.   

TRASLADO DO PARQUE 

 Sobre a posibilidade de trasladar o parque de maquinaria, os populares foron contundentes. O popular Luis Aragunde considera que é unha posibilidade sempre e cando haxa un proxecto, prazos e orzamento para construír as novas instalacións. “Do que non estamos de acordo é do desmantelamento do parque de maquinarias e que o deixen morrer, que é o que están facendo. As máquinas estropéanse máis paradas que en uso. E outra cuestión que nos preocupa é que vai pasar cos traballadores”.  

MÁIS DE 5 MILLÓNS DE EUROS 

O voceiro dos populares valorou en máis de 5 millóns e euros toda a maquinaria do parque. Só o equipo completo de aglomerado, composto por unha estendedora e tres pisóns, ten un custe aproximado de 600.000 euros. A este hai que sumar o resto de maquinaria: 4 limpiapraias, 4 desbrozadoras, 4 niveladoras, 2 máquinas de cadeas, 2 pisóns, 2 cisternas de asfalto, un camión de bacheo, 1 retroescavadora, 3 palas mixtas, 6 camións, 1 camión góndola, 1 pala cargadora, unha cisterna de auga e un camión grúa. 

A GUARDA

A FORTALEZA DE SANTA CRUZ ACOLLERÁ O CENTRO DE INTERPRETACIÓN DAS FORTALEZAS TRANSFRONTEIRIZAS 

Rebeca Blanco Rotea: “(...) O concello de A Guarda encargounos a min e a o Instituto de Ciencias do Patrimonio (Incipit) do CSIC, o deseño e a elaboración dos contidos da exposición permanente que albergará o Centro de Interpretación do Forte de Santa Cruz (...)”

Rebeca Blanco Rotea desenvolvendo súa labor como especialista no sistema defensivo transfronteirizo

Ricardo Rodríguez Vicente / A Guarda

 Logo dos importantes investimentos feitos tanto pola Xunta de Galicia, como polo Ministerio de Fomento e o Concello de A Guarda, e das correspondentes demoras, todo indica que o Centro de Interpretación das Fortalezas Transfronteirizas, que estará ubicado na Fortaleza de Santa Cruz, no municipio de A Guarda, será unha realidade a curto prazo. Desta vai. Ou iso é, o que se prevé e que todos desexamos.

 Para coñecer máis sobor dos traballos máis inmediatos, falamos con Rebeca Blanco Rotea, licenciada en Xeografía e Historia pola Universidade de Santiago de Compostela, especialista en Arqueoloxía e Historia da Antigüidade, que destaca pola súa ampla labor investigadora desenvolvida nos últimos anos. Ela estivo presente na apertura o público da Fortaleza de Santa Cruz, e interviu como experta nas fortalezas miñotas. Asemade, por invitación do Concello de A Guarda ofreceu no The Celtic Harp, unha interesante conferencia titulada “O Castelo de Sta. Cruz na paisaxe fortificada transfronteiriza do Baixo Miño”.

 Rebeca Blanco Rotea, é sin lugar á dúbidas, unha autoridade en materia de fortalezas miñotas. Con ela - a quen lle agredecemos públicamente súa deferencia connosco - mantivemos á seguinte entrevista:
 Cómo vai o traballo previo á apertura do Centro de Interpretación das Fortalezas?
 - Actualmente o concello de A Guarda encargounos a min e a o Instituto de Ciencias do Patrimonio (Incipit) do CSIC, o deseño e a elaboración dos contidos da exposición permanente que albergará o Centro de Interpretación do Forte de Santa Cruz que, como sabes, ocupará un edificio rehabilitado no interior da fortificación. 

Cal é á previsión do contido dese centro e que se lle ofrecerá os visitantes?

 - A idea é dar a coñecer non soamente o propio castelo senón a relación deste co sistema defensivo transfronteirizo que durante a Guerra da Restauração Portuguesa (1640-1668) constrúese no territorio transfronteirizo miñoto, achegando aos veciños e veciñas e ao resto de visitantes, de forma divulgativa, o coñecemento acadado nas últimas décadas por diferentes investigadores e investigadoras sobre este fenómeno.  

Como será á distribución do inmoble que acollerá o Centro de Interpretación das Fortalezas?

- Inicialmente proxéctase adicar a planta baixa a espazo para talleres, sala de conferencias e exposicións temporais e un vídeo divulgativo sobre esta temática, mentres que a primeira planta centrarase na exposición permanente, na que se xogará coa luz.  

 A exposición terá un importante compoñente gráfico e un forte carácter divulgativo e xirará en torno a tres ideas que serán as que se desenvolvan nos paneis expositivos:  

1) O forte de Santa Cruz.  

2) O forte de Santa Cruz no seu entorno.  

3) A relación da fortaleza co sistema defensivo do Baixo Miño en época moderna.  

Cales son os obxectivos desa infraestructura cultural?

 - No primeiro dos fitos discursivos preténdese poñer en valor o forte facendo fincapé na súa evolución histórica, no seu pasado recente e na propia arquitectura defensiva e os aspectos construtivos máis relevantes deste tipo de fortificación.  

 O segundo, busca mostrar a relación da fortificación co seu entorno arqueolóxico, por unha banda, coa evolución dos sistemas defensivos que ao longo da historia materializáronse na vila da Guarda (Idade do Ferro, Idade Media e Idade Moderna), por outra banda, e, finalmente, co papel que desempeñou na defensa do territorio inmediato, que corresponde á desembocadura do río Miño e á fachada Atlántica.  

 O terceiro dos fitos discursivos pretende mostrar a relación deste conxunto defensivo e do propio forte co resto do sistema defensivo transfronteirizo que durante a Guerra da Restauração Portuguesa desenólvese no Baixo Miño / Vale do Minho, de maneira que podamos contribuír a converter o Forte de Santa Cruz nun polo de atración turística para todo o público interesado no fenómeno da fortificación de fronteira e en coñecer os diferentes elementos fortificados que consérvanse neste territorio.   

A GUARDA

O Concelleiro delegado de emerxencias de A Guarda, Miguel Ángel Español, mantivo unha reunión con responsables da CIG e do GES  

Infogauda / A Guarda

 Desde o executivo municipal veñen de informar que o concelleiro delegado de emerxencias do concello de A Guarda, Miguel Ángel Español Otero, mantivo una reunión co Secretario da unión local da CIG, Serafín Fernández Portela e con un membro do GES, que o mesmo tempo pertence o comité de empresa, co obxecto de informar aos responsables sindicais do estado en que se atopan diversas demandas realizadas polo comité de empresa ao equipo de goberno relacionadas con material para o servizo de emerxencias que presta o  GES así como, a dotación de distintos EPIs (Equipos de protección individuais) para a realización do seu traballo.  

 Con respecto ao material, o Concelleiro informou aos representantes sindicais que en breve lle será entregado ao Concello de A Guarda, por parte da Dirección Xeral de Emerxencias,  un novo equipo de excarceración para o GES así como varios equipos ERA (equipos de respiración autónoma). Este material, xunto con outro, había sido solicitado por parte do concello da Guarda á citada Dirección Xeral dentro do programa europeo ARIEM 112. 

 Con respecto aos EPIs trasladoulles que en poucos días se proporcionará a cada un dos membros do GES de un novo traxe de parque e diversas prendas de traballo, comprometéndose tamén a xestionar en un período de tempo razoable a adquisición duns novos equipos de comunicación.  

 A Guarda conta tamén dende fai pouco con un remolque para labores de Protección Civil e Emerxencias, un novo vehículo PIC UP e o próximo día 5 lle será entregada una nova embarcación Zodiac para labores de salvamento. 

A GUARDA

Inauguración da mostra “Auga Salgada” de Manuel Chapela  

Os óleos estarán expostos no Centro Cultural dende o 4 ata o 24 de febreiro 

Infogauda / A Guarda

 Este xoves, día 4 de febreiro, ás 19,30 horas, no Centro Cultural de A Guarda, inaugúrase a mostra “Auga Salgada” do pintor moañés Manuel Chapela. 

 Durante o mes de febreiro a Sala de Exposicións do Centro Cultural amosará unha mostra de vinte óleos con temática mariña. Ondas, rompentes, treboadas, barcos, chalanas, lembranzas do Atlántico e incluso Terras de Outono, conforman a proposta deste artista autodidacta. 

 As súas pinturas xa visitaron, con gran éxito, as principais salas de exposición de cidades coma Vigo, Pontevedra, Moaña, Marín, Tui e Cangas.   

 O horario de apertura da exposición será de luns a venres en horario de 10 a 13 horas e de 17 a 20 horas. Os sábados só en horario de mañá.