ECONOMÍA

A CIG rexeita por insuficiente a proposta de convenio de Autoestradas de Galicia  

Os tres sindicatos con representación na empresa convocarán asembleas de traballadores/as para valorar a oferta, nas que a central pedirá o non 

Protesta do persoal de Autoestradas de Galicia

Foto: CIG

Infogauda / Galiza

 Hoxe tivo lugar unha nova xuntanza da mesa negociadora do convenio colectivo de Autoestradas de Galicia na que a dirección achegou unha proposta que para a CIG segue a ser insuficiente aínda que mellora lixeiramente a anterior. En consecuencia, a central pedirá o voto en contra nas asembleas de traballadores/as que convocarán os tres sindicatos con representación na compañía. 

 Dende a CIG consideran que a oferta de Autoestradas de Galicia é “cativa” dende o punto de vista económico e lembran que a revisión salarial é imprescindíbel para garantir “un mínimo de dignidade” xa que as condicións actuais son “moi precarias”. Por iso rexeita a proposta e intentará que o cadro de persoal faga o mesmo nas asembleas. Pola contra, CCOO e UGT decidiron aceptar a oferta da empresa.  

 Precisamente para denunciar a precariedade que padecen e reclamar un convenio digno un grupo de empregados/as volveron mobilizarse convocados/as pola CIG o pasado domingo na Peaxe de Vincios, en Gondomar, onde despregaron varias faixas demandando a mellora das súas condicións e censurando a complicidade da Xunta co inmobilismo da dirección. 

 Dende a central sinalan que os salarios son moi baixos, o persoal desenvolve o seu traballo en quenda de día, tarde e noite e calquera día da semana. Tamén fan fincapé en que sofren un elevado nivel de estrés, dado o tráfico que circula pola autoestrada, ademais de ter que facer uso do seu coche particular. 

 Mentres, a empresa rexistra beneficios ano tras ano. “Trátase dunha compañía saneada que presta un servizo esencial para a mobilidade, pero as persoas traballadoras cada vez cobramos menos e temos unhas peores condicións laborais”. 

 A CIG critica que, malia isto, a Xunta de Galiza sempre mira para outro lado. “Nin están nin se lles espera a uns gobernantes que prefiren que as empresas gañen cartos a que o servizo sexa de calidade, xa que non pode prestarse un servizo de calidade con persoas traballadoras mal pagadas e en condicións precarias”.