FORMACIÓN

123 ALUMNOS DE 18 CENTROS DE F.P. DE PONTEVEDRA FARÁN PRÁCTICAS LABORAIS REMUNERADAS EN EUROPA GRACIAS AO PROXECTO DA DEPUTACIÓN PRACTICUM DEPO 2015

Durante 6 meses estes recén titulados en ciclos medios de F.P de Vigo, Pontevedra, Ponteareas, Vila de Cruces, Silleda, Salvaterra de Miño, Tomiño, Marín Sanxenxo e Moaña completarán a súa formación profesional en empresas e institucións europeas.

Infogauda / Pontevedra

O programa, denominado Practicum Depo 2015, está orientado a completar a formación dos xoves, a mellorar o seu dominio dos idiomas e a ampliar as súas posibilidades de inserción laboral, segundo explicou hoxe en rolda de prensa o presidente da Deputación, Rafael Louzán. Un proxecto para o que a Unión Europea lle concedeu ao organismo provincial 1 millón de euros.

123 alumnos de 18 centros da provincia

18 centros de FP da provincia se sumaron a este proxecto para enviar a Europa a un total de 123 alumnos que realizarán prácticas de 6 meses en empresas privadas ou organismos públicos de diferentes países europeos, preferentemente de fala inglesa. Os bolseiros estarán nos seus destinos en agosto ou setembro.

Os 18 centros son:

·       6 de Vigo: IES A Guía; Ricardo Mella; Centro de Artes Plásticas e Deseño Atlántico; Chapela; Politécnico; e Centro de Formación Divino Maestro.

·   3 de Pontevedra: Centro de Formación e Experimentación Agroforestal de Lourizán; IES A Xunqueira I; e IES Montecelo.

·    1 de Ponteareas (A Granxa); Vila de Cruces (IES Marco do Camballón);  Silleda (IES Pintor Colmeiro);  Salvaterra do Miño (IES Salvaterra de Miño); Cambados, IES Francisco Asorey; Tomiño,  IES de Tomiño; Marín: IES Chan do Monte; Sanxenxo, IES de Vilalonga; e Moaña, IES A Paralaia.

Rafael Louzán puxo de manifesto que a concesión deste programa por parte da UE  “é premio á Deputación polos antecedentes do organismo provincial a prol da inserción laboral. Seguimos avanzando na promoción do emprego e na mellora das oportunidades laborais para os mozos”.  Plans de emprego para parados; práctica Laboral para universitarios; ciclos superiores e persoas con discapacidade; e agora, titulados de ciclos medios para que poidan reforzar a súa formación, aproveitar o seu talento e ter un mellor futuro laboral.

Estas bolsas Erasmus+, concedidas polo Organismo Autónomo de Programas Educativos Europeos para o 2015, van destinadas a mozos e mozas recén titulados en ciclos medios de FP que  durante 6 meses realizarán prácticas remuneradas e de gran calidade. Estes mozos e mozas irán a países nos que hai mellores posibilidades de formación e práctica en cada unha das especialidades que oferten.