TUI

O PP DE TUI ACUSA AO ALCALDE DE EMPREGAR UN DISCURSO VITIMISTA PARA ESCONDER A SÚA INCAPACIDADE DE GOBERNAR EN MINORÍA 

 O voceiro municipal, Nico Montes, anuncia que os orzamentos van quedar aprobados dentro dun mes, xa que o PP nin vai presentar ningunha moción de censura, pero advirte de que “iso non lle vai server para sacar os temas adiante, xa que está abocado a negocialos para aprobalos no pleno” 

 “Se sempre se queda só, e máis fronte a grupos tan diferentes como PP e BNG, é que o problema é do alcalde, polo seu desprezo aos demais. Ten a credibilidade baixo mínimos xa que agora está preocupado por este mes de agarda cando leva dous anos sen facer nada”, manifestou 

Integrantes do Grupo Municipal do Partido Popular, no Concello de Tui

Infogauda / Tui

 O voceiro popular, Nico Montes, subliña que o alcalde “quedou só por mérito propio” e que os orzamentos, que quedarán aprobados automaticamente nun mes, non lle servirán para desbloquear o Concello se non cambia a súa actitude. 

 O Grupo Municipal do PP de Tui lamenta que o alcalde, Enrique Cabaleiro, recorra á escenificación do martirio político para tratar de desviar a atención do verdadeiro problema: a súa absoluta incapacidade para dialogar e chegar a acordos. A perda da confianza do pleno non é unha conspiración, senón o resultado directo dun estilo de goberno baseado na imposición e no illamento. 

 “O alcalde non perdeu a confianza porque a oposición lle teña manía. Perdeuna porque leva dous anos gobernando como quen intenta tocar un piano co puño pechado: sen finura, sen harmonía e sen capacidade para facer soar acordos”, manifestou o voceiro do PP, Nico Montes. 

 Desde o PP deixan claro que non van presentar ningunha moción de censura, pero que a aprobación automática dos orzamentos nun mes non significará estabilidade. “O alcalde poderá sacar adiante este documento pero se non cambia de actitude e non comeza a dialogar, seguirá atascado, sen capacidade para aprobar investimentos ou outros temas municipais”, advertiu Montes. 

 O grupo popular critica tamén a actitude do alcalde tras perder a cuestión de confianza, acusando falsamente á oposición de formar unha pinza PP-BNG. “É unha xustificación absurda e sen credibilidade. Somos partidos ideoloxicamente opostos. O que hai é un rexeitamento unánime á súa forma de gobernar, e iso é o que lle molesta”. 

 Montes engadiu que “se todos os grupos o deixan só, o problema non está nos demais, está en quen non quere falar con ninguén. O alcalde di unha cousa e fai outra. Cambia o discurso segundo lle convén, como un funambulista que tenta manterse en pé a base de xiros. Pero os feitos non encaixan coas súas palabras, e a cidadanía xa o percibe”. 

 Sobre o malestar do rexedor co prazo dun mes para a aprobación dos orzamentos, o PP ironiza: “Agora preocúpalle o tempo, cando perdeu dous anos enteiros sen gobernar. Se estivese tan preocupado pola xestión como o está agora pola súa imaxe, outra sería a situación do Concello”. 

 O voceiro popular concluíu cunha mensaxe clara: “A confianza non se impón, gáñase. E o alcalde non a ten. Nin da maioría da corporación, nin da maioría da veciñanza. Se non está disposto a cambiar de actitude, deberá asumir que o seu ciclo político está chegando á súa fin”.