PONTEVEDRA

PRETO DE 500 ASOCIACIÓNS PARTICIPARÁN ESTE ANO NOS PROGRAMAS PENSA EN TI E TI TAMÉN CONTAS

A Deputación adxudicou a organización de actividades formativas e culturais dirixidas a asociacións e colectivos de toda a provincia

Unhas 500 asociacións de toda a provincia participarán este ano nos programas Pensa en Ti e Ti tamén contas, cos que a Deputación provincial de Pontevedra quere apoiar e revitalizar a labor dos colectivos sociais existentes nos distintos concellos da provincia, ao tempo que contribúe á mellora da calidade de vida dos maiores e a promover a igualdade entre homes e mulleres.

A Xunta de Goberno acordou hoxe a adxudicación dos cursos que se desenvolverán ao abeiro destes programas ás empresas Estratexia Plus S.L e Formagal, Formación e Servicios SL, cunha achega global da Deputación de 513.000 euros.

Estratexia Plus encargarase da organización das actividades do programa Ti tamén contas, ao que a Deputación destinará 129.600 euros e que vai dirixido especialmente a entidades que traballan con persoas maiores.

O obxectivo deste programa é o fomento de actitudes positivas para o desenvolvemento do maior no seu entorno social e familiar, evitando procesos depresivos, illamento, e lograr a participación e cooperación social.

Trátase dunha actividade que conta cun notable éxito e no que cada ano se incrementa o número de participantes, que pasou das 30 asociacións en 2005 ás 114 de 2011. A previsión para este ano é que sexan en torno aos 138 colectivos os que se beneficien destas actividades, que abarcarán as áreas de Desenvolvemento persoal e saúde; Arte e manualidades; Cultura tradicional; Informática; Área Informativa e Área de discapacidade.

Máis de 7.000 persoas no programa Pensa en Ti

En canto ao programa Pensa en Ti, unhas 7.200 persoas, a través de 358 asociacións, participarán este ano no programa, ao que a Administración Provincial destinará unha achega total de 383.400 euros.

O obxectivo central deste programa é fomentar a participación e cooperación social e promover a igualdade entre homes e mulleres.

A empresa Estretexia Plus xestionará as actividades nas comarcas do Condado-Paradanta, Pontevedra, Caldas, Baixo Miño e na área sur de Vigo; mentres que Formagal, Formación e Servicios o fará nas zonas de Vigo Norte e Centro e nas comarcas de O Morrazo,  Tabeirós, Deza e o Salnés.

Este ano, como novidade e coa intención de implicar aos homes no traballo a prol da igualdade e da promoción da muller, establécese unha reserva do 20% das prazas para os homes.

En total poderanse organizar cursos de 130 especialidades diferentes, agrupados nas áreas de desenvolvemento persoal e saúde física e mental; desenvolvemento profesional (con especialidades de novas tecnoloxías, idiomas, servizos na empresa e servizos ás persoas); formación para a igualdade entre homes e mulleres; cultura tradicional, música e baile; manualidades, arte e bricolaxe; e cociña, agricultura e elaboracións artesanais.

Tanto no caso de Pensa en Ti como en Ti tamén contas, este ano e dada a situación de especial dificultade económica, establécese o cofinanciamento das actividades, de forma que os participantes nos cursos que se organicen terán que contribuír con 6 euros.