MAR

Orpagu reúne na Guarda a produtores e grandes grupos do sector para falar de comercialización  

• A Organización de Palangreiros Guardeses celebrará este venres, 17 de xullo, a duodécima edición das súas Xornadas Internacionais de Pesca sobre Grandes Migradores, esta vez centradas na comercialización 

•  Haberá dúas mesas redondas e un relatorio do Ministerio de Agricultura, Pesca e Alimentación sobre o consumo de peixe nos fogares. A cita péchase cunha degustación de produtos  

Mar Bermúdez/A Guarda

 A Guarda acollerá este venres 17 de xullo a duodécima edición das Xornadas Internacionais de Pesca sobre Grandes Migradores. Organízaas ORPAGU, no propio Concello. O título non deixa lugar a dúbidas: «Experiencias de comercialización desde o sector pesqueiro». A idea é sentar na mesma sala a organizacións de produtores, cooperativas e grupos empresariais de dentro e fóra de Galicia para ver como chega hoxe o peixe ao mercado e que fórmulas están a dar resultado. 

 A xornada arrincará ás 9.30 horas. Inaugurarán Joaquín Cadilla Castro, presidente de ORPAGU, e Roberto José Álvarez Carrero, alcalde da Guarda. 

 Ás 10.00 chegará a primeira mesa redonda, sobre fórmulas de éxito na integración vertical. Intervirán Ruy Andrade Pereira, director de Marketing e Desenvolvemento de Negocio do Grupo Pereira-Portomar; Laia Ortiz Radua, responsable de Marketing do Grupo Balfegó; e Alejandro Castro Ferreño, técnico en Sustentabilidade do Grupo Profand. 

 Ás 11.00 tomará a palabra Patricia Pertejo Alonso, xefa de Área de Análise de Consumo da Subdirección Xeral de Promoción dos Alimentos de España. Presentará os datos preliminares de 2025 sobre o consumo de peixe nos fogares, o espazo de datos común do ámbito agroalimentario e o Plan Internacional da Gastronomía Española. 

 Despois do café, ás 12.30, a segunda mesa redonda entrará nas experiencias de comercialización directa de produtores. Sentaranse á mesa Eduardo Míguez López, director xeneral adxunto de Porto Celeiro (OPP77); Cristina Mañas Mañas, xerente da Organización de Produtores da Pesca de Palamós (OPP91); José Luis Monteagudo Doval, xerente da Cooperativa de Produtores Mexilloeiros de Cabo de Cruz (Asmecruz); María José Casais Boo, xerente da Cooperativa Santa Uxía de Ribeira (OPP83); e Luis Santos Martínez, director técnico da Cooperativa Ría de Arousa. 

 O peche, ás 14.30, correrá a cargo de Juana Parada Guinaldo, xerente de ORPAGU, coas conclusións da xornada. E para terminar, degustación de produtos. 

 As xornadas están cofinanciadas polo Ministerio de Agricultura, Pesca e Alimentación (MAPA) e o fondo Europeo Marítimo, de Pesca e de Acuicultura (FEMPA), dentro do plan de produción e comercialización de 2026 da OPP49.