O PORRIÑO

O PSOE PROPÓN MODIFICAR A SUBIR IMPOSTOS A BANCOS E EMPRESAS CON MAIS DE CATRO VIVENDAS BALEIRAS

A moción propón aplicar un recargo de ata o 150% sobre o IBI a fondos voitre con máis de catro vivendas que se manteñan baleiras durante máis de tres  anos

Foto: G.M.S.

Infogauda / O Porriño

 O Grupo Municipal Socialista de O Porriño presentou unha moción no pleno do Concello para modificar a ordenanza fiscal do IBI co obxectivo de aplicar un recargo ás vivendas desocupadas en mans de grandes propietarios. A moción busca poñer fin á práctica especulativa de bancos e sociedades mercantís que manteñen miles de vivendas baleiras, excluíndoas do mercado de alugueiro e provocando unha escalada nos prezos que fai que moitas familias traballadoras, especialmente mozos e maiores, non poidan acceder a unha vivenda digna.  

 David Alonso, voceiro do Grupo Municipal Socialista, destacou: “É inaceptable que haxa máis de 1.400 vivendas baleiras en O Porriño mentres moitos mozos e persoas maiores pagan máis da metade dos seus salarios só por unha habitación. 

 A moción que presentamos busca poñer fin a esta situación e garantir que os grandes tenedores non se beneficien da desesperación das familias. Necesitamos actualizar a ordenanza fiscal para adaptala á nova Lei de Vivenda e combater a especulación”.  

 A moción propón aplicar un recargo de ata o 150% sobre o IBI a fondos voitre con máis de catro vivendas que se manteñan baleiras durante máis de tres  anos. Esta medida, que xa está recollida na lexislación estatal, permitiría que os grandes propietarios se vexan incentivados a poñer as vivendas no mercado de alugueiro e facilitar o acceso á vivenda para as familias que máis o necesitan.  

 “O noso obxectivo é garantir que as persoas teñan acceso a vivendas asequibles. Non podemos permitir que a especulación inmobiliaria siga privando á nosa xente da posibilidade de vivir en O Porriño”, engadiu Alonso.

Máis de 1.400 vivendas baleiras no concello do Porriño

 David Alonso tamén engadiu que “a proposta ten un obxectivo claro: combater a especulación inmobiliaria e mobilizar as máis de 1.400 vivendas baleiras que existen no noso municipio, aplicando un recargo progresivo ás sociedades mercantís que manteñen inmobles desocupados durante anos sen causa xustificada.  

 A medida está baseada na reforma legal do artigo 72.4 da Lei de Facendas Locais, e segue o criterio de xustiza fiscal: que quen acapara vivendas sen usalas contribúa a aliviar a crise de acceso á vivenda que afecta a moita xente nova, maiores e familias traballadoras”.