VIGO

O subdelegado do Goberno visitou hoxe a Dirección Provincial en Vigo 

Abel Losada inaugura o primeiro punto violeta do SEPE na provincia e reivindica a igualdade laboral na loita contra a violencia machista  

• Destaca o acerto de situar os puntos de información nas 17 sucursais que o Servizo Público de Emprego Estatal (SEPE) ten na provincia  

• Segundo os datos do Ministerio de Interior, preto de 1.450 mulleres na provincia son vítimas de violencia de xénero 

O primeiro punto violeta nas oficinas do SEPE quedou instalado na entrada da Dirección Provincial e na porta do despacho da directora, Teresa Rama. Ao acto asistiron tamén Josefa Gómez, subdirectora de Xestión Económica e César González, subdirector de Prestacións, ademais da secretaria xeral da Subdelegación do Goberno, María Isabel Alonso

Fotos: S. de G.

Infogauda / Vigo  

 O subdelegado do Goberno en Pontevedra, Abel Losada, inaugurou esta mañá na oficina da Dirección Provincial do Servicio Público de Emprego Estatal (SEPE) en Vigo o primeiro punto violeta da provincia. Esta iniciativa, á que se adherirán as 17 oficinas que o SEPE ten repartidas por toda a provincia, servirá para ofrecer lugares seguros ás mulleres vítimas de agresións machistas. 

 Abel Losada valorou a importancia desta iniciativa, que afianza “o cambio de enfoque nas políticas públicas de atención ás vítimas impulsado polo Goberno de Pedro Sánchez e que pretende involucrar dun xeito efectivo a todas as Administracións Públicas, e a toda a sociedade, na loita contra a violencia de xénero”. Neste sentido, o subdelegado resaltou que desde hoxe as oficinas do SEPE na provincia serán un “lugar seguro e de apoio” para todas as mulleres que sofren calquera expresión de violencia de xénero. O primeiro punto violeta nas oficinas do SEPE quedou instalado na entrada da Dirección Provincial e na porta do despacho da directora, Teresa Rama. Ao acto asistiron tamén Josefa Gómez, subdirectora de Xestión Económica e César González, subdirector de Prestacións, ademais da secretaria xeral da Subdelegación do Goberno, María Isabel Alonso. 

 Losada destacou que na actualidade preto de 1.450 mulleres de Pontevedra están no sistema de protección e seguimento contra a violencia de xénero do Ministerio do Interior. Unhas cifras que precisan, incidiu, “dun compromiso firme do conxunto das Administracións, e de toda a sociedade, para facerlles fronte”, e que se relacionan, con outras coma as da brecha salarial ou a exclusión económica, que a miúdo son factores de risco que contribúen a aumentar a vulnerabilidade das vítimas.  

 Fíxoo nun día no que se dan a coñecer os datos de emprego da provincia, que rexistra unha redución interanual de 5.555 persoas no paro rexistrado. Unha baixada superior á media galega e estatal e correlacionada cos datos de afiliación á Seguridade social, que acada ás 370.000 persoas afiliadas, o que supón 6.300 persoas máis que no mesmo período de 2023. O subdelegado mostrouse optimista, pero non quixo esquecerse das “50.440 persoas que continúan en situación de desemprego na nosa provincia, das cales máis da metade -o 58%- son mulleres”. O subdelegado reivindicou a importancia do emprego digno e da loita contra a fenda salarial como ferramentas útiles para combater a violencia de xénero e a desigualdade. 

 Losada explicou que a creación destes Puntos Violeta nas oficinas do SEPE, é un acerto porque as oficinas de emprego son un bo lugar para achegar ás mulleres que poidan estar nunha situación vulnerable a información que precisan sobre os recursos do Estado e apoio dispoñible. A este respecto cóntase cunhas guías informativas. Ademais, haberá unha formación para os directores e directoras das oficinas, de xeito que queden convertidos en expertos de referencia aos que acudir ante un caso de violencia.  

 Cada un dos puntos colocados nas oficinas da provincia estará identificado como tal e contará cun código QR que estará vinculado á Guía Punto violeta, con información sobre como actuar ante casos de agresións, recursos para as vítimas e información de interese para saber identificar actitudes machistas e poñerlles freo. Estes recursos forman parte do catálogo de medidas urxentes impulsado por distintos ministerios no contexto de alarma machista dos últimos meses.  

 Coa posta en marcha desta iniciativa, a Subdelegación do Goberno inicia os actos con motivo do 8M, que terán continuidade con outras accións, como o despregamento dunha pancarta na fachada da Subdelegación en Pontevedra, así como unha xornada de formación para actuar ante situacións de violencia contra mulleres estranxeiras e a lectura da declaración institucional co gallo do Día Internacional das Mulleres o propio venres, día 8.