TUI

Aprazado para o sábado 6 e domingo 7 o III Encontro de Viños da Raia 

• Mantéñense para esta fin de semana as actividades paralelas previstas no edificio da praza da Inmaculada

Infogauda / Tui

 Debido á adversa previsión do tempo para  a fin de semana o III Encontro de Viños da Raia que se ía celebrar esta fin de semana, sábado 30 e domingo 31 de marzo, na praza da Inmaculada aprázase para o sábado 6 e o domingo 7 de abril.  

 Mantéñense para esta fin de semana as actividades paralelas previstas no edificio da praza da Inmaculada. Será este sábado ás 19 h o I Concurso de Cata, o domingo ás 12 a demostración de cociñado a cargo de Inma López, do Restaurante Beldade e ás 19 h a cata comentada. Estas tres actividades teñen as prazas limitadas, restando xa as últimas dispoñibles. É preciso inscribirse de forma gratuíta, na Oficina de Turismo, ben persoalmente no Paseo da Corredoira, no correo turismo@tui.gal ou no teléfono 677 41 84 05.  

 Xa a próxima fin de semana, sábado 6 e domingo 7  de 12 a 16.30 h e de 20 a 23h  III Encontro de Viños da Raia reunirá na praza da Inmaculada ás adegas Corisca, Jorge Marcote, Pateira, María Bargiela, Sergio Álvarez, D’ricón, Do Vimbio, Marcio López, Edmun do Val e Xesteiro que presentarán os seus viños brancos, tintos e espumosos. O prezo será dende 2,5€ a copa. A gastronomía estará presente da man de Almacén Urbano e de Emma Tapa&Brunch que ofertarán tapas de xamón, queixo, croquetas, empanada de pan de millo e unhas tapas/degustación de meixón, e coma sobremesa rosca de Pascua e tarta San Telmo.