O ROSAL

O Rosal mellora o firme en case 12.000 m2 de camiños  

• O Concello investiu 140.000 euros na reparación de infraestruturas que sufriran importantes danos tras as recorrentes inundacións    

Ánxela Fernández Callís, alcaldesa do Rosal, con Germán Fernández Rodríguez, concelleiro de Vías e Obras, nun dos lugares de recente intervención

Foto: C.O.R.

Infogauda / O Rosal   

 O Concello do Rosal segue dando pasos no seu programa de intervencións nos camiños rurais co remate de novas obras de mellora en diferentes infraestruturas que sufriran importantes danos tras as recorrentes inundacións do pasado inverno. Unhas obras que, como explica a alcaldesa, Ánxela Fernández Callís, buscaban “mellorar a realidade e aumentar a comodidade e seguridade viaria en tres camiños nos que as fortes choivas ocasionaron importantes estragos ao tempo que realizamos novos labores de mantemento, como a renovación do pavimento, deteriorado nalgunhas zonas”. 

 Nesta ocasión, o Concello reparou case 12.000 metros cadrados nos camiños de Canas e Morraceira e nunha parte da Estrada de Couselo, dende o cruce entre o camiño Barriños e o camiño Couselo de Abaixo ata o camiño Vilariños, en Fornelos. Os traballos supuxeron un investimento de 140.000 euros financiados a través dunha subvención da Deputación de Pontevedra para a reparación de danos causados polas intensas choivas de decembro de 2022, que causaron grandes danos en bens, equipamentos, infraestruturas e instalacións municipais.  

 A través destes traballos procedeuse a reparar as zonas que presentaban deterioro e que podían afectar á seguridade da circulación do tráfico rodado, renovando a superficie da calzada e mellorando as súas características funcionais, así como a súa durabilidade.