A GUARDA

A AGRUPACIÓN MUSICA DE A GUARDA CELEBROU UN MAGNÍFICO CONCERTO DE SANTA ICÍA

• Na igrexa parroquial de Santa María de A Guarda

A Banda de Música da Agrupación Musical de A Guarda no Concerto de Santa Icía

Fotos: Eduardo Rodríguez Pereira

Ricardo Rodríguez Vicente / A Guarda

  En tempo de advento, como limiar dun novo nadal, a Agrupación Musical de A Guarda vén de celebrar o Concerto de Santa Icía, padroeira dos músicos. 

 O evento, que tivo lugar na tarde do sábado día 3 de decembro, na igrexa parroquial de Santa María de A Guarda, foi presentado por David Álvarez Martínez, compoñente e presidente da Agrupación Musical de A Guarda. Nun momento das súas intervencións, agradeceu a colaboración do párroco actual Juan José González Estévez, que acolleu con agarimo a proposta do concerto, así como ao párroco precedente Jesús García Villadóniga, que sempre apoiou a Agrupación Musical de A Guarda.

 David Álvarez comentou que por causa da pandemia o concerto de 2020 non puido celebrarse, e en 2021, debido as esas circunstancias e de acordo coas indicacións da Federación Galega de Bandas de Música, e por motivos de aforo, fíxose no salón principal do Recreo Artístico Guardés.

 O presidente da Agrupación Musical de A Guarda tamén exhortou a que ás persoas as cales lles guste á música, se acheguen a esa entidade cultural, cuxas portas están abertas para todas/os.

 No que respecta ao concerto voltou a ser, como xa dixemos anteriormente, no templo parroquial, onde membros da xunta directiva tiveron o detalle de distribuír os correspondentes programas de man, dándolle ao concerto a importancia que leva de xeito implícito.

O Grupo de Iniciación da Agrupación Musical de A Guarda, nos momentos previos ao comezo da súa actuación

 A sesión musical comezou coa actuación do Grupo de Iniciación, que dirixido polo profesor José Antonio Soutelo Muñoz, interpretou as seguintes obras:

• A thousand years, de Christina Perri.

• John Williams in Concert, de P. Lavender.

• Supertramp, de Supertramp.

• La vila es bella, de N. Piovani.

• Coldplay classics, de Coldplay.

• The typewriter, de L. Anderson.

                         Solista: Mario Vicente Baz.

 A continuación fixo súa entrada a Banda de Música da Agrupación Musical de A Guarda. Previamente a súa actuación tivo lugar o acto de benvida a Irene Verde Vicente (trombón), a cal lle foi imposta a insignia de prata da Agrupación Musical de A Guarda.

 Irene Verde Vicente recibiu a insignia de prata da Agrupación Musical de A Guarda 

 Seguidamente, baixo a dirección do profesor Víctor Luis Alonso Treinta, a Banda de Música da Agrupación Musical de A Guarda, interpretou:

• Las arenas (pasodobre), de Manuel Morales.

• Os pássaros do Brasil, de Kees Vink.

 - Os pássaros coloridos.

 - Pomba triste.

• The Blues Factory, de Jacob de Haan.

• Ponteareas (pasodobre galego), de Reveriano Soutullo.

• El Danubio Azul (valses), de Johann Strauss (fillo).

 Fora de programa, e como agradecemento as calorosas e merecidas ovacións do respectable público, a banda de música ofreceu a Marcha Radetzky, de Johann Strauss (pai), que foi acompañada nos momentos oportunos polos asistentes, batendo as palmas, que como indicou previamente o director Víctor Luis Alonso Treinta, nos evocan o Concerto de Ano Novo que cada día 1 de xaneiro ofrece a Orquestra Filarmónica de Viena, na Sala Grande ou Sala Dourada de la Musikverein de Viena.

 En calquer caso, queremos salientar que o magnífico Concerto de Santa Icía, que nos ofreceron o Grupo de Iniciación e a Banda de Música da Agrupación Musical de A Guarda foi un fermoso xeito de comezar con ledicia o tempo previo as celebracións do nadal na nosa vila.