GENARO ALONSO MARTÍNEZ CONVÍDANOS A VISITAR SEU BELÉN
• Pódese contemplar - en horario de atención ao público - na planta baixa do Concello de A Guarda
Ricardo Rodríguez Vicente / A Guarda
O artista Genaro Alonso Martínez (O Rosal,
1960), veciño do Coruto (Salcidos), A Guarda, onde ten seu fogar familiar, é
unha persoa traballadora que ademáis posúe un destacado maxín creativo. Teno
demostrado - por certo, sen ningún indicio de presunción - en diversas
oportunidades, tanto en mostras de artesanía, como en exposicións artísticas,
xa sexa de xeito individual, como cos membros do colectivo Somosarte,
realizadas por diversas localidades da nosa provincia. Dese xeito, en máis
dunha ocasión puidemos achegarnos as súas obras e comprobar como partindo de
materiais que en moitos casos xa cumpliron á función para os cales foron manufacturados
no seu día, Genaro Alonso, acólleos e reutilízaos do mellor xeito, dándolles
unhas novas utilidades. E faino cunha creatividade e cunha técnica, dignas de todo eloxio polo bo
gusto que amosa en cada unha das obras que realiza.
Se ademáis, temos en conta que os devanditos materiais poden ser cadeas de
bicicleta, culleres, embobinados, engrenaxes, garfos,
parafusos, palieres, piñóns, porcas,..., fabricados en materiais como
o aceiro, de características e tipos heteroxéneos,..., daquela a afección de
Genaro xa conleva determinadas complexidades técnicas, sobor de todo no que
respecta a seu mecanizado e soldado. Todo iso semella non ter complicación para
este artista, polo menos de xeito aparente, pois as súas creacións preséntaas de
xeito impecable. Outra cousa é, o proceso previo que tivo que afrontar para
chegar a lograr ese dominio dos materiais, que por certo, el non dubida en
explicar a quen teña curiosidade para sabelo. Tal é súa bonhomía, que non pon
ningún reparo en informar como chegou ao fermoso resultado final.
Ten mérito, moito mérito, todo o que Genaro Alonso vén
facendo no seu tempo de lecer. E teno ademáis, porque súas obras - ademáis de
levar de xeito implícito as tres R (reducir, reciclar e reutilizar) - son cada
vez máis apreciadas. Un exemplo do que decimos é o belén que neste Nadal
podemos visitar no planta baixa do Concello de A Guarda.
O belén que presenta Genaro
Alonso, reflicte en síntese o relato das diferentes esceas relacionadas co
nacemento de Xesús (portal, adoración dos reis Magos,...), desde unha
inspiración artística xenuinamente autóctona galega, onde están representados
varios oficios tradicionais (arrieiros, carpinteiros, ferreiros, labregos,
pastores,…); e ten - ademáis do peso específico que achega cada un dos
materiais, entre eles o chumbo -, a beleza da arte feita con elementos de
refugallo. Todo iso, combinado coa personalidade do autor - que acertadamente
se autodenomina escultor de reciclaxe - ofrecendo como resultado final un belén
do máis requintado que calquera que non coñeza á obra e a traxectoria deste
creador, puidera imaxinar.
Con certeza que san Francisco de Asís, impulsor da tradición
belenista, quedaría gratamente
marabillado polo nacemento - verdadeira obra de arte - que Genaro Alonso
Martínez deseñou, realizou e agora preséntanos como unha agarimosa e artística
nadaliña, para que á veciñanza de A Guarda e súa contorna, poidamos gozar nestas
datas coa súa contemplación.
.jpeg)
Ningún comentario:
Publicar un comentario