As farmacias amplían a súa colaboración coa Consellería de Sanidade na loita contra a pandemia
OS FARMACÉUTICOS PROCESAN TEST DE AUTODIAGNÓSTICO COVID-19 E COMUNICAN O RESULTADO
· O Programa do Servizo Galego de Saúde inclúe a persoas de entre 13 e 35 anos que non teñan a pauta completa de vacinación
· O test de autodiagnóstico realízase na farmacia e o documento co resultado negativo é válido en Galicia para interior de hostalería e lugares de lecer
· 732 profesionais farmacéuticos de 276 farmacias de Pontevedra participan no Programa
Infogauda / Pontevedra
A Consellería de Sanidade puxo en marcha, en colaboración cos catro colexios de farmacéuticos de Galicia, o “Protocolo para a realización de autotest rápidos para detección de COVID-19 en farmacia comunitaria”.
Adheríronse ao Programa 276 farmacias, o 63,2% das farmacias da provincia de Pontevedra, e participan nel 732 profesionais farmacéuticos.
Desde o xoves 29 de xullo as persoas de idades comprendidas entre 13 e 35 anos que non teñan a pauta completa de vacinación e teñan prestación farmacéutica do Servizo Galego de Saúde poden acudir a unha das farmacias adheridas ao programa para realizar un test de autodiagnóstico e recibir un documento que acredite o resultado da proba. Estas persoas teñen dispoñibles ata un máximo de catro probas.
Trátase dun paso máis na colaboración entre estas institucións na loita contra a pandemia, na cal os farmacéuticos están a ter un papel relevante e as farmacias están a demostrar o potencial que lles dan a súa capilaridade e accesibilidade para a realización de cribados aos cidadáns.
O procedemento consiste en que o cidadán incluído na poboación diana acode a unha das farmacias participantes e solicita a dispensación dun test de autodiagnóstico. O farmacéutico comproba se a persoa está incluída no Programa e se ten dispoñible algunha das catro probas que, como máximo, ten dereito a realizar. No caso de que sexa así, a persoa debe asinar o consentimento informado – se é menor de 16 anos serán os seus pais ou titor legal quen o firme- e o farmacéutico indícalle como realizar a toma de mostra, que realiza a propia persoa nunha zona habilitada na farmacia baixo a supervisión do farmacéutico. O farmacéutico procesa a mostra, comunica o resultado ao Servizo Galego de Saúde a través de Rexel e facilita ao cidadán un documento co resultado.
No caso de que o resultado sexa positivo poñerase en funcionamento o protocolo previsto polo Servizo Galego de Saúde, e o farmacéutico indicará ao cidadán que se ille no seu domicilio e espere a que se poñan en contacto con el.
Se o resultado é negativo, o documento que o farmacéutico entrega ao cidadán é admisible en restauración, hostalería e locais de lecer de Galicia.
O Colexio de Farmacéuticos de Pontevedra puxo en marcha unha aplicación web para facilitar aos cidadáns a xestión da cita para realizar o test de antígenos nas farmacias da provincia de Pontevedra. Accedendo a citafarmacia. cofpo. org os cidadáns poden pedir cita por internet para a farmacia que elixan dentro o horario e a dispoñibilidade que teña dita farmacia. A persoa deberá acudir á farmacia que elixiu o día e hora da cita co seu DNI e portando unha máscara.
Ampliación do Programa
A Consellería de Sanidade e os catro colexios de farmacéuticos de Galicia acordaron hoxe que calquera persoa que se atope no territorio da Comunidade Autónoma de Galicia e estea capacitada para realizar a autorecogida da súa mostra poida acollerse á posibilidade de realización de probas de autotest para a detección de Covid-19 nas farmacias adheridas.
A presidenta do Colexio de Farmacéuticos de Pontevedra, Alba Soutelo, agradeceu o labor e o esforzo dos farmacéuticos que están a colaborar nas iniciativas contra a pandemia. “Os farmacéuticos sempre estamos dispostos a colaborar e teño que agradecer aos farmacéuticos pontevedreses, non só a súa implicación, senón a rapidez coa que adaptan as farmacias a todos estes programas que, ademais de axudar a conter a expansión do virus, facilitan a vida dos cidadáns nesta situación de crise sanitaria” e concluíu “732 profesionais farmacéuticos de Pontevedra ofrecéronse voluntariamente para participar neste programa de test de antígenos, o que pon de manifesto a gran implicación dos farmacéuticos, máxime cando as farmacias están a colapsarse coa emisión dos certificados de vacinación.”
Ningún comentario:
Publicar un comentario