Sector e administracións auguran unha baixa execución do Fondo Europeo Marítimo Pesqueiro (FEMPA) “polas súas limitacións e falta de realismo”
• O novo instrumento financeiro da UE, a ciencia colaborativa e o peso da opinión pública na toma de decisións centraron a sétima edición das Xornadas Internacionais de Pesca organizadas por Orpagu no Concello de A Guarda.
Mar Bermúdez / A Guarda
“Tanto o sector como as administracións coincidimos en que, por desgraza, as condicións e limitacións do FEMPA van seguir provocando unha baixa execución do fondo. A pesar diso, en Orpagu apostamos polo futuro desta pesqueira e aproveitaremos o pouquiño que nos deixen para seguir mellorando naqueles aspectos que sexa posible”. Desta forma resumiu a directora xerente de Orpagu, Juana Parada, a sétima edición das Xornadas Internacionais de Pesca organizadas polos armadores do palangre no Concello de A Guarda. Unha cita, presencial e en liña, na que tamén tivo un peso importante o concepto de “ciencia colaborativa” e a necesidade de poñer en valor os esforzos do sector “fronte ás fake news de orixe descoñecida que poden inclinar a toma de decisións das organizacións rexionais de pesca”. Nesta liña, Parada destacou que “a incursión da opinión pública nos foros de decisión obríganos a reforzar a colaboración de sector, comercializadores e científicos para contrarrestar as informacións falsas que tanto dano están a facernos”.
Tamén subliñou a xerente de Orpagu, do mesmo xeito que fixeron nas súas intervencións o representante da Secretaría General de Pesca e a da Consellería do Mar, en que a máxima que difundiu a UE de que todo o que non está expresamente prohibido é susceptible de subvención “é unha mensaxe moi atractiva, pero non se axusta á realidade”. En canto ás achegas que recibiu o Ministerio de Agricultura Pesca y Alimentación para a redacción dos criterios que deben rexer o FEMPA, Parada sinalou a preocupación que suscita en todos os presentes a ascendencia do Ministerio de Transición Ecológica: “Pálpase a súa influencia en cada páxina”, dixo.
Fondos Next Generation para observadores electrónicos
Por outra banda, e no que se refire ás tres liñas de axudas dos Next Generation ás que pode acceder o sector pesqueiro, destacou a vinculada á dixitalización da frota: “Publicarase o próximo mes de setembro e pode ser moi interesante en canto á observación electrónica e á mellora dos sistemas de comunicación nos barcos”.
Con todo, a directora xerente de Orpagu insistiu na dificultade que ten o sector en acceder ás axudas europeas: “Por exemplo, os investimentos a bordo si, pero non aumentando a capacidade pesqueira e establecendo unhas limitacións que fan case imposible o seu cumprimento e, por tanto, o poder acceder a elas”. Por todo iso, lamentou que o FEMPA sexa unha oportunidade contida “por unha banda, por esa influencia do Ministerio de Transición Ecológica e, por outro, polos seus requisitos. Aínda que, insisto, debemos aproveitar ao máximo todo o que se nos ofreza”.
Un vídeo de tres minutos fronte a 10 anos de datos científicos
No que respecta ao primeiro bloque das xornadas, Juana Parada destacou a intervención do científico do IEO Jaime Mejuto, “o maior experto na pesqueira de quenllas”, e a importancia, cada vez maior, do “enfoque ético” nas medidas de xestión que se están adoptando sobre estas capturas.
Tamén resaltou a xerente de Orpagu a necesidade de traballar máis na fase científica colaborativa porque “será máis difícil tomar decisións puramente políticas se hai unha robusta base científica que indique o contrario”. Neste sentido, incidiu na importancia de seguir colaborando cos investigadores e de difundir o que está a facer o sector en temas como sustentabilidade e boas prácticas.
“A opinión pública está a incidir tanto nas medidas de xestión que creo que é importantísimo que nos poñamos as pilas nese sentido”, subliñou, porque non é normal que “nun foro importantísimo teña máis importancia un vídeo de 30 segundo do que se descoñecía a súa orixe que un traballo rigoroso con datos científicos de 10 anos”. Para Juana Parada, “isto dános unha idea de como están as cousas e a necesidade que temos de insistir na difusión da realidade da frota.”
Por último, e como exemplo das cousas positivas que se están realizando por parte do sector, referiuse ao FIP Blues, o proxecto de mellora pesqueira posto en marcha por Anecteam e as catro OPP’s do palangre de superficie (Orpagu, Opromar, Opnapa e OPP 7).
Participantes na xornada
O alcalde de A Guarda, Antonio Lomba Baz, e o presidente de Orpagu, Joaquín Cadilla Castro, foron os encargados de inaugurar a xornada de traballo que se prolongou ata mediodía. Tras eles, falaron o investigador Jaime Mejuto; o presidente de Anecteam, Emilio Martínez; o Xefe de Área da Unidad de Apoyo de la Dirección General de Ordenación Pesquera de la Secretaría General de Pesca, José Vicente Palmero, e a directora xeral de Pesca, Acuicultura e Innovación Tecnolóxica da Consellería do Mar, Mercedes Rodríguez.
Ningún comentario:
Publicar un comentario