CULTURA

O Centro Dramático Galego e a Companhia de Teatro de Braga estrearán ‘A contenda do río Miño’ no Festival de Almagro  

·A posta en escena da primeira peza teatral conservada en lingua galega enmárcase no 350º aniversario do texto, escrito por Gabriel Feixoo de Araúxo en 1671

·Inclúese na programación da unidade teatral da Xunta de Galicia, que inclúe o espectáculos ‘O Charco de Ulises’ e ‘Terceiro Acto’, xa estreados, e ‘Serva me, servabo te’

Lisboa acolleu hoxe a presentación do Festival Internacional de Teatro Clásico de Almagro 2021, do que Portugal é o país convidado  

Foto: X.G.

Infogauda / Lisboa

 O Centro Dramático Galego (CDG), unidade de produción teatral da Xunta de Galicia, estreará o 2 de xullo no Festival Internacional de Teatro Clásico de Almagro A contenda dos labradores de Caldelas ou Entremés famoso sobre a pesca do río Miño, coproducida coa Companhia de Teatro de Braga.

 Así se anunciou hoxe no acto de presentación do festival, desenvolvido en Lisboa ao ser Portugal o país convidado nesta edición, e no que participou o director do CDG, Fran Núñez. O evento estivo presidido pola ministra de Cultura do país luso, Graça Fonseca.

 A contenda do río Miño baséase na escrita de Gabriel Feixoo de Araúxo en 1671, que representa a primeira peza teatral en lingua galega conservada. A súa posta en escena enmárcase na conmemoración do 350º aniversario do entremés, así como nas designacións de Portugal como país convidado do festival de Almagro e de Braga como Capital Cultural do Eixo Atlántico. Tras a estrea en Almagro, está previsto desenvolver funcións en Cangas, dentro da Mostra Internacional de Teatro Cómico e Festivo, e en Braga, no Festival Mimarte.

 A través desta coprodución, o Centro Dramático Galego e a Companhia de Teatro de Braga afondan na temática das fronteiras a partir da que marca o río Miño entre Galicia e Portugal, unha das máis antigas de Europa e que representa máis un punto de encontro que de separación. O espectáculo desenvólvese nas tres linguas presentes na copia da peza teatral conservada, escrita en lingua galega, con fragmentos en portugués e anotacións en castelán.

Reforzo da identidade común

 Dirixida por Fran Núñez co apoio dramatúrxico do director da Companhia de Teatro de Braga, Rui Madeira, a obra lévase á escena da man dos equipos técnicos das unidades de produción galega e portuguesa nesta unión de esforzos a prol dun proxecto que busca reforzar a identidade común.

 O elenco está formado principalmente por intérpretes da Companhia de Teatro de Braga, con Yeliz Balim, Rogério Boane, Sílvia Brito, Carlos Feio, Eduarda Filipa, António Jorge, Grasiela Müller, Aisa Pérez e Solange Sá, xunto a Fran Núñez.

 A peza fala dun tempo e un lugar concreto, pero a súa esencia é universal e percorre a historia, as fronteiras, a loita polos recursos e de clases. Hai disputa polo dereito a pescar, peixes que non entenden de fronteiras e quen intenta levar o que non lle corresponde. Hai mortos, choros, festa, baile e irmandade. Hai fronteiras... ou non.

 A contenda do río Miño forma parte da programación do Centro Dramático Galego para esta temporada, no que a unidade de produción teatral da Xunta presentou ademais outros tres espectáculos, O charco de Ulises e Terceiro acto, xa estreados, e Serva me, servabo te, que o fará en setembro. A eles súmanse sete coproducións e outras iniciativas a prol da dinamización do sector teatral galego, como o programa de Residencias cruzadas ou a Bolsa de dramaturxia e creación.