A GUARDA

O equipo de goberno municipal presenta o proxecto de humanización da contorna da igrexa parroquial de Santa María de A Guarda

· E convida a cidadanía a elexir entre dúas propostas

Esta infografía corresponde a proposta 1 - que actúa sobre o total do envolvente, incluídas as prazas adxacentes - do proxecto de humanización da contorna da igrexa parroquial de Santa María de A Guarda

Infogauda / A Guarda

 O equipo de goberno do Concello de A Guarda, que preside o alcalde Antonio Lomba Baz vén de facer público que na súa "liña de humanizar espazos da vila" ten previsto "eliminar o estacionamento de vehículos do entorno da igrexa parroquial e dotar este espazo de mobiliario para recuperalo para as persoas". 

 Desde o executivo local indican que "o mobiliario permitirá a circulación de vehículos e servirá de protección aos peóns, pero en ningún caso deixará espazos para o estacionamento salvo a reserva dunha praza para persoas con mobilidade reducida e outra para carga e descarga. 

 Con esta idea, dende o concello, encargouse á arquitecta da localidade, Ana [Isabel] Lima [Pacheco], que fixera dúas propostas diferentes para que fora a propia cidadanía a que seleccionara a que mais lle gustara. 

Esta infografía corresponde a proposta 2 - sen incidencia sobre as prazas - presentada para á humanización da contorna da igrexa parroquial de A Guarda

  

 Chegado este punto o concello fai públicas as propostas a través de internet e mediante dous paneis no propio edificio municipal para que aquelas persoas que queiran participar na decisión, se acheguen a expresar a súa opinión nunha urna que estará emprazada no posto de información do novo concello. 

 Poderán participar na votación os maiores de 16 anos empadroados na Guarda. Para exercer o dereito ao voto deberán facelo coa presentación do DNI. O proceso estará aberto dende o martes, día 16 de xuño ás 9:00 h, ata o venres, día 19 ás 13:00 h, en horario de atención ao público (de 9:00 a 13:00). O resultado da votación farase público o luns día 22 de xuño".

 De acordo coa documentación facilitada polo executivo local, as características da contorna da igrexa parroquial de Santa María de A Guarda presentan as seguintes "debilidades: opresión do estacionamento, prazas=bacios urbanos, carácter de espazo residual e constrinximento da igrexa".

 Porén, o proxecto de humanización da devandita contorna conleva varias "oportunidades: espazo de permanencia, valor social, valor patrimonial, carácter de conxunto, localización [no] Camiño de Santiago, rede de vías, rede de prazas e características morfolóxicas". 

  Entre os obxectivos da proposta figuran os seguintes: "a revitalización do entorno da igrexa, crear novos espazos de permanencia, potenciar o uso peonil, prover de unidade ao conxunto, garantir a reversibilidade, dinamizar a interacción e pluralidade social, sustentabilidade = continuidade temporal, xerar un punto de atracción e expansión local".

DÚAS PROPOSTAS, IDÉNTICOS OBXECTIVOS

  A hora de decidir pola veciñanza que proposta desexa, desde Infogauda queremos salientar que a proposta 1, "actúa sobre o total da envolvente, incluídas as prazas existentes". 

 "As prazas adquiren unha nova identidade, revestidas en chapa preta e madeira"; "unha serie de prismas irregulares, dispersos pela envolvente, complementan o conxunto" e "a triangulación é a base conceptual que organiza a proposta", con alomenos cinco enclaves de referencia para os veciños e visitantes: Camiño de Santiago, Fortaleza de Santa Cruz, Praza do Reló, porto pesqueiro e Museo do Mar. 

 "Cada un dos elementos da proposta xurde e configúrase en base a triangulación de outros elementos". 

 A súa vez, na proposta prevese unha "tripla función dos elementos: xerar permanencia (bancadas) + recuperar o carácter peonil do entorno da Igrexa + introducir vexetación", salientando a "permanencia peonil = eixe estruturador".


 E na proposta 2, "as prazas existentes manteñen o seu carácter actual". En todo caso cos "mesmos obxectivos: peón, permanencia e unidade".

 A "unidade [no] entorno a igrexa" reforza o "carácter da proposta como principio dinamizador" na que "o peón é o protagonista".

 Á proposta 2 contempla os "mesmos obxectivos: peón, permanencia, unidade". 

 Esta proposta "desenvólvese a partir dunha serie de elementos lineares que organizan o entorno creando novos espazos de permanencia (praciñas)", e "as prazas existentes manteñen o seu carácter actual".

 Dentro da proposta 2  prevese [unha] "tripla función dos elementos lineares: xerar permanencia (bancadas); recuperar o carácter peonil do entorno da igrexa; e distribuír fluxos peonís".  

 Asemade, "a vexetación é integrada nos novos espazos de permanencia (praciñas) e nos elementos lineares".

 Finalmente "procúrase a uniformidade e articulación do entorno da igrexa" a fin de "retornar o desfrute do espazo ao peón e xerar un foco de atracción e expansión local".

SALCIDOS (A GUARDA)

ACLARACIÓN PÚBLICA DA XUNTA REITORA DA COMUNIDADE DE MONTES VECIÑAIS EN MAN COMÚN DE SALCIDOS
 

   A imaxe reflicte a zoa das obras

Foto: X.G.

 RELACIONADO COA NOTICIA PUBLICADA POLA XUNTA DE GALICIA: “A XUNTA DE GALICIA IMPLANTA UNHA ESTRUTURA DE RETENCIÓN DE AREAS NO SISTEMA DE SANEAMIENTO DO CONCELLO DA GUARDA”.

 A XUNTA REITORA DA COMUNIDADE DE MONTES DE SALCIDOS, QUERE ACLARAR QUE PARA QUE ESTA OBRA FOSE REALIZADA TIVÉRONSE QUE EFECTUAR DIVERSAS XESTIÓNS, TANTO A NIVEL DE CONCELLOS COMO DE PARTIDOS POLÍTICOS E ORGANISMOS PÚBLICOS DEBIDO O PROBLEMA DA VERTEDURA  EN “A XUNQUEIRA” DE SALCIDOS POR PARTE DO COLECTOR DE AUGAS RESIDUAIS QUE VAI POLA PISTA DE ACCESO O CAMPING SANTA TECLA, E NO QUE ESTÁ CONECTADO O SANEAMENTO DO VECIÑO CONCELLO DE O ROSAL. 

 DICIR TAMÉN QUE ESTA ZONA ESTÁ CONSIDERADA COMO “ZONA DE ESPECIAL PROTECCIÓN DE AVES” (ZEPA) E HAI DOUS OBSERVATORIOS ORNITOLÓXICOS, POLO QUE GOZA DE CERTA INMUNIDADE. 

 ESTA COMUNIDADE COMO PROPIETARIA DESTES TERRENOS REALIZA DENTRO DAS SÚAS POSIBILIDADES O MANTEMENTO DA ZONA, CON ALGUNHA COLABORACIÓN PUNTUAL DO CONCELLO DA GUARDA. 

 POR PARTE DAS ADMINISTRACIÓNS DA XUNTA DE GALICIA NUNCA SE PREOCUPARON DESTAS VERTEDURAS PESE A DENUNCIAS DO SEPRONA, ORGANIZACIÓNS ECOLOXISTAS, E A PROPIA COMUNIDADE DE MONTES E PERSOAS QUE PASEAN POLA ZONA E VECIÑOS QUE REALIZAN APROVEITAMENTOS, TANTO DE PASTOREO COMO PARA FINS AGRÍCOLAS. 

 A XUNTA REITORA DESTA COMUNIDADE, EN VISTA DE QUE PESE AS DENUNCIAS, NINGUN ORGANISMO SOLUCIONABA NADA, DECIDIU DE REALIZAR AS XESTIÓNS NECESARIAS  PRA SOLUCIONAR O PROBLEMA, CHEGANDO  HAI TRES ANOS E POLA MEDIACIÓN DUN PARTIDO POLÍTICO A VISITAR UN ALTO GOBERNANTE DO PARTIDO QUE LEVA VARIOS ANOS NO PODER DESTA AUTONOMÍA, EXPLICÁNDOLLE ENTRE OUTRAS ESTA ANOMALÍA DAS VERTEDURAS E COMPROMETÉNDOSE  ESTE, A VISITAR A ZONA, DITO POR EL, QUE NON A COÑECÍA, E VER “IN SITU” O PROBLEMA. 

 COMO É NORMAL  NOS POLÍTICOS, NON SE DIGNOU EN APARECER, E A PESAR DE QUE A ESTA VILA VEU O MENOS UNHA VEZ APOIAR O CANDIDATO A ALCALDÍA DO SEU PARTIDO NUN MITIN. UN COMPONENTE DA XUNTA REITORA ACUDIU PARA LEMBRARLLE A SÚA PROMESA DA VISITA ACORDADA, PERO TAMPOUCO RESULTOU. 

 FALOUSE ENTÓN COS RESPONSABLES DO CONCELLO DA GUARDA E O ROSAL, SOLICITANDO UNHA ENTREVISTA CON “AUGAS DE GALICIA”, ENTIDADE PÚBLICA ENCARGADA DE XESTIONAR OS SANEAMENTOS DOS CONCELLOS E A DONDE ACUDIMOS FAI MÁIS DUN ANO; CONCELLEIRO DE OBRAS DA GUARDA, CONCELLEIRA DA ANTERIOR CORPORACIÓN DO ROSAL  E COMPOÑENTES DA XUNTA REITORA DESTA COMUNIDADE ONDE FOMOS RECIBIDOS POLA PRESIDENTA, E O ENXEÑEIRO RESPONSABLE DE PROXECTOS. 

 DESPOIS DE EXPOÑER CADA PARTE O SEU MODO DE VISTA, E DADO QUE O PROXECTO QUE SE QUERÍA FACER NON SATISFACÍA AS PRETENSIÓNS DOS COMPOÑENTES DA XUNTA REITORA, XA QUE A COUSA IBA PARA ANOS, LOGROUSE O COMPROMISO POR PARTE DA PRESIDENTA DE FACER A CORTO PLAZO O SISTEMA DE RETENCIÓN DE AREAS CUXAS OBRAS EMPEZARON ESTES DÍAS, PERO QUE SEGUEN SEN CONVENCER, DADO QUE NON SOLUCIONARÁ O CAUDAL DAS PLUVIAIS EN DÍAS DE CHOIVA E QUE PROCEDEN DO VECIÑO CONCELLO  DO ROSAL, E TAMÉN POR FALTA DE LIMPEZA DAS TUBERÍAS, LABOR QUE TEÑEN QUE ACOMETER OS CONCELLOS, SEGÚN PALABRAS DA RESPONSABLE DE “AUGAS DE GALICIA” , E LEVAN OITO ANOS SEN FACELO.

 POR TODO O EXPOSTO, ESTAS OBRAS NON FORON IMPULSADAS POLA XUNTA DE GALICIA COMO QUEREN FACER CRER NO SEU COMUNICADO, SENÓN POLA XESTIÓN DA XUNTA REITORA DA COMUNIDADE DE MONTES DE SALCIDOS APOIADOS POLO CONCELLEIRO DE OBRAS DA GUARDA E A CONCELLEIRA DO ROSAL NA QUE DELEGOU A ALCALDESA DA ANTERIOR CORPORACIÓN DAQUEL CONCELLO, E QUE COMO, REPETIMOS UNHA VEZ MAIS ESTE “PARCHE” NON VAI SOLUCIONAR AS VERTEDURAS, ESTA COMUNIDADE ESTÁ DISPOSTA A TOMAR TODAS AS MEDIDAS LEGAIS NECESARIAS PARA QUE OS RESPONSABLES  ERRADIQUEN AS VERTEDURAS NUNHA ZONA PROTEXIDA PERO AO MESMO TEMPO TAN DESPROTEXIDA POR TÓDALAS ADMINISTRACIÓNS PÚBLICAS. 

(R.)

O ROSAL

O Concello porá en marcha este verán rutas guiadas polos Muíños do Folón e do Picón e a Senda dos Pescadores   

· Realizaranse os meses de xullo e agosto para grupos reducidos acompañados por un guía especializado 

  

Vista parcial do conxunto etnográfico dos Muíños do Picón e do Folón
Fotos: C.O.R.

Infogauda / O Rosal

 Un verán desfrutando da natureza e coñecendo un pouco máis do patrimonio cultural do municipio. Esa é a proposta do Equipo de Goberno do Concello do Rosal, que durante os meses de xullo e agosto porá en marcha rutas guiadas polos Muíños do Folón e do Picón e pola Senda dos Pescadores. Trátanse de rutas homologadas para grupos reducidos nas que as persoas participantes coñecerán os distintos recunchos da man dun guía especializado e acreditado pola Xunta de Galicia. 

 Para poder garantir as distancias de seguridade entre asistentes e cumprir con todos os protocolos de prevención marcados polas autoridades sanitarias, os grupos estarán limitados a 10 persoas. As saídas estableceranse para: 

- Os Muíños do Folón e do Picón, luns ás 10:30 h.; e luns e martes ás 19:30 h. 

- A Senda dos Pescadores, os martes ás 10:30 h.  

A ponte do Tamuxe está incluída na Senda dos Pescadores

 En función da demanda, o Concello estudará a posibilidade de ampliar a frecuencia das rutas e valorará a apertura dunha quenda para visitar os Muíños do Folón e do Picón os sábados pola mañá sempre que se poidan garantir todas as medidas de seguridade. A iniciativa arranca escollendo luns e martes como día de ruta pola menor frecuencia de visitantes a esas zonas, ademais de converterse nunha boa alternativa de lecer os días que habitualmente pechan ao público outras actividades como as museísticas. 

 As rutas terán un custe de 2 euros por persoa e para participar nelas haberá que reservar previamente a través da web do Concello. O formulario de inscrición habilitarase ao longo do mes de xuño. 

Información das rutas 

 Nesta nova realidade post-COVID, as autoridades sanitarias desaconsellan o reparto entre a poboación de información turística en calquera formato físico. Por este motivo, en lugar do tradicional material que se entregaba aos visitantes no punto informativo dos Muíños do Folón e do Picón, o Concello optou por poñer en marcha estas rutas e publicar toda a información relativa a este patrimonio cultural e natural do Rosal na propia web municipal. Ao longo do mes de xuño habilitaranse contidos na web para que toda a xente interesada poida consultar ou descargar información. Se algunha persoa precisa información turística pode acudir tamén ao Concello de luns a venres en horario de 09:00 a 14:00 horas.  

 Ademais, estas rutas contan con sinalización vertical con toda a información relevante, con diferentes zonas nas que un código QR facilita aos usuarios de teléfonos intelixentes, poder visualizar distintos vídeos ou obter información en audio, sobre diferentes puntos do sendeiro.    

 O Concello do Rosal é consciente da alta afluencia de visitantes percorrendo os Muíños do Folón e do Picón e a Senda dos Pescadores en determinados momentos, polo que se apela á responsabilidade dos veciños e veciñas en especial en intres de alta concorrencia e pídese eviten aglomeracións e obstaculizar zonas de paso para coidar a saúde de todos e todas.

TOMIÑO

Tomiño recibe os primeiros selos de Comercio Seguro ante o Covid-19 

· A entrega aos propietarios de Lito Sport, Hebe Estética, Clínica Dental Ignacio Rodríguez e Arte Peluquería, tivo lugar onte coa presenza da alcaldesa e do concelleiro de Promoción Económica  

· Os primeiros galardoados alcanzaron as máximas notas nunha avaliación que ten a Xunta de Galicia a disposición dos establecementos 

A alcaldesa Sandra González; o concelleiro de Promoción Económica, Fran Campo; a vicepresidenta, o secretario e a xerente de Adeto, Marta Álvarez, Iago Pérez e Lorena Quinteiro, respectivamente, e o secretario xeral da Federación Provincial de Comercio, Turismo e Mercados Enrique Núñez na entrega dos selos “Comercio Seguro”

Foto: C.T.

Infogauda / Tomiño

 A Federación Provincial entregou onte en Tomiño os primeiros selos dunha campaña que infunde confianza nos consumidores. Estes selos acreditan como “Comercio Seguro” aos pequenos establecementos que aplican os protocolos sanitarios e hixiénicos estipulados pola Xunta na crise do Covid-19.  

 Os selos de “Comercio Seguro” foron entregados aos propietarios de Lito Sport, Hebe Estética, Clínica Dental Ignacio Rodríguez e Arte Peluquería, por parte da alcaldesa Sandra González, o concelleiro de Promoción Económica, Fran Campo; a vicepresidenta, o secretario e a xerente de Adeto, Marta Álvarez, Iago Pérez e Lorena Quinteiro, respectivamente, e o secretario xeral da Federación Provincial de Comercio, Turismo e Mercados Enrique Núñez.

 Estes establecementos foron os primeiros en cumprimentar a autoavaliación da Xunta de Galicia dentro da plataforma www.comerciosegurogalicia.com, conseguindo a nota de “Elevado” e “Moi Elevado” que outorga a citada plataforma. A vindeira semana seguiranse repartindo distintivos a outros establecementos que tamén superaron a autoavaliación da Xunta de Galicia.  

 Dende ADETO confíase en que “todos os comercios leven a cabo a súa evaluación e soliciten o seu distintivo”.  

 A alcaldesa amosouse moi satisfeita pola distinción alcanzada polo comercio local, insistindo no valor de calidade e proximidade dos mesmos. 

TOMIÑO

O Concello organiza un novo curso de manipulador/a de alimentos

Terá lugar o 25 de xuño de 2020 ás 17:00 horas (duración 3 horas) no Auditorio de Goián  

 Infogauda / Tomiño

 O Concello de Tomiño organiza un novo curso de manipulador/a de alimentos.    

Data: xoves, 25 de xuño de 2020 ás 17:00 horas (duración 3 horas)  

Lugar: Auditorio de Goián  

Prezo:  20 €     

Data límite de inscrición: 22 de xuño de 2020.  

Prazas limitadas.  

 Os/as asistentes deberán levar o seu DNI e ir provistos/as de máscara hixiénica e bolígrafo.  

 As persoas interesadas poden inscribirse na Oficina de Desenvolvemento Local do Concello de Tomiño (Teléfono 986 622 001), en horario de mañá.

CULTURA

A Xunta de Galicia e o Museo do Pobo Galego asinan un convenio para deseñar a museografía que se estreará tras a ampliación  

Román Rodríguez e Justo Beramendi renovaron o acordo anual entre ambas institucións, que nesta ocasión inclúe unha partida adicional de 200.000 euros

O conselleiro de Cultura e Turismo, e o presidente do Padroado do Museo do Pobo Galego, asinaron hoxe o habitual convenio de colaboración anual entre a Xunta de Galicia e esta institución
Fotos: X.G.

O conselleiro e o alcalde compostelán, Xosé Sánchez Bugallo, interesáronse pola afectación da covid-19 nas obras que desenvolve o Consorcio de Santiago 

Infogauda / Santiago de Compostela

 O conselleiro de Cultura e Turismo, Román Rodríguez, e o presidente do Padroado do Museo do Pobo Galego, Justo Beramendi, asinaron hoxe o habitual convenio de colaboración anual entre a Xunta de Galicia e esta institución, que nesta ocasión se reforza cunha partida adicional de 200.000 euros para iniciar o deseño da museografía que se estreará tras a ampliación do museo, un proxecto que desenvolve o Consorcio de Santiago por colaboración de varias administracións, entre elas o Concello de Santiago, representado no encontro polo seu alcalde, Xosé Sánchez Bugallo.

O conselleiro de Cultura e Turismo, Román Rodríguez - a dereita da imaxe -, e o presidente do Padroado do Museo do Pobo Galego, Justo Beramendi no acto de sinatura do convenio anual

 O acordo, que supera os 500.000 euros, contribúe ao financiamento de parte dos gastos do museo e impulsa actividades culturais que se desenvolven neste inmoble, un espazo cargado de forte simbolismo e un emblema para Galicia e a cidade de Compostela.

 A nova museografía, segundo contempla o proxecto xa presentado o pasado ano, desenvolverase na ala sur do museo. Esta é a primeira achega para a súa contratación, cunha dotación de 800.000 euros dos que o reparto previsto establece que o Goberno autonómico consigne o 50% en dúas anualidades. Román Rodríguez explicou que é un proxecto no que, a través do Consorcio de Santiago, varias administracións poñen en valor “unha cabeceira espiritual e simbólica da rede de museos antropolóxicos de Galicia”.

 O conselleiro e o rexedor interesáronse por como afectou a crise sanitaria do coronavirus ás obras de ampliación que están actualmente en marcha. Tal e como comprobaron, o prazo de finalización veuse lixeiramente afectado polo estado de alarma e, mentres que a previsión inicial era que a actuación rematase no mes de setembro, agora, debido o parón provocado pola covid-19, estímase que as obras finalicen en outubro deste mesmo ano.

 A empresa adxudicataria continúa intervindo nas fachadas do edificio, renovando as cubertas e construíndo unha nova escaleira para unir todas as plantas do edificio. No marco desta intervención tamén se mellorará o illamento térmico do inmoble, renovarase a rede de subministros, substituirase a estrutura do chan e instalarase un novo ascensor.

GALICIA

Galicia dá por superada a fase 3 e levantará o estado de alarma a partir do próximo luns

“Facémolo avalados pola situación epidemiolóxica que temos desde hai 14 días e pola solidez dos datos sanitarios”, asevera Feijóo

O presidente do Goberno galego, Alberto Núñez Feijóo, na rolda de prensa deste venres

Foto: X.G.

As medidas preventivas aprobadas hoxe polo Consello serán publicadas mañá no Diario Oficial de Galicia e terán vigor desde o vindeiro luns 15 de xuño

Amplíanse os aforos, con carácter xeral, ata o 75% e reabren os parques infantís ao aire libre

Decaen as limitacións de todos os dereitos fundamentais propios do estado de alarma, entre eles o límite para facer xuntanzas nos domicilios ou reunións familiares

Feijóo pedirá ao Goberno que a mobilidade dentro do territorio nacional se contemple unha vez todas as CC.AA. estean na mesma situación epidemiolóxica


Infogauda / Galicia

  O presidente do Goberno galego, Alberto Núñez Feijóo, destacou hoxe o acordo no Consello da Xunta de dar por rematada a fase 3 e anunciou que Galicia levantará o estado de alarma a partir do próximo luns, despois de que o Goberno central autorizase este mesmo venres á Comunidade a dar este paso.

 “Facémolo avalados pola situación epidemiolóxica que temos desde hai 14 días e pola solidez dos datos sanitarios”, aseverou Feijóo, para logo concretar que, nos últimos 7 días, a taxa de incidencia por 100.000 habitantes cífrase en Galicia en 0,4, mentres a media de España é de 4,2.

 Ademais, o titular da Xunta salientou que Galicia é, polo momento, a comunidade autónoma con menor taxa de incidencia por 100.000 habitantes de España. Así pois, despois de valorar a situación epidemiolóxica dos últimos 14 e 7 días e dado que o número de contaxios é 10 veces inferior á media de España de forma continuada nos últimos 14 días, o Goberno galego solicitou levantar o estado de alarma, dar por concluída a fase 3 e entrar nunha fase de seguimento sanitario. “Xa cunha serie de condicionamentos económicos e sociais máis permisivos”, engadiu.

 Con todo, fixo fincapé en que superar a fase 3 non significa que se teña superado a pandemia: “A nosa situación epidemiolóxica permítenos seguir avanzando, pero en ningún caso pensar que o problema do coronavirus está solucionado. Convive con nós e o risco de rebrote é certo”, subliñou.

 Así as cousas, o vindeiro luns Galicia abandonará a tutela do Goberno central e comezará unha nova etapa que estará rexida polo Real Decreto lei 21/2020 –o que concreta a chamada nova normalidade– e polas normas que dite o Goberno autonómico, dado que asume todas as normas en materia de saúde pública que considere pertinentes.

 En concreto, as medidas preventivas recollidas nun acordo aprobado hoxe polo Consello serán publicadas mañá no Diario Oficial de Galicia e terán vigor desde o vindeiro luns 15 de xuño. Deste xeito, o acordo recolle: a obrigatoriedade de medidas de hixiene e prevención esixibles a todas as actividades, tales como: labores de desinfección e limpeza; especial atención nas zonas de uso común; que se promova o pago con tarxeta; tarefas de ventilación periódicas; e medidas específicas dirixidas a centros comerciais, establecementos de hostalería e restauración, lugares de culto, piscinas ou actividades culturais, entre outras.

Limitacións do aforo

 Nesta mesma liña, establécense limitacións de aforo: un límite de 60 persoas en espazos abertos e de 30 en pechados no caso de velorios, cun máximo de 75 na comitiva fúnebre. O mesmo 75% que será o máximo permitido en boa parte dos establecementos regulados, como locais e centros comerciais, onde as zonas comúns quedarán limitadas á metade do aforo. Mentres que nos bares, restaurantes, hoteis e aloxamentos turísticos o aforo será de 75%, salvo nas terrazas que se eleva ao 80%. E tamén se regulan museos, equipamentos culturais, actividades deportivas, bibliotecas ou piscinas, entre outros. “Sempre cumprindo a distancia de 1,5 metros e, se non é posible, será obrigatorio o uso de máscara”, matizou Feijóo.

 No que se refire aos parques infantís, soamente se autorizarán os que se atopan ao aire libre por cuestións de precaución. E, no que respecta ás actividades deportivas (excepto a ACB e a Liga de Fútbol Profesional, que se reserva ao Goberno central), o aforo será do 75% cun límite de 300 persoas no caso de recintos pechados e de 1.000 no caso de recintos abertos.

 Así mesmo, dado que se levanta o estado de alarma, o presidente da Xunta anunciou que decaen as limitacións de todos os dereitos fundamentais existentes e propios do estado de alarma, entre eles o límite para facer xuntanzas nos domicilios ou reunións familiares.

 “Este é un proceso regrado e dinámico que vai estar suxeito ás condicións epidemiolóxicas de cada momento”, explicou Feijóo, ao tempo que matizou que os límites poden verse ampliados ou restrinxidos en función da situación epidemiolóxica. “Imos seguir avanzando con cautela e prudencia: levantar o estado de alarma non significa, en ningún caso, que se levantan as restricións sanitarias totais, senón que os dereitos fundamentais non quedan limitados en Galicia e que ampliamos os aforos, con carácter xeral, ata o 75%”, indicou.

Feijóo pedirá cautela na mobilidade nacional

 Do mesmo xeito, avanzou que na vindeira videoconferencia co presidente do Goberno central e cos outros presidentes autonómicos, solicitará ao Goberno que estableza as cautelas necesarias para que a mobilidade dentro territorio nacional se contemple unha vez todas as comunidades autónomas estean na mesma situación epidemiolóxica.

 Así mesmo, o titular da Xunta avogou por seguir actuando coa mesma cautela para non dar pasos atrás: manter a distancia de seguridade e a hixiene de mans, así como empregar a máscara se non se pode garantir esta distancia.

Ademais, lembrou que Galicia renderá mañá unha sentida homenaxe ás 619 persoas que faleceron por mor da covid-19 desde o inicio da pandemia.

CINEMA

Cangas acolle a presentación de "María Solinha", a película de Ignacio Vilar que se reinventa en tempos da COVID e inicia o seu percorrido  

Redondela e Cangas serán a próxima semana os primeiros escenarios para a súa estrea aínda que percorrerá máis de cen concellos galegos

A  película de Ignacio Vilar ‘María Solinha' foi presentada este venres no Auditorio de Cangas  

Foto: D.PO.

Infogauda /Cangas do Morrazo

 

  A esperada película de Ignacio Vilar ‘María Solinha' percorrerá máis de 100 concellos galegos entre os meses de xuño e outubro deste ano e transgredirá as fronteiras autonómicas con representacións en Castela e León e Portugal. Así se puxo de manifesto na presentación que tivo lugar este venres no Auditorio de Cangas, vila que, xunto a Redondela, acollerá a estrea da longametraxe sobre a viúva acusada de meiga e símbolo da loita contra a represión das mulleres.

  "Esta historia emociónanos a todas porque é a nosa historia, é a historia das mulleres" manifestou ó respecto a presidenta da Deputación, Carmela Silva, que asistiu á presentación na capital do Morrazo onde tamén estiveron o alcalde de Cangas, Xosé Manuel Pazos e a alcaldesa de Redondela, Digna Rivas, e o director de AGADIC, Jacobo Sutil, amais de todo o elenco da película co director, Ignacio Vilar, o responsable da exhibición, Xoán Mariño, e as actrices e actores Laura Míguez, Grial Montes, Antonio Durán "Morris", Santi Prego e Mabel Rivera.

  A primeira proxección do filme será o vindeiro venres 19 de xuño no concello de Redondela, mentres que o 20 de xuño "María Solinha" chegará a Cangas. Ambas estreas serán ó aire libre. "A presentación vai percorrer o territorio levando o cinema e a cultura a todos os lugares. Imos levar o cinema a toda a xente. Hai algo máis democrático?", preguntou a presidenta da Deputación sobre o modelo de distribución que se escolleu. Segundo Xoán Mariño, o xeito no que se moverá a película representa "un feito histórico porque non hai moitas pelis que estreen primeiro no rural e logo nos cines. Ademais, debe ser a primeira vez que se estree unha película nun autocine". Deste xeito, entre os meses de xuño e outubro deste ano haberá estreas en numerosos concellos de toda Galicia. En todos os casos se seguirán as recomendacións e directrices derivadas da situación de crise sanitaria provocada polo COVID-19, polo que a longametraxe será proxectada nas mellores condicións técnicas para garantir todas as medidas de seguridade, aforo e hixienización.

  A dinamización da economía dos concellos tamén se atopa fortemente ligada con esta película. Tanto Xoán Mariño como Digna Rivas e Xosé Manuel Pazos denotaron na presentación a importancia que ten a cultura como sector estratéxico. Xosé Manuel Pazos, ademais, explicou que "a rodaxe desta película xerou riqueza en toda a zona". "A xente da cultura é capaz de reinventarse", apuntou Carmela Silva sobre a capacidade de adaptación do proxecto á nova realidade. Apoiar o cinema que utiliza como lingua vehicular o galego e visibilizar ás mulleres da provincia, á vez que se dan a coñecer os territorios e o patrimonio da provincia son os obxectivos que a Deputación de Pontevedra persegue coa súa colaboración na financiación desta película.

  Durante a presentación, a presidenta tamén quixo poñer en valor o cartel da película por ser quen de apreixar o espírito da obra e a loita contra o dragón, a metáfora do sistema machista e patriarcal: "Amosa unha terra, a provincia de Pontevedra, a mellor que hai. Amosa un océano Atlántico no que ocorreron tantas cousas e que nos situou no centro do mundo hai 2.000 anos. Amosa dúas mulleres cómplices, irmás e empoderadas que miran cara o mar enriba dunha rocha e que se miran entre si buscando esa relación para acabar co dragón". Así, a longametraxe é unha crónica da imparable enerxía feminina a través da figura de María Solinha, unha viúva de Cangas que sufriu no século XVII en primeira persoa a represión feminina ó ser denunciada por bruxería. O dragón é o eixo que vertebra a obra para trazar a relación entre a sociedade inquisidora na que morreu María e a sociedade actual, baixo as gadoupas da besta.

  Dirixida por Ignacio Vilar e producida por Vigopolis e Vía Láctea Films, a película conta cun reparto cen por cento galego e composto por ata 30 profesionais da interpretación, entre os que se atopa Grial Montes, actriz que protagonizará xunto a Laura Míguez a longametraxe e que quixo denunciar o tratamento da muller na sociedade actual: "Xa vai sendo hora de que nos tomen en serio. Non somos complementos, somos persoas". Ignacio Vilar, pola súa banda, puxo o foco sobre María Solinha, explicando o enorme descoñecemento que existe con respecto á canguesa. "Penso que é importante recuperar unha figura como a de María Solinha e o cine danos esa oportunidade para dar a coñecela ante o mundo".

PONTEVEDRA

A Deputación de Pontevedra pon en marcha o programa ‘trOPOS' para actualizar e mellorar os procesos selectivos de persoal na Administración local  

Segundo explicaron a presidenta, Carmela Silva, e o vicepresidente, César Mosquera, haberá cursos de formación e darase asesoramento a persoal participante en tribunais de selección 

A presidenta, Carmela Silva, e o vicepresidente, César Mosquera na presentación do programa ‘trOPOS'  

Foto: D.PO

Infogauda / Pontevedra

 A Deputación de Pontevedra vai poñer en marcha o programa ‘trOPOS' para actualizar e mellorar os procesos selectivos de persoal tanto na propia institución provincial como nos concellos. A finalidade do programa, nas palabras da presidenta, Carmela Silva, e do vicepresidente, César Mosquera, é un cambio profundo no desenvolvemento das oposicións, incorporando coñecementos e avances científicos en diversas áreas, dando un salto de calidade que permita que o persoal que obteña unha praza sexa realmente, e non só na teoría, o máis axeitado para o seu posto dentro da administración.

  Segundo explicou Mosquera, promotor da iniciativa, a Deputación decidiuse a poñer en marcha o programa ‘trOPOS' (acrónimo de ‘transformar oposicións') co fin de adaptar a administración "para estar a altura das esixencias cada vez máis elevadas da cidadanía e buscar a excelencia na prestación dos servizos públicos". Segundo dixo, ese obxectivo só se consegue dando un xiro en moitos ámbitos, pero tamén desde o punto de vista da selección de persoal.

  O vicepresidente destacou que os procesos selectivos de persoal caeron na ‘rutinización', aplicando bases de convocatorias moi similares entre si e antigas, xa que en xeral existe un problema funcional derivado de que non se dedican esforzos nin recursos para modernizalos. "Neste Goberno temos avanzado e cambiado moitas dinámicas anteriores: o relatorio, a atención política agora baseada na igualdade, a eliminación da libre disposición de fondos por parte da Presidencia –instaurando a concorrencia, transparencia e equidade–, así como o enfoque que demos aos residuos ou ás estradas provinciais. Agora chegou o momento de dar un cambio profundo e real na selección de persoal", destacou.

 ‘TrOPOS' estará dirixido especialmente a persoal ao servizo das Administracións locais con participación na redacción de bases e persoas integrantes dos tribunais de selección para mellorar a súa cualificación e competencia. Consistirá en actividades de formación, asesoramento, colaboración na redacción de bases e na elaboración de material e instrucións para integrantes dos tribunais, así como doutros traballos que se desenvolverán ao longo dun período total de tres anos.

  Para realizar este programa contrataranse por parte da Deputación dúas persoas técnicas superiores especialistas en procesos selectivos na Administración local encargadas de planificar programar, avaliar e executar o programa. Unha delas tería ademais a función de coordinar ‘trOPOS' baixo a dirección da xefa de servizo de Recursos Humanos da Deputación.

  Desde a Deputación farase un chamamento aos concellos da provincia para participar deste programa, tendo que formalizar unha adhesión. A intención é que cada curso de formación teña unha duración de catro meses, que se desenvolverán a partires do mes de setembro.

Validez e fiabilidade

  Segundo explicou o vicepresidente Mosquera, as oposicións deberían seleccionar as persoas máis competentes para o desempeño dos postos de traballo na Administración, polo que o lóxico é que as probas de acceso estivesen moi vinculadas coas tarefas do posto a cubrir, cando isto está lonxe da realidade. "Na práctica acontece calquera cousa menos iso", indicou.

  Neste sentido, Mosquera puxo sobre a mesa a necesidade de que as oposicións se rexan pola transparencia e a equidade e cumpran con dous conceptos clásicos, o de validez e o de fiabilidade: Isto é, que a persoa que opta a un posto demostre a súa capacitación para unha función, e que de volver a realizar unha proba os resultados sexan parecidos sen influencia da sorte.

  "É delirante que nunha oposición para un enxeñeiro non se obrigue a facer o exercicio en Autocad e se faga a man, ou que os temas vaian por sorteo nunha pregunta única, xa que de cambiar esa pregunta habería seguro un cambio na orde de puntuación das persoas opositoras", destacou o nacionalista. Lembrou, así mesmo, que cada persoa que acada unha praza nunha Administración pública ten logo unha extensa vida laboral, polo que é esencial afinar na súa selección.

  O vicepresidente quixo dar as grazas a todo o persoal da Deputación involucrado neste programa, do que dixo, "non so mostra colaboración senón entusiasmo coa perspectiva duns procesos selectivos mellorados". "Este programa é unha medida de longo alcance, de principios democráticos e de compromiso co mellor funcionamento da Administración. Os resultados non se verán de xeito inmediato, veranse co paso dos anos. A ilusión compartida por mellorar a Administración local lévanos a non escatimar esforzos e recursos para que o programa sexa un éxito do que toda a sociedade se beneficie", finalizou.

Idea complexa e reflexionada

  Pola súa banda, a presidenta, Carmela Silva, destacou que este proxecto nace dun estudo moi profundo que se leva facendo durante moito tempo, un estudo teórico moi ben argumentado, analizado e estudado que pretende dar resposta a necesidades dunha Administración do século XXI ligada ós recursos humanos. Recoñeceu, de feito, que "cada vez que me chama o vicepresidente para presentar unha idea xa sei que vai ser unha idea complexa, potente, reflexionada e que pretende construír unha provincia mellor".

  "É deses proxectos que hai que analizar dedicándolle tempo e concentración", resaltou, para engadir que "vai servir moito, non só para a nosa Administración provincial, senón tamén para administracións locais e outras administracións que o van tomar coma unha referencia".

PONTEVEDRA

A Deputación de Pontevedra lanza unha nova liña de axudas extraordinarias a concellos para medidas de conciliación e corresponsabilidade  

Cun orzamento de 365.000 euros que se distribuirán con criterios obxectivos, destínanse a complementar os programas municipais de alivio das familias ante o peche de alternativas para nenas/os, persoas maiores e dependentes

A presidenta e o vicepresidente da Deputación provincial de Pontevedra na rolda de prensa deste venres

Foto: D.PO.

Infogauda / Pontevedra

 O Goberno da Deputación de Pontevedra aprobará a próxima semana unha nova liña de axudas extraordinarias para os concellos de menos de 50.000 habitantes, dirixidas a complementar a financiación de programas e medidas municipais que se poñen en marcha para dar alternativas ás familias no coidado de nenas/os, de persoas maiores, e das persoas dependentes, ante o peche de centros educativos, actividades extraescolares, centros de día e de actividades de ocio.  

 Para a presidenta provincial, Carmela Silva, "as administracións públicas non podemos mirar para outro lado, temos que intentar achegar axudas aos concellos para que poidan cofinanciar, reforzar ou ampliar  proxectos postos en marcha neste eido como ludotecas, programas de ocio para nenas e nenos, para maiores,…".  Neste eido, as axudas que vai lanzar a Deputación de Pontevedra en materia de corresponsabilidade e conciliación, cun orzamento de 365.000 euros, serán distribuídas en función de dous criterios obxectivos como a poboación e o índice de dependencia, e poderanse solicitar para proxectos que desenvolvan os concellos entre xuño e decembro deste ano. O reparto das achegas oscilará entre os 3.700 euros para os concellos máis pequenos ata os 8.400 para os de maior poboación e permitirán complementar proxectos liderados por concellos no eido da conciliación.  

 A presidenta sinalou a importancia de favorecer a conciliación e a corresponsabilidade. "Os datos dos primeiros estudos realizados durante a crise sanitaria non arroxan ningunha dúbida: maioritariamente os coidados, que se converteron na prioridade absoluta , seguiron estando nas mans das mulleres que asumen o 75 % desta labor". Carmela Silva tamén amosou a súa preocupación pola volta atrás que poida supoñer a COVID-19 para as mulleres. "Costounos moito saír do privado para ocupar o público e unha pandemia non poder facer que as mulleres sexamos as que teñamos que volver cara atrás". Neste eido, a presidenta da Deputación anunciou que, nese eido, tamén, se vai impulsar desde a Deputación unha xornada relacionada co teletraballo con perspectiva de xénero.

PONTEVEDRA

A Deputación de Pontevedra pecha a Comisión da COVID-19 co acordo dos tres grupos políticos para manter o consenso e os mecanismos de relación  

Goberno e oposición acordan establecer unha reunión mensual para poñer en común decisións, propostas e acordos cara á busca de pactos para a provincia

A Deputación de Pontevedra pechou este venres a Comisión de Seguimento da Covid-19 

Foto: D.PO.

Infogauda / Pontevedra

 Man tendida, manter os mecanismos de relación e vocación de pactos nos temas importantes para a provincia. Con esta declaración de consenso dos tres grupos políticos da corporación, a Deputación de Pontevedra pechou este venres a Comisión de Seguimento da Covid-19, que desde o establecemento do estado de alarma, reuniu semanalmente a goberno e oposición para pactar todas as medidas que se tomaron na institución cara a paliar a crise sanitaria.  

 A presidenta, Carmela Silva, o vicepresidente, César Mosquera, e o portavoz do PP, Jorge Cubela, expresaron de forma unánime a vontade de manter os canles de relación, de modo que se establecerá unha reunión mensual dos tres grupos para buscar acordos, analizar propostas e consensuar medidas, "polo interese da xente e da provincia". Carmela Silva agradeceu "esta nova forma de facer política, que funcionou moi ben durante este tempo, e que queremos manter para seguir tomando decisións con sensatez, eficacia, prudencia e co maior acordo posible". Pola súa banda, o portavoz do PP, Jorge Cubela, ofreceu seguir "coa man tendida e estudiar a posibilidade de chegar ao maior número de pactos posibles nos temas importantes para a provincia".  

 Os tres grupos tamén concordaron na posibilidade de poñer en marcha outras fórmulas de relación dos grupos coa realización de visitas institucionais de toda a corporación a aqueles centros de importancia dependentes da Deputación, "a fin de que todas as deputadas e deputados do goberno e da oposición, coñezan en profundidade a situación e actualidade de cada un deles".  

 Na última reunión da Comisión de Seguimento da Covid-19 fíxose un repaso das medidas tomadas nos últimos tempos en relación á crise; dos avances da Comisión Técnica de Asistencia aos Concellos, "que funciona a moi bo ritmo con respostas e propostas nas que xa se está traballando, e que se poden ver no espazo web habilitado cos municipios da provincia". Tamén, a presidenta deu conta á oposición dos novos temas nos que se está a avanzar, como a nova Liña de Axudas aos Concellos para a Conciliación e Corresponsabilidade; do Protocolo da Rede Agora ao que terán que adherirse os concellos que o desexen; das circunstancias do traballo en remoto; e dos avances do Período Medio de Pago na Deputación, "que despois dos esforzos feitos para pagar canto antes ás empresas provedoras, reduciuse ata os 7 días. Estamos moi satisfeitas". Na reunión, o vicepresidente, César Mosquera, tamén explicou as grandes liñas do proxecto TROPOS, produto dun longo estudio, que nace co obxectivo de modernizar e mellorar os procesos selectivos e modificar o sistema de acceso á Administración, a fin de valorar máis as competencias das persoas aspirantes e non a memorización.