MADRID

"LUME DE BIQUEIRA: 20 ANOS DE MÚSICA", EXPOSICIÓN RETROSPECTIVA NA CASA DE GALICIA DURANTE O MES DE DECEMBRO  

· A banda de música afincada en Madrid, pecha con este acto as súas dúas primeiras décadas de existencia  

Directivos d músicos de Lume de Biqueira pousan co delegado da Xunta de Galicia en Madrid, José Ramón Ónega, Pilar Falcón e Carlos de Blas

Fotos: Casa de Galicia

Infogauda / Madrid

 Países como Irlanda, Francia, Reino Unido, Lituania, ou China, ademais de multitude de cidades en España converteron a Lume de Biqueira nunha das bandas celtas máis internacionais e activas do panorama actual. A súa xa longa traxectoria queda recollida na exposición fotográfica retrospectiva "LUME DE BIQUEIRA: 20 ANOS DE MÚSICA", que se inaugurou onte á tarde e coa que a banda pecha os actos conmemorativos do vixésimo aniversario da súa fundación, en 1998; e que poderá verse na Casa de Galicia ata o día 30 deste mes. 

 O delegado na Xunta en Madrid, José Ramón Ónega foi o encargado de presentar o acto no que interviñeron o coordinador da  Enxebre Orde da Vieira, Carlos de  Blas; a presidenta do Club de Xornalistas Galegos en Madrid, Pilar Falcón; así como os integrantes de Lume de Biqueira, Ángel Hernando e Fernando Molpeceres, que interpretaron algunhas pezas musicais da banda. 

De esq. a der.: Carlos de Blas, Pilar Falcón, José Ramón Ónega, Ángel Hernando e Fernando Molpeceres, na inauguración ofical da mostra de LUME DE BIQUEIRA 20 ANIVERSARIO

 “20 anos non son nada, ou son moito”, dixo Ónega, “porque a música, ese agasallo de Deus aos homes, naceu para dar sentido á vida, para alegrarnos a existencia, para durmir ao bebé no seu berce, para levantar o ánimo e serenar a conciencia”. E citando a Aristóteles sinalou que “a música  purifica as paixóns e provoca nos humanos unha alegría inocente e pura”. Lembrou tamén que para Pío  Baroja, “A música é un arte que está fóra dos límites da razón: está por baixo e por encima de ela”.  

 Para Carlos de Blas, “sodes formidables, por todo. Por demostrar que a gaita pode estar con todas as músicas do mundo, aínda cando se vos tachou de pouco ortodoxos. Picasso demostrou que sabía pintar e logo fixo o que lle deu a gana. Vós tamén”, e animounos a que sigan sorrindo cando tocan porque transmiten “esa alegría que contaxia”. Ademais, dixo de  Blas, “sodes un exemplo para as colectividades galegas, por lanzarse a comprar un local, que custou uns cartos que non todo o mundo tiña. ¡Ole, por todo! ¡Sodes formidables!”. 

 Para Pilar Falcón, “Lume de  Biqueira é o mellor exemplo de Marca España con sentimento e identidade galega. Convosco  plañe a gaita no ceo máis universal”. 

 Para Fernando Molpeceres, “nestes 20 anos pasaron moitas cousas. Os primeiros foron duros pero con empeño chegamos ata aquí e pretendemos cumprir outros vinte máis”. E engadiu que “esta exposición está pensada en base ás emocións”, tanto as das vivencias persoais, como as das musicais. 

 Pola súa banda, Ángel  Hernando, non tivo máis que “palabras de agradecemento a todas cantas persoas fixeron posible esta mostra” e fixo un chamamento a que “gocen dela coa mesma emoción coa que foi montada”. 

De esqda. a der.: Óscar Fenández, Clara Palomares, Almudena Rodríguez, Diego Hernando, Fany Prada, Cristian Díaz, Manu Alcántara e o profesor Fernando Molpeceres, na actuación trala inauguración

 A mostra recolle numerosas imaxes; unha vitrina con placas e galardóns recibidos de diferentes institucións; as esculturas que conmemoran os 20 anos, realizadas con material reciclado polo artista Pedro Ayuso; os discos da banda, logotipos, pezas de comercialización, un completo audiovisual e un espazo para render homenaxe “aos que xa non están e formaron parte das nosas vidas”. Todo iso para facer un repaso da  ampla traxectoria que converteu a Lume de Biqueira (cuxo nome evoca a faísca que salta ao chocar contra o chan a punteira metálica dos zocos de outrora), “na banda de gaitas máis heterodoxa e probablemente espectacular do panorama actual da música celta en España, ademais da súa xa mencionada proxección internacional”. Desde o ano 98 evolucionou ata consolidar un estilo de fusión único, que podería denominarse Música Celta Latina, coa incorporación de instrumentos como baixo eléctrico, guitarra, violín, percusión caribeña... e que lle valeu para ter sempre unha gran acollida e entusiasmo en cuantos festivais participou, relacionándose con outras formacións de medio mundo, como ocorreu este verán en China, no International Wind Music Festival. 

 Lume de  Biqueira compóñena 60 músicos, e 40 alumnos que estudan gaita, percusión e iniciación á música os máis pequenos. Pertence á asociación Albedro, ten a súa sede social no número 254 do Paseo de Estremadura de Madrid, e conta con 150 socios que son quenes financian todas as actividades.  

 Para escoitalos ou máis información premer eiquí.