SANIDADE

A Plataforma en Defensa da Sanidade Pública da Área de Vigo – SOS Sanidade Pública, apoia a Xunta de Persoal da área sanitaria e “SOS Meixoeiro”

E a Manifestación do 22 de xuño, ás 8 da tarde desde a entrada do Hospital Meixoeiro

A imaxe corresponde á xuntanza do mércores no hospital

 A Plataforma en Defensa da Sanidade Pública da Área de Vigo – SOS Sanidade Pública, reunida o mércores 8 de xuño de 2016, no Hospital do Meixoeiro, acorda facer público o seu apoio ao peche que se está a realizar no Hospital do Meixoeiro desde o 1 de xuño, convocado pola Xunta de Persoal da área sanitaria e “SOS Meixoeiro” e a Manifestación do 22 de xuño, ás 8 da tarde desde a entrada do H. Meixoeiro, por coincidir cos motivos da convocatoria:  

• Apertura de tódalas camas de hospitalización. 

• Apertura da Unidade de Críticos. 

• Contra as derivacións á sanidade privada. 

• Por un plan de choque contra as escandalosas listas de espera. 

 A Plataforma SOS Sanidade Pública de Vigo xa ten expresado que a reordenación da área sanitaria debería basearse na integración de todos os recursos asistenciais para evitar a fragmentación e descoordinación entre centros, servizos e niveis asistenciais e na creación de novos recursos para completar unha oferta asistencial racional e axustada ás necesidades e ao volume de poboación. 

 Tendo en conta a visión global dos recursos dispoñibles na área sanitaria, para o Hospital do Meixoeiro a Plataforma SOS Sanidade Pública de Vigo reclama: 

• Manter o seu funcionamento como hospital xeral programado aínda que sen porta de urxencias, recuperando as camas e recursos recortados. 

• Concentrar a actividade oncolóxica neste hospital aproveitando e axustando a dotación tecnolóxica específica xa dispoñible neste centro para atender estas patoloxías, convertendo ao CHUVI en referencia Oncolóxica para o sur de Galicia. 

• Situar neste centro todos os recursos de Cirurxía Programada (Maior Ambulatoria e con Ingreso) da área, aproveitado os seus quirófanos e as camas cirúrxicas (axustándoas segundo necesidades) e creando unha unidade de atención a pacientes críticos polivalente. 

• Consolidar a Unidade de Coidados Paliativos (co 100% das camas situadas en habitacións individuais).  

• Esta especialización determina a necesidade de manter unidades de diagnóstico por imaxe e laboratorio. 

 Por estas razóns, a Plataforma SOS Sanidade Pública de Vigo fai un chamamento á cidadanía da área sanitaria a que participe na Manifestación do 22 de xuño e apoie o peche que se está a realizar estes días no H. do Meixoeiro.  

 Vigo, 9 de xuño de 2016 

Plataforma SOS Sanidade Pública de Vigo