PONTEVEDRA

A Deputación cubrirá todos os custes salariais dos bolseiros, así como os de recoñecemento médico e formación en prevención de riscos

MIL TITULADOS ESTÁN XA INSCRITOS PARA AS BOLSAS DO PLAN DE PRÁCTICA LABORAL EN EMPRESAS, QUE MANTÉN ABERTO O PRAZO ATA O 12 DE NOVEMBRO

Mil mozos e mozas titulados están xa inscritos para acceder ás bolsas do Plan de Práctica Laboral en empresas posto en marcha pola Deputación de Pontevedra. Os bolseiros teñen de prazo ata o vindeiro 12 de novembro para presentar as súas solicitudes e acceder a unha das 424 bolsas convocadas, que lle darán acceso a un ano de traballo nunha das 379 empresas que participan no programa.

A Administración Provincial, tal e como anunciou esta mañá o seu presidente, Rafael Louzán, non só cubrirá todos os custes laborais dos bolseiros, senón que tamén sufragará os gastos dos recoñecementos médicos e dos cursos de formación en prevención de riscos laborais que deben realizar.

A necesidade de cubrir estes gastos púxose sobre a mesa na xuntanza que onte mantivo Rafael Louzán cos responsables das empresas participantes no plan, na que o titular da Deputación pediu a “confianza” dos empresarios nesta administración á hora de adecuar o perfil dos bolseiros ás necesidades da empresa.

Nesta liña, o presidente da Deputación amosouse convencido de que se cubrirán con éxito todas as prazas (malia que hai casos coma os de técnicos informáticos para os que se solicitan 8 bolseiros e só hai 1 inscrito nas oficinas de emprego da provincia) e o programa rematará coa contratación laboral de bolseiros.

Na xuntanza, tamén se lle explicou ás empresas que no caso de que o bolseiro que se lle adxudique renuncie á praza, o posto será cuberto polo seguinte aspirante a ese mesmo posto e que quedara en lista de espera, mentres que se é a empresa a que renuncia ao bolseiro, este poderá ser recolocado noutra se hai un posto que se adapte ao seu perfil.

En canto á posibilidade de que algún posto quede sen cubrir por falta de candidatos co perfil demandado, a empresa afectada poderá elixir outro perfil, sempre e cando corresponda cunha das titulacións para a que se convocaron prazas.