SILLEDA

“Non queremos unha Galicia á nosa medida, senón un partido á medida de Galicia”

Rafael Louzán inicia un novo mandato cunha firme aposta pola política de proximidade e o reforzo do municipalismo

·        Destaca a unidade como gran patrimonio do PP, porque “para tirar cada un para un lado xa temos a outros partidos”

·        Criticou a dobre moral de socialistas e nacionalistas que criticaban a moción de Silleda e agora xuntan en Ponteareas “extrema dereita e extrema esquerda” para botar do goberno á lista máis votada

·        Amosou a súa solidariedade cos afectados polas preferentes, aos que asegurou que só teñen un aliado: o PP

Infogauda / Silleda

  Cunha aposta pola política de proximidade inicia Rafael Louzán o seu quinto mandato ao fronte do Partido Popular provincial de Pontevedra, despois de ser reelixido co 97,1 % dos votos no XVI Congreso Provincial celebrado esta mañá en Silleda.

Louzán centrou a súa intervención na unidade e a cohesión do Partido Popular e na súa clara vocación municipalista que, tal e como subliñou, cobra un especial significado en momentos coma o actual, cando os alcaldes e alcaldesas están vivindo un dos peores momentos, non só por ter que facer fronte cada día a máis demandas con menos recursos, senón porque son tamén “o branco fácil” para os axitadores e manipuladores.

Neste sentido, o reelixido presidente provincial quixo enviar unha mensaxe de apoio e de ánimo a todos, asegurando que a súa labor “merece o maior dos respectos”. “É hora de darvos as gracias, dixo, por estar sempre aí e por estar dando a cara en todo momento”.

Louzán lembrou que só o PP está centrado en resolver os problemas da xente, e faino desde a unidade e a cohesión, porque “para tirar cada un para un lado xa temos a outros partidos. Nós temos que ser o que somos: un partido unido e cohesionado, porque cando hai unidade hai tempo para resolver os problemas da xente”.

No polo oposto situou aos socialistas e nacionalistas, perdidos uns en looitas internas e en tratar de “botar a Paschi Vázquez, que non se vai nin con auga quente”; e outros en “soberanismos e independentismos” que os galegos non reclaman.

Porque o que toca agora, salientou é atender aos problemas da xente. Pero “mentres o PP traballa para que os problemas non leven por diante ao país, socialistas e nacionalistas traballan para levar por diante ao PP aínda que se teñan que cargar o país e as súas institucións”.

 Dúas formas de facer política

Así, incidiu en que en Galicia e en España hai dúas formas de ser político e dúas formas de estar en política: a do Partido Popular, onde “nos gusta darlle ao país o que precisa e non o que nos convén, tomar decisións adaptadas á realidade e non adaptar a realidade á nosa conveniencia” e que non quere “unha Galicia á nosa medida, senón un partido á medida de Galicia e da súa xente”, e a das grandes farsas do PSOE. Dos que din “que son o progreso e son os maiores xeradores de paro da historia deste país; falan de igualdade e fan unha moción de censura en Ponferrada cun condenado por acoso sexual; agora esixen que pague máis quen máis ten, e son os mesmos que no goberno socialista de Zapatero eliminaron o imposto do patrimonio”.

Nesta liña, aproveitou a celebración do Congreso en Silleda para lembrou a dobre moral do PSOE, que cando se produciu a moción de censura nese concello, aseguraba que “o que o pobo pon só o pobo o quita” e só dous anos e nedio máis trata de pactar en Ponteareas para quitarlle o goberno ao partido que contou co apoio maioritario dos veciños.

A voz dos feitos

Finalmente, e despois de agradecer a toda a militancia, “aos máis de 34.000 afiliados que conforman esta gran familia”, a confianza no partido, -nha confianza, dixo, que ven dos feitos e que é a que fai que sexa o PP e non outros o que gañe as eleccións-, Louzán comprometeu o seu traballo e o de toda a nova cúpula directiva para “non defraudarvos nunca”.