ARZÚA

E O MAGO TETO NO DOMINGO
Grande éxito na primeira xornada da VIII Feira Ecolóxica de Arzúa

Na imaxe, participantes no cursiño de cociña dietética chinesa

Jéssica Beiroa / Arzúa

Procurando algún produto, aprendendo cociña dietética chinesa, facendo coaching creativo ou atendendo á vontade dos medios de comunicación en galego de que a información na nosa lengua se reforce, “Vitaminas para o galego”, por non falar do éxito de Espido foron foron algunhas das actividades máis importantes da primeira xornada.

Malia as inclemencias meteorolóxicas, foron moitas as persoas que se achegaron ao Recinto Feiral Terra do Queixo para gozar cos obradoiros, conferencias e demostracións en directo, ademais de poderen mercar de forma máis xusta os agasallos para este Nadal.

Presentación da VIII edición da Feira ecolóxica máis grande de Galicia

Ademais, aínda queda outro día para poder visitar a Feira, con máis de 20 propostas das que poder gozar, aprender e achegarse a un xeito de entender a vida máis respectuoso coa contorna. Deste xeito, un roteiro por Portodemouros ás dez e media da mañá, obradoiros de elaboración de queixo para nenos e maiores, teatro con Peter Punk e o Neno Imperdible…

Ademais, un xantar poplar ás dúas e media do mediodía, amenizado polos grupos da comarca “Cantareiras de Arzúa”, dará paso a unha tarde repleta de actividades, entre as que se atopan o teatro infantil ás cinco con Bagunça Teatro, o Mago Teto ás sete e media e diversas demostracións, completan un amplo programa para todos os públicos e todas as idades.

ARZÚA

A meirande feira ecolóxica de Galicia
17 e 18 de decembro en Arzúa

Jéssica Beiroa / Arzúa

Esta mañá veu de renovarse o “compromiso do Concello de Arzúa cos valores da ecoloxía e o medioambiente”. Así o salientou o alcalde do municipio, José Luís García López, que estivo acompañado pola concelleria de Medio Ambiente, Natalia Pereira Rey, e Manuel Roxo, desde Coperactiva Cultural, na presentación da VIII edición da Feira Ecolóxica arzuana, a celebrar no Reninto Feiral Terra do Queixo os días 17 e 18 de decembro.

Neste sentido, o rexedor indicou que a proposta 2011 aposta “por unha programación centrada no respecto á Terra, á educación ambiental e á posta en valor da nosa cultura tradicional” tanto no que se refire á relación coa natureza como á relación entre as persoas (referíndonos á nosas expresións culturais tradicionais e modos de produción e comercio), indicou. “Estamos a falar da programación máis comprometida do país neste sentido, e das máis comprometidas de todo o Estado”, quixo subliñar García López.

Serán 2 días nos que “poderemos soñar e crer en termos un tanto desacreditados como a idea de sostenibilidade, de respecto á Terra”, engadiu, ao tempo que “poderemos coñecer novas experiencias novedosas no camiño da reutilización, do aforro enerxético, da reciclaxe…”, concluía o alcalde.

Reducir, Reciclar e Reutilizar

Este é o lema deste ano. 3 termos que “nunca deberían caer no esquecemento” e “cada vez máis necesarios á par que esquecidos”, apuntaba García López, quen indicou que “desde o Concello e a Feira Ecolóxica queremos volver facer fincapé neles, máis ainda nas datas nas que nos atopamos”, nas o “consumo cobra un protagonismo que non entende de Redución, nin de Reciclaxe nin de Reutilización”, matizaba José Luís García.

“Terractiva non é un centro comercial”

Ao fío das palabras do rexedor arzúan se expresou Manuel Roxo, responsable de organización por parte de Coperactiva Cultural (entidade xestora da Feira). Neste sentido, indicou tamén que estamos “diante dunha alternativa de consumo directa e sen intermediarios” e que procura ser “respectuosa coa contorna e a cidadanía”.

Implicación da comarca, formación e lecer activo e respectuoso

Os grupos de música tradicional da comarca como as Cantareiras de Arzúa, Os Melidaos e o grupo de gaitas de Castro Curbín darán boa conta de pasarrúas, ambientación da feira e do xantar popular amenizando a Feira e as rúas de Arzúa, “co que se reactiva a implicación das veciñas e veciños da zona” sen esquecer os grandes Espido e Xabier Díaz e Cé Orquestra Pantasma.

Pola súa banda, e tal e como indicou Natalia Pereira, concelleira de Medio Ambiente, nesta oitava edición da Feira Ecolóxica de Arzúa, outro dos pratos fortes que podemos destacar desta edición da Feira ecolóxica de Arzúa é o apartado formativo, ofertando este ano a totalidade de 11 obradoiros durante a fin de semana cunha ampla variedade de temáticas, abríndose á participación de máis persoas. Entre eles podemos atopar biodanza, cociña vegana e dietética chinesa, consumo responsable, coaching creativo, elaboración artesanal do queixo e a manteiga..., etc.

Ademais, o Mago Teto con “O afiador” (maxia), Bagunça teatro con “Que máis da!” (teatro forum), Babaluva con “Lume” (títeres e contacontos), Os sete magníficos máis un con “Policías tolos” (Clown, animacións teatrais), Avelino González (Miñato en Padre Casares) cun contacontos e Peter Punk con “Peter Punk e o neno imperdible” (Clown, humor e malabares) son só algunhas das mellores propostas de lecer na fin de semana da Feira Ecolóxica.

ARZÚA

17 e 18 de Decembro

8ª FEIRA ECOLÓXICA DE ARZÚA

Jéssica Beiroa / Arzúa

O Excmo. Concello de Arzúa e Coper@ctiva Cultural presentarán o próximo martes 13 de decembro ás 12 horas, no Telecentro de comunicación de Arzúa sito no Edificio multiusos, na rúa de Lugo nº 47, á 8ª Feira Ecolóxica de Arzúa, que se celebrará os días 17 e 18 de outubro no Recinto Feiral da mesma localidade (rúa Travesía da Feira s/n).
Intervirán: o alcalde do Excmo. Concello de Arzúa, José Luís García López, a concelleira de Medio Ambiente do dito municipio, Natalia Pereira Rey e o responsable de organización do festival, Manuel Vicente.

Arzúa converterase de novo nun grande mercado verde onde se darán cita perto de medio cento de expositores/as de produtos ecolóxicos, mediciñas alternativas, colectivos sociais, postos de artesanía...

Ademais, un amplo catálogo de actividades entre as que se inclúen obradoiros formativos, exposicións, charlas, teatro unha ampla programación infantil..., desenvolverase parello á feira para lograr unha maior implicación social coa ecoloxía e o medio ambiente.

Actividades para todos os públicos que, un ano máis, converten Arzúa no epicentro ecolóxico galego.

ARZÚA

MEDRANDO NA COMARCA

Preto de catro mil persoas pasaron pola VII Feira Ecolóxica de Arzúa

Malia a chuvia, a segunda xornada da VII Feira Ecolóxica de Arzúa foi “un éxito de público”. Esas son as palabras da coordinadora do evento, Txeli Vicente, quen ademais destacou a grande implicación do público nas diversas actividades que se celebraron ao longo de todo o día.

Jéssica Beiroa / Arzúa

Foron preto das 4.000 persoas as que pasaron polo recinto multiusos Terra do Queixo durante a fin de semana. Esta cifra confirma a boa saúde da programación que, despois de sete anos, é xa un referente na axenda do outono arzuán. Mais non só. Persoas de toda Galicia e do Estado, así como de outras nacionalidades, reuníronse este ano na Feira para visitar e coñecer máis sobre produtos ecolóxicos e terapias alternativas.

O alcalde da vila, Xaquín García Couso, visitou, ao igual que na xornada do sábado, o recinto feiral. El, ao igual que a coordinadora destacaron o enorme éxito que supuxo a programación, tanto polo que respecta aos produtores locais como no que ten a ver co movemento de colectivos e produtores de fóra, convertendo Arzúa nun grande centro do comercio sustentábel.

Máis presenza da comarca

O grupo de gaitas de Castro Curbín e as cantereiras de Arzúa participaron activamente na Feira. Cunha animación pola mañá e durante o xantar popular, ademais de ser parte tamen dos concertos do serán, esta edición contou coa maior implicación dos grupos de música da bisbarra.

Dado que todos os anos é moi boa a acollida que a programación ten entre a bisbarra “é de recibo que estes grupos estean nun punto de encontro de tantas persoas como é a Feira”, remarcou Txeli Vicente.

Non podemos esquecer as visitas guiadas feitas –por primeiro ano- polo Centro do Queixo e do Mel e a primeira exposición de debuxos na que participaron os e as alumnas dos CEIP de Arzúa e Nosa Señora do Rosario (Atocha).

ARZÚA

FEIRA ECOLÓXICA

Constátase o interese pola ecoloxía na primeira xornada da sétima edición

Jéssica Beiroa / Arzúa

A esta primeira xornada da Feira Ecolóxica de Arzúa achegouse un público moi interesado nos produtos ecolóxicos e demais xeitos de entender a vida fuxindo do consumismo masivo e abusivo co Planeta. Foron moitas as persoas que se dirixon ao stand da organización preguntando por actividades concretas dando paso cada vez a un visitante cada vez máis especializado.

Nas preto de 1500 persoas que pasaron polo centro multiusos Terra do Queixo non se pode esquecer a participación de público familiar chegado da bisbarra arzuana, un dos grandes sectores de visitantes desta programación todos os anos. Esta diversidade é a que o festival procura, achegando un outro xeito de entender a relación coa contorna.

O éxito de participación foi un dato tamén moi valorado polo alcalde de Arzúa, Xaquín García Couso, que visitou a feira en dúas ocasións. Ademais, o rexedor arzuán destacou a participación das e dos veciños da vila nesta Feira e valorou “moi positivamente” a primeira xornada. O alcalde tamén expresou o desexo de que este éxito de participación se repita mañá.

A coordinadora da Feira Ecolóxica de Arzúa, Txeli Vicente, destacou a participación nos distintos programas formativos postos en marcha durante a primeira xornada do festival
Foron varios os obradoiros os que colgaron o cartel de completo a falta de varias horas para a celebración dos mesmos. Deste xeito, “confírmase que a aposta pola formación é un valor seguro neste o único festival ecoloxista de Galicia”, afirmou a coordinadora do mesmo.

Ademais do éxito formativo, o público infantil tamén protagonizou o primeiro día da Feira, xa que, ademais dos obradoiros que se programaron para eles, foi moi numerosa a participación nos xogos que, tanto a Asociación Galega do Xogo Popular e Tradicional como Guixot de 8, puxeron en marcha durante todo o día.

ARZÚA

Arzúa, a “capital” galega dos produtos naturais

Terractiva / Arzúa

Xa se presentou a sétima edición da meirande feira ecolóxica de Galicia. Tanto o alcalde de Arzúa, Xaquín García, como a coordinadora do festival, Txeli Vicente, deron en destacar a importancia de que a vila coruñesa se convirta na “capital dos produtos naturais”, ademais de resaltaren os diversos eidos da programación da Feira.
En palabras do rexedor arzuán, o recinto feiral “Terra do queixo” será nos días 2 e 3 de outubro o referente no que a mercado verde se refire, feito que valorou moi positivamente. Pola súa banda, Txeli Vicente resaltou o feito de que a Feira “non deixa de medrar cada ano”, tanto en variedade de propostas como en calidade das mesmas.Ademais, fixo alusión a que “o sete é un número máxico” e que “estamos traballando para que esta edición así o sexa”. Neste sentido, indicou que a Feira ecolóxica de Arzúa non é un festival ao uso, unha cita na que simplemente se reúne xente para asistir a un concerto ou a unha actuación teatral e que ampouco é só unha feira na que o obxecto sexa mercar e vender, senón que é a suma de persoas que, con “conciencia ecolóxica” viven e traballan pola sustentabilidade do territorio.Máis oportunidades de participación A diversidade, a conxunción de saberes e prácticas e, sempre, a conciencia ecolóxica marcan as liñas sobre as que se sostén esta proposta. O alcalde arzuán chamou a veciñanza a asistir ao evento, ao igual que a coordinadora do mesmo.Máis variedade, menor duración e prezo dos obradoiros Formaterra, diversidade de outras propostas formativas (instrumentos tradicionais, cociña vegana, regueifas) ou xogos tradicionais durante toda a fin de semana son algunhas chaves que abren as portas á participación de todos os públicos na sétima edición da Feira.Xunto con isto, a implicación da comarca arzuana será este ano moito máis fonda, xa que as cantareiras de Arzúa e o grupo de gaitas de Castro Curbín estarán durante o xantar e o peche da Feira amenizando a mesma, co que “o tecido social desta programación se fai máis forte”, indicaba Txeli Vicente.Un grupo de música, Clave de Sol, que obtén a enerxía para os instrumentos de placas solares fotovoltaicas, a estea de “Mañá será outro día” da compañía galega de clown “Os Sete Magníficos máis Un” especialmente para nenos/as e de temática ambiental ou a maior presenza de cooperativas alimentares na Feira completan a ampla proposta da Feiractiva 2010.

Programa en PDF, para o sábado día 2 de Outubro.

Programa en PDF, para o domingo día 3 de Outubro.

ARZÚA

A meirande feira ecolóxica de Galicia
2 e 3 de outubro en Arzúa

Jéssica Beiroa / Arzúa

Feiractiva é un espazo vivo. Produtos ecolóxicos, mediciñas alternativas, solucións de comercio xusto para atallar as prácticas de consumo prexudiciais coa Terra… Así até perto de 50 propostas volveranse a dar cita en Arzúa para amosarse, para que o público as vexa, as identifique, as poida catar, adquirir e incorporar á súa vida diaria.

Ademais de poder mercar produtos e/ou servizos ecolóxicos, sostibles e a prol da biodiversidade, diversas demostracións en directo da elaboración dos mesmos darán conta das posibilidades que ofrece esta alternativa ás propostas que manexamos habitualmente, ben sexa en coidado e saúde do corpo, en materia alimentaria ou de relación mesma coa contorna.

Outras relacións comerciais, de sanación, do vestido e calzado e de alimentación son posibles e na Feiractiva terás acceso a elas. Profesionais, artesáns, persoas con experiencia e con anos de formación ás costas poranas ao teu alcance na maior Feira ecolóxica de Galicia.

Xunto con isto, nesta proposta teñen un papel crucial as persoas que, dous días ao mes durante moitos anos, levan dinamizando o comercio de produtos locais da horta e da casa en Arzúa. Son as que participan nas feiras do 8 e do 22 e que teñen o seu espazo na Feiractiva porque esta feira é unha mestura de saberes e procederes arredor do consumo para a alimentación, o vestido, o adubío e a vida en xeral.

Ademais, e dado que a produción tradicional ten moito a ver co respecto á naturaza, os ciclos naturais, a sostibilidade… etc, conceptos básicos que coinciden ao cento por cen coa filosofía coa que naceu a Feira ecolóxica de Arzúa, é de recibo que participen dela.

A coidada selección de expositores/as para que as propostas coas que o público se atope sexan variadas e novedosas, a vontade de manter un equilibrio entre as demais actividades da Feira (teatro, música, exposicións, conferencias…) e o carácter familiar e aberto da mesma fan deste encontro unha cita a non perder no outono galego, ademais de constituíren o único festival ecoloxista do país.

SECCIÓNS

A. Feiractiva
Abre de novo as súas portas o maior mercado verde de Galicia no que perto de 50 expositores amosarán os seus produtos, traballos... Nela congregaranse produtores ecolóxicos, comercio xusto e ecoturismo, medicinas alternativas, artesanías... Ambos os dous días en horario de mañá e tarde.

B. Formaterra:

Actividades formativas en terapias alternativas, tales coma ioga, arteterapia, relaxación, reiki e coñecemento persoal, entre outras.

Ademais destes que se veñen de nomear, dentro da Feira Ecolóxica de Arzúa realizaranse outros obradoiros gratuítos, tales como o de cociña vegana, a cargo da asociación Caleidoskopio, ou o de regueifas e instrumentos tradicionais, impartidos por membros de Regueifa e Alg-@ e Os Alegres, respectivamente, dos que a organización irá dando conta por diversos medios.

C. Música:

Sección musical cunha programación comprometida coas tendencias musicais máis comprometidas coa contorna e más respectuosas coa biodiversidade cultural do país.

D. Teatro:

Espectáculos de diferentes modalidades escénicas que teñen como nexo de unión o medio ambiente e a ecoloxía.

E. Altofalante:

Conferencias, exposicións, documentais, encontros... unha diversidade de actividades neste espazo para a denuncia e aberto á participación.

F. Programación Infantil:

Durante toda a fin de semana, as e os nenos poderán gozar cos xogos tradicionais, con outros feitos a partir de materiais reciclados a cargo de Guixot de 8, con teatro especialmente pensado para eles, cos contacontos, a ciclobiblioteca, e os libros de Anxo Moure...

G. Xantar popular:

O domingo, a partir das 14:30 terá lugar unha fermosa romería-serán con empanada, polbo, churrasco e incluso menú vegano,... e todo acompañado polas Cantareiras de Arzúa, o grupo de gaitas de Castro Curbín e varios Regueifeiros que farán do xantar unha festa popular

A. FEIR@CTIVA
Medio centenar de expositores amosarán e venderán os seus produtos e traballos neste espazo de carácter activo e dinámico que, a maiores da divulgación e da venda, acollerá ao longo de toda a fin de semana actividades a cargo dos/as expositores/as que perseguen a participación e a implicación activa do público.

O recinto feiral de Arzúa converterase nun lugar idóneo para o encontro e intercambio de produtos, ideas, experiencias..., etc, no que se congregarán produtores biolóxicos, ecolóxicos, tendas e empresas ecolóxicas, artesáns, medicinas alternativas...

Lugar: Recinto Feiral sito na Rúa Padre Pardo s/n.
Días: sábado 2 e domingo 3 de outubro

Horario: de 11.00 a 14.30 e de 17.00 a 21.30. sábado
Horario: de 11.00 a 14.30 e de 17.00 a 21.00. domingo
Mercado verde: exporanse e comercializaranse unha diversidade de produtos biolóxicos, ecolóxicos e alternativos, que supoñen unha opción alternativa ao modelo de consumo nocivo sobre o contorno natural e social.

Área solidaridade - movementos sociais: diversos colectivos sociais galegos que traballan no ámbito da acción social e o compromiso coa cultura e a biodiversidade darán a coñecer a súa actividade nos roteiros da cooperación ao desenvolvemento, o comercio xusto, a ecoloxía, a autoxestión... a os/as visitantes da feira.

Terapias alternativas + Artesanía: sete obradoiros formativos en terapias alternativas e diversos postos de artesanía completan a proposta da Feira. Deste xeito, o Formaterra e a posibilidade de adquirir os produtos feitos do xeito máis artesanal están presentes un ano máis neste encontro arzuano.

Demostracións + degustacións: o público da feira poderá gozar ao longo da fin de semana de actividades como demostracións de terapias alternativas á medicina convencional (naturopatía,...), oficios artesanais e degustacións de produtos ecolóxicos e artesanais (viños, queixo, confituras, licores...)
Todas as demostracións e degustacións estarán guiadas por expertos que participan en Terractiva.

Aproveitando a celebración de Terractiva, O Centro do Queixo e do Mel súmase a esta iniciativa abrindo as súas portas e dándonos a oportunidade de coñecer a cooperativa Erica Mel que organizará visitas ás súas instalacións en diversos horarios durante toda a fin de semana. Os interesados que acudan a esta cita co mundo da apicultura e do mel, descubrirán entre outras cousas o funcionamento e organización da cooperativa dende dentro, como son os nosos socios e socias, os meles que producen nas diferentes partes de Galicia ou o proceso de selección e control de calidade dos nosos meles. Pero non todo será ver e escoitar, tamén hai que saborear, así que non faltará unha completa degustación de meles. E para rematar cada participante poderá escoller o mel que mais lle guste para envasar o seu propio bote de mel.

ARZÚA

REMATA CON ÉXITO A FEIRA DE TERRACTIVA DESPOIS DE DÚAS XORNADAS DE INTENSA PROGRAMACIÓN

Infogauda / Arzúa

Terractiva, a 6ª Feira ecolóxica de Arzúa, finalizou o domingo despois de dúas xornadas de grande actividade, onde cultura e ecoloxía se deron a man, co fin de reivindicar un futuro mellor para a nosa terra, e frear a degradación que está a sufrir na actualidade por mor da contaminación.Entre as actividades que colleitaron maior éxito durante a fin de semana, cabe destacar os diferentes obradoiros que se celebraron no recinto, como a construcción de fornos solares, (unha alternativa aos métodos de consumo máis habituais), malabares, creación de monicreques ou reciclaxe. As diversas charlas realizadas no recinto, así como a proxección do documental Mashi Trasi que Trasi, de Pallasos en Rebeldía, foron outras das propostas que contaron con grande aceptación.

Os xogos de Guixot del 8, creados todos eles a partir de materiais inservibles e reciclados, foi outra das seccións estrela da feira, contando cun cheo absoluto durante todo o tempo que o recinto de arzúa permaneceu aberto, e facendo as delicias de tódolos nenos que se achegaron ata o lugar.Terractiva deu así fin a dúas intensas xornadas que terán a súa continuación o ano próximo coa que será a séptima edición da que xa é a máis importante feira ecolóxica de Galicia. Un espazo onde apostar por novas enerxías, novos alimentos e novas manerias de entender o noso entorno.

ARZÚA

TERRACTIVA ABRIU AS SÚAS PORTAS CON MÁIS DE MEDIO CENTENAR DE EXPOSITORES

Infogauda / Arzúa

Terractiva, a 6ª Feira Ecolóxica de Arzúa, iniciou este sábado o seu programa na vila, que se prolongará durante toda a xornada dominical. A feira ecolóxica, Feiractiva, o corazón do festival, abriu as súas portas ás 11 da mañá, acollendo a centos de persoas que se achegaron ata o recinto interesadas en coñecer os diferentes produtos e terapias naturais que se ofrecen nos máis de 50 stands presentes na feira. Castañas, mel, queixo, plantas medicinais, así como distintas terapias altenativas e postos de artesanía déronse cita na vila arzuana. Colectivos sociais como Galiza non se vende, Panxea, Amigos da Terra ou Adega, tamén quixeron estar presentes na feira co fin de reivindicar un maior respecto polo patrimonio ambiental de Galicia.

Os asistentes tiveron a oportunidade de presenciar unha demostración de talla de madeira e miniaturas e a fabricación de instrumentos de música tradicionais, así como participar en charlas sobre enerxías limpas e terapias bioenerxéticas. O interés do público fíxose notar especialmente nos diferentes obradoiros celebrados, onde se ensinaba a realizar cociña vegana, cosmética natural, ou carteiras a base de tetrabriks, así como nas varias exposicións que se poden atopar durante toda fin de semana no recinto feiral, como a mostra sobre a pegada medioambiental en Galicia ou os 25 anos de medio ambiente con Xaquín Marín, e que se poderán visitar durante toda a xornada do domingo.

A programación teatral tamén tivo cabida neste primeiro día da feira, coa representación da obra infantil A parábola da rá, a cargo do grupo teatral Malapécora Teatro, facendo as delicias de tódolos nenos presentes no recinto feiral. Xa durante a noite o grupo Os Tres Trebóns encargáronse de poñer a nota musical da festa, co concerto ofrecido durante a noite, e que completou a animación musical do día que correu a cargo de Os Chiquilicuatres.

Recreación da malla e xantar popular

Feiractiva abrirá as súas portas novamente o domingo ás 11. O programa da mañá completarase cunha recreación da malla ás 13:00 h no campo da feira e o posterior xantar popular tamén no campo da feira ás 14:00 onde os asistentes poderán gozar de empanada, polbo churrasco pan e viño, todo elo amenizado polo grupo Os Chiquilicuatres.

Como remate da Feira, o Grupo Teatral Volta e Dalle representará ás 21:00 a obra Pan. Catro propostas arredor da malla, na planta baixa do recinto feiral, catro historias fiadas a través da danza e da música ao vivo, abordarán un tema universal: as mutacións sociais e culturais que conleva a desaparición da economía tradicional agraria.Un ano máis, Terractiva, organizadoa polo Concello de Arzúa coa financiación da Deputación da Coruña e xestionada por Coperactiva Cultural, é unha invitación ao encontro de produtores, colectivos ecoloxistas e público en xeral, co espíritu de relacionarse e aprender, convertindo a vila de Arzúa en asamblea común da xente que respete o noso entorno.

TERRACTIVA, 6ª FEIRA ECOLÓXICA DE ARZÚA

TERRACTIVA 2009 PRESENTA UNHA NOVA EDICIÓN, CARGADA DE ACTIVIDADES

A Feira terá lugar en Arzúa os días 17 e 18 de Outubro

Infogauda / Arzúa

Terractiva, a 6ª Feira ecolóxica de Arzúa, abriu as portas cunha ampla e variada programación onde teñen cabida todo tipo de actividades, dirixidas a lograr unha maior conciencia social, e un maior coñecemento persoal e do entorno que nos rodea.

A feira ecolóxica máis grande de Galicia, conta con máis de 50 expositores, obradoiros, charlas e cursos formativos, ata onde se pode achegar o público co fin de coñecer máis de preto as múltiples posibilidades que ofrecen as enerxías, alimentos e terapias alternativas que ofrecen os distintos expositores.

O gran mercado verde de Terractiva ofrece todo tipo de propostas alternativas, como produtos e cociña ecolóxica, publicacións, artesanía etc, todas elas agrupadas no recinto feiral de Arzúa durante dous días onde o público pode gozar tamén, de degustacións e demostracións artesanais ou presentacións de produtos.

Ademáis, a Feira conta cunha ampla programación de charlas, sobre enerxías limpas, terapias, ou sobre a situación dos cetáceos nas costas de Galicia, así como con exposicións entre as que destacan "25 anos de medio ambiente con Xaquín Marín", unha serie de textos, fotos e gráficos co fin de amosar a grave problemática medioambiental que sofre Galicia, "Cetáceos nas Costas de Galicia", con diverso material osteolóxico, "Antigos soños de mulleres Kichwas", exposición cedida por Paz e Desenvolvemento Galicia ONGD e coa exposición "Pegada ecolóxica galega" onde se analizarán as capacidades de producción do planeta e a demanda dos recursos polo ser humano.

Unha ampla oferta formativa

Ademáis de contar cunha variada presenza de tendas e empresas ecolóxicas, artesáns, medicinas ou terapias alternativas, Terractiva constitúe tamén un importante espazo formativo, que responde ao crecente interés do alumnado por asistir a cursos a través dos que podamos acadar un maior coñecemento de nós mesmos e do medio natural, aprendendo a utilizar de maneira responsable os recursos que nos ofrece a Terra. 5 cursos que darán desposta a diferentes inquietudes e entre os que atopamos bhangra, técnicas de meditación, agricultura ecolóxica, e aromaterapia.

Terractiva constitúe tamén un espazo alternativo, e multidisciplinar, xa que engloba un variado abano de propostas como videoproxeccións continuas, un roteiro polas terras de Arzúa que incluirá entre outras unha visita ás mámoas e petroglifos da zona, un espazo de xogos para os máis pequenos, e obradoiros gratuitos para todos aqueles interesados en aprender novas técnicas coma cociña vegana, radiestesia, contact juggling, reciclaxe, construcción de fornos solares e un obradoiro de creación de monicreques para os máis pequenos. O apartado de Altofalante, un espazo de denuncia, tamén estará presente e abordará a actual problemática medioambiental que afecta á nosa terra e onde se realizará a presentación do libro de manolo pipas "a milpa e o paliacate. nos camiños do outro méxico", o último poemario do autor sobre as comunidades indíxenas e a súa resistencia.

Unha variada oferta para unha das principales feiras ecolóxicas do país, onde todo tipo de propostas teñen cabida. Un festival onde cultura e medio ambiente se dan a man para crear un novo espazo en sintonía coa natureza, e a través do que podemos aprender todas as posibilidades e alternativas que nos ofrece a nosa terra.

*Todo o acceso ao festival será libre e de balde. Só os cursos formativos precisan de abonamento.

ARZÚA

TERRACTIVA CONVOCA UNHA ROLDA DE PRENSA PREVIA A 6ª FEIRA ECOLÓXICA DE ARZÚA

Premer no cartel para pode-lo ler mellor