O ROSAL

San Xoán de Tabagón prepara unha nova edición da Arroutada con música, festa da escuma e gastronomía popular  

•  A iniciativa está organizada pola Comisión de Festas na honra da Virxe da Saúde e San Brais

Ricardo Rodríguez Vicente/San Xoán de Tabagón

 A parroquia de San Xoán de Tabagón, no Rosal, xa conta os días para vivir unha nova edición da Arroutada, unha cita festiva que terá lugar o vindeiro sábado, 5 de setembro a partir das 17.00 horas e que volverá combinar diversión, música e gastronomía nunha tarde-noite pensada para todos os públicos.  

 A iniciativa está organizada pola Comisión de Festas na honra da Virxe da Saúde e San Brais, coa colaboración da Deputación de Pontevedra, a través do programa Culturea, e presenta unha proposta especialmente atractiva para gozar en familia e entre amigos.  

 Entre as actividades previstas destacan os inchables e a Festa da Espuma, que serán totalmente gratuítos, garantindo unha boa dose de diversión, especialmente para os máis pequenos. 

  A gastronomía popular tamén terá o seu espazo nesta Arroutada, con chouripán e pepitos de tenreira a prezos populares, unha oportunidade para repoñer forzas ao longo da xornada mentres se desfruta do ambiente festivo.  

 No apartado musical, a celebración contará coa actuación do grupo Los Atómicos, que poñerá o ritmo á festa, e coa participación dos DJ Diego Wass e DJ Romeu, encargados de prolongar a animación durante a tarde-noite.  

 Deste xeito, San Xoán de Tabagón prepara unha xornada na que a diversión será a gran protagonista, cunha programación aberta a toda a veciñanza e visitantes. A Arroutada preséntase así como unha nova oportunidade para reunirse, desfrutar da música, compartir mesa e vivir o ambiente festivo que caracteriza as celebracións da parroquia do Rosal.