Avanzan as obras no monte Torroso para crear novas infraestruturas ao servizo da veciñanza
• Esta actuación permitirá consolidar e mellorar o aproveitamento dun espazo de grande valor, coa creación de dúas grandes explanadas que suman preto de 4.000 metros cadrados de superficie
Ricardo Rodríguez Vicente/Salcidos
Os traballos de mellora e acondicionamento do monte Torroso, na aba correspondente a Comunidade de Montes Veciñais en Man Común de Salcidos, continúan avanzando coa execución das obras de construción dun muro de mampostería destinado á contención de terras.
Esta actuación permitirá consolidar e mellorar o aproveitamento dun espazo de grande valor para a veciñanza, coa creación de dúas grandes explanadas que suman preto de 4.000 metros cadrados de superficie. Estas novas áreas estarán destinadas a múltiples usos, adaptándose ás necesidades do monte e das persoas usuarias.
Entre os usos previstos atópanse a almacenaxe de madeira, a habilitación dunha zona de aparcamento e a disposición dun espazo polivalente que poderá acoller diferentes actividades e celebracións organizadas pola veciñanza.
O proxecto está sendo executado pola empresa local Vialsa, especialista neste tipo de traballos de construción e acondicionamento, garantindo unha intervención axeitada para mellorar as infraestruturas e dotar o monte Torroso de novos servizos.
Con esta actuación, continúase avanzando na posta en valor do monte e na creación de espazos máis funcionais, seguros e adaptados para o seu aproveitamento colectivo.
Ningún comentario:
Publicar un comentario