DEPORTES

CICLISMO

A Organización de Palangreros Guardeses presenta o II Gran Premio Ciclista Orpagu, con Álvaro Pino 

• O 25 de xullo A Sangriña vólvese encher de bicicletas, dentro da Festa do Peixe Espada, nunha proba que aspira a ser clásica e que conta coa coorganización de Team Oiense  

Celso Rodríguez Fariñas, Juana Parada, Alvaro Pino, Antolín Verde  e Aser Estévez, na presentación do II Gran Premio Ciclista Orpagu

Foto de familia da presentación hoxe, na sede de Orpagu

Mar Bermúdez/A Guarda 

 Xa hai data, xa hai cartel e xa hai padriño. A Organización de Palangreros Guardeses xunto a Team Oiense presentou este mércores o II Gran Premio Ciclista Orpagu, unha proba que se correrá o 25 de xullo ás tres da tarde no circuíto urbano da Sangriña. Cae en plena Festa do Peixe Espada, así que a vila vai estar xa de por si a rebentar. 

 Puxeron cara ao evento o vicepresidente de Orpagu, Antolín Verde, e a directora da entidade, Juana Parada, así como o concelleiro de Deportes e Cultura da Guarda, Celso Rodríguez Fariñas. Ao seu lado, un nome que na Guarda e en media Galicia soa só con dicilo: Álvaro Pino. O de Ponteareas gañou a Vuelta a España en 1986. E non llela regalaron. Por diante deixou a Robert Millar, a Sean Kelly, a Pedro Delgado. E cadra ben: este 2026 cúmprense corenta anos daquela vitoria. Quixo pasarse pola presentación xa que o ano pasado non poido facelo e sumarse ao evento. 

 A carreira puntúa para a Copa Critérium e vaise dar nun circuíto urbano de 1.100 metros. Na organización deportiva colabora o Team Ourense. Correrá case todo o que pedalea: Promesas, Principiantes, Alevíns, Infantís, Cadetes, a categoría Inclusivo, Féminas, Xúniors, Másters, Élite e Sub-23. De rapaces de sete anos a corredores de élite. Ninguén queda fóra porque esa é a razón de ser desta festa deportiva. 

 Orpagu leva anos co ciclismo de base. Non é cousa deste ano. E co feminino, máis aínda. Un bo exemplo é cartel: son tres mulleres as que o protagonizan e non foi por casualidade. 

 Hai outra cousa que convén subliñar. A carreira está metida dentro do programa da Festa do Peixe Espada, que tamén organiza Orpagu. Nin unha cousa nin a outra son casuais. A entidade colle a festa grande da vila e vaina engordando ano tras ano, sumándolle actividades ata convertela nunha das citas fortes do verán guardés. O ciclismo é a última en chegar, polo de agora. 

 E convén lembrar unha cousa. Orpagu é a organización de palangre de superficie máis grande de Europa, pero segue na Guarda. A sede, aquí. O arraigo, aquí. Desde aquí saca adiante iniciativas coma esta: unha carreira ciclista coorganizada por xente do mar, rodando polas rúas da vila.