DEPORTES

ATLETISMO

ADELA VASCONCELLOS RODRÍGUEZ E AINOA CONEJO BASCOY LOGRARON DÚAS MEDALLAS DE BRONCE 

• No XXXIV Campionato Xunta de Galicia Sub12 e XVII Campionato Xunta de Galicia Sub10 ao aire libre, celebrado esta fin de semana na Coruña

Ainoa Conejo Bascoy e Adela Vasconcellos Rodríguez, atletas de A Guarda, coas súas respectivas medallas de bronce

Foto: SAdoT

Redacción Deportes/A Guarda

 A Sociedade Atlética do Trega, de Tomiño, asinou unha salientable actuación no XXXIV Campionato Xunta de Galicia Sub12 e XVII Campionato Xunta de Galicia Sub10 ao aire libre, celebrado esta fin de semana na Coruña, onde os seus dous atletas participantes regresaron con dúas medallas de bronce na proba de 1.000 metros lisos. 

 Na categoría Sub12, a atleta guardesa Adela Vasconcellos Rodríguez subiuse ao terceiro chanzo do podio tras completar os 1.000 metros lisos nun tempo de 3.24.17, sumando unha nova medalla autonómica para o club. 

 Pola súa banda, na categoría Sub10, a tamén guardesa Ainoa Conejo Bascoy conseguiu igualmente a medalla de bronce nos 1.000 metros lisos, cruzando a meta cun rexistro de 3.43.91. A nova atleta, que esta tempada compite na categoría, logrou ademais a súa mellor marca persoal. 

 Dous atletas e dúas medallas de bronce foi o balance da participación da Sociedade Atlética do Trega nesta cita autonómica, un resultado que permitiu ao club volver ter presenza no podio galego das categorías de base. 

 Desde a Sociedade Atlética do Trega felicitan a Adela Vasconcellos Rodríguez e Ainoa Conejo Bascoy polos resultados obtidos e por representar o club neste campionato autonómico.