A GUARDA

O CONCELLO DA GUARDA ABRE O PRAZO PARA PRESENTAR AS DECLARACIÓNS RESPONSABLES DAS FOGUEIRAS DE SAN XOÁN E SAN PEDRO  

• As persoas interesadas poden facer os trámites a través da sede electrónica ou de xeito presencial na Casa Consistorial 

• O prazo de presentación finalizará o 22 de xuño para as celebracións de San Xoán e o 26 de xuño para as de San Pedro, en ambos casos ás 14:00 horas  

Fonte: CAG

Infogauda/A Guarda

 O Concello da Guarda abre o prazo para a presentación das declaracións responsables necesarias para a realización das tradicionais fogueiras de San Xoán e San Pedro deste ano 2026.  

 Para poder levar a cabo estas celebracións, as persoas interesadas, tanto particulares como asociacións, deberán presentar obrigatoriamente a correspondente declaración responsable. O procedemento poderá realizarse por dúas vías: de forma telemática, a través da sede electrónica municipal, mediante a presentación dunha instancia xeral cos datos da localización da fogueira e da persoa responsable; ou de forma presencial no Rexistro Xeral, situado no primeiro andar da Casa Consistorial, en horario de atención ao público. Para a tramitación presencial, a veciñanza ten á súa disposición un modelo específico para cubrir.  

 A presentación da declaración responsable implica o compromiso de cumprir as seguintes medidas de seguridade e protección ambiental:  

• O lugar elixido non poderá supoñer perigo para as persoas nin para os bens públicos ou privados. 

• O combustible limitarase exclusivamente a madeira ou restos vexetais sen ningún tipo de tratamento químico. 

• Deberase respectar unha distancia mínima de 10 metros respecto de edificacións, vehículos, tendidos eléctricos e outros materiais combustibles. 

• As dimensións máximas permitidas para a fogueira serán de 3 metros de ancho, 4 metros de longo e 4 metros de alto. 

• Deberá manterse libre de obxectos un radio mínimo de 5 metros arredor do lume. 

• A organización deberá dispoñer de medios axeitados para sufocar o lume e extremar as precaucións en caso de vento. 

• Non se poderá abandonar o lugar ata que a fogueira estea completamente extinguida. 

• A zona deberá quedar perfectamente limpa e recollida nun prazo máximo de 24 horas tras a celebración. 

• A responsabilidade por calquera dano ocasionado a persoas ou bens será exclusiva da persoa asinante da declaración responsable. 

• En caso de producirse calquera tipo de emerxencia, deberase chamar inmediatamente ao teléfono 112.  

 As datas límite para presentar as declaracións responsables, tanto no Rexistro Xeral como a través da sede electrónica, son as seguintes:  

• Fogueiras de San Xoán: ata o luns 22 de xuño ás 14:00 horas. 

• Fogueiras de San Pedro: ata o venres 26 de xuño ás 14:00 horas.  

 Dende o Concello da Guarda faise un chamamento á responsabilidade e á colaboración da cidadanía para desfrutar destas celebracións tradicionais con seguridade, respecto polo medio ambiente e cumprimento da normativa vixente.