TUI

As principais autoridades de España e Portugal conforman o Comité de honra do 800 aniversario da consagración da catedral de Tui 

• Quince representantes doutras tantas institucións forman parte deste Comité de Honra 

Vista do pórtico da catedral de Tui

Foto: C.T.

Infogauda / Tui

 O vindeiro domingo, 30 de novembro, terá lugar a conmemoración do 800 aniversario da consagración da catedral de Tui que tivo lugar no ano 1225 polo bispo Esteban Egea. O Concello de Tui e a Diocese de Tui-Vigo celebrará este acontecemento excepcional cun amplo programa de actividades ao longo do ano 2026.  

 Dende o Concello de Tui congratúlanse, como xa foi anunciado no seu momento, que tanto as SS. MM. os Reis de España, don Felipe e dona Leticia, como o presidente da República de Portugal aceptasen a presidencia do Comité de Honra desta conmemoración integrado por 15 autoridades, tanto civís como eclesiásticas, de España e Portugal  

 Neste comité tamén figuran ademais dos xefes de Estado de España e Portugal, o ministro de Cultura de España, o presidente da Xunta de Galicia, o presidente do Parlamento de Galicia, o arcebispo de Santiago e de Braga, o delegado do Goberno en Galicia, o presidente da Comissão de Coordenação e Desenvolvimento do Norte de Portugal, o presidente da Deputación de Pontevedra, o presidente da Cámara de Valença, o bispo de Viana do Castelo así como o alcalde de Tui, o bispo de Tui-Vigo e o deán da catedral tudense.  

 Este Comité de Honra posúe un carácter protocolario pero expresa a transcendencia desta conmemoración que ten un fondo significado relixioso e espiritual, pero tamén patrimonial e turístico xunto a unha dimensión territorial transfronteiriza, pois durante moitos séculos o territorio da diocese tudense comprendía as terras entre o río Verdugo e a ría de Vigo ata o río Limia na actualidade en Portugal.  

 O alcalde de Tui, Enrique Cabaleiro González, sinala que “esta efeméride é unha oportunidade excepcional para unirse todos os e as tudenses e a veciñanza da diocese tudense arredor da icona más recoñecida de Tui e do sur de Pontevedra na proxección da nosa terra dende o punto de vista cultural, económico, social e relixioso promovendo un espazo e un tempo de encontro e de diálogo entre todos os que se sumen a esta conmemoración”. Engade que “a catedral de Tui é un lugar emblemático pola súa historia, pola súa arquitectura e arte, pola súa dimensión espiritual, pola súa capacidade de hospitalidade para veciñanza e peregrinos..., e queremos que neste 800 aniversario da súa consagración se consolide como o elemento de cohesión dos tudenses, e das xentes do territorio diocesano, afirmando o orgullo de pertenza, a nosa propia identidade”.