Nove operadores turísticos de España e Portugal coñecen a potencialidade turística da fronteira de Galicia e Portugal no marco do proxecto Visit río Minho Plus
• Este domingo comezou unha viaxe de familiarización de catro días de duración que os levará por distintas vilas e recursos turísticas desta zona transfronteiriza
Infogauda / O Baixo Miño
Un total de nove operadores turísticos e axentes de viaxes de España e Portugal están a participar desde este domingo nunha viaxe de familiarización no marco do proxecto europeo transfronteirizo Visit Minho Plus, no que Turismo de Galicia participa como socia.
O responsable de Turismo na Delegación Territorial da Xunta en Pontevedra, Felipe Ferrero, encargouse de recibir o grupo ás beiras do río Miño, en plena fronteira natural entre España e Portugal. A partir de aí deu comezo un programa de catro días de duración que inclúe coñecer a catedral e o parador de Tui, realizar a ruta a pé dos Muíños de Folón e o Picón, visitar o monte Santa Trega e tamén un paseo en barco polo río Miño. O grupo tamén visitará a fortaleza de Salvaterra e coñecerá a vila de Valença do Minho, ademais de coñecer a cultura vitivinícola desta zona coa visita a unha adega.
A acción de promoción vén a completar o conxunto de actuacións incluídas neste proxecto, entre elas, a celebración de dous talleres en Tui e Salvaterra de Miño para poñer en valor os produtos Río Miño Navegable e Fortalezas, respectivamente. O prodecto Visit Minho Plus pretende reforzar as relacións comerciais entre as comunidades transfronteirizas e promover a divulgación e comercialización de produtos autóctonos.
A iniciativa Visit Minho Plus está liderada pola AECT Rio Minho e conta coa colaboración de Turismo de Galicia. Para o seu desenvolvemento, está cofinanciado nun 75% polo Fondo Europeo de Desenvolvemento Rexional FEDER a través do Programa de Cooperación Transfronteiriza Interreg España-Portugal (POCTEP) 2021-2027.
Entre outros, busca articular o espazo común, promover as relacións de cooperación transfronteiriza, protexer e promover o patrimonio cultural e natural transfronteirizo; e aumentar a cohesión institucional.
Destino turístico diferenciado
Concretamente, o proxecto prevé a protección do medio natural e a herdanza patrimonial, a súa posta en valor e o seu aproveitamento como atractivos sobre os que sustentar a creación e consolidación dun destino turístico diferenciado, intelixente e sostible. Desta maneira, contribúese ademais á fixación de poboación ao territorio e mellora a resposta ao reto demográfico, en especial ao retroceso poboacional e ao envellecemento.
Portugal constitúe o máis importante mercado emisor para Galicia. De xaneiro a setembro deste ano, visitaron a nosa comunidade 232.031 turistas que procedían do país luso. No referente ao Camiño de Santiago, é o 4º país estranxeiro do que proceden máis peregrinos, con máis de 22.000 persoas que recolleron a Compostela no que vai de 2025. O Camiño Portugués e o Portugués da Costa mantéñense como o segundo e o terceiro máis percorridos.
Ademais de Turismo de Galicia, o proxecto conta coa colaboración da Deputación de Pontevedra, Turismo do Porto e Norte de Portugal CIM Alto Minho, os concellos de Tui e Salvaterra de Miño, a Universidade de Vigo e o Instituto Politécnico de Viana do Castelo e as entidades dedicadas a calidade alimentaria e ao desenvolvemento rural, Axencia Galega de Calidade Alimentaria (AGACAL) e Adriminho.
.jpeg)
Ningún comentario:
Publicar un comentario