TUI

A Eurocidade recibe as persoas participantes na peregrinación polo Camiño Portugués da Costa dende Caminha 

• Con esta actividade reivindícase a importancia desta vía xacobea 

A primeira hora desta tarde foron recibidos na praza de san Fernando polo alcalde de Tui, Enrique Cabaleiro, a concelleira de Turismo, Ana Núñez, e o vereador de Desporto de Valença, Arlindo Sousa

Foto: C.T.

Infogauda / Tui 

 As persoas que están a realizar o Camiño Portugués dende Caminha a Santiago, organizado pola Eurocidade Tui-Valença completaron hoxe a segunda etapa deste percorrido pola vía xacobea.  

 Tras realizar onte os 19 quilómetros da etapa correspondente a Caminha – Vila Nova de Cerveira, esta mañá iniciaron o Camiño neste último municipio para achegarse ata Valença e Tui. A primeira hora desta tarde foron recibidos na praza de san Fernando polo alcalde de Tui, Enrique Cabaleiro, a concelleira de Turismo, Ana Núñez, e o vereador de Desporto de Valença, Arlindo Sousa.  

 Esta actividade forma parte do Calendario Deportivo da Eurocidade Tui- Valença e realízase no marco das Xornadas Europeas do Camiño de Santiago.   

 Esta actividade reivindica a importancia do trazado histórico do Camiño Portugués da Costa que dende Caminha chega a Tui, tras percorrer Vila Nova de Cerveira e Valença.   

 Mañá realizarán a terceira etapa entre Tui e O Porriño. Continuarán logo o 24 de maio entre Redondela e Pontevedra, o 25 de maio de Pontevedra a Caldas de Reis. En xuño realizarán as dúas etapas finais entre Caldas de Reis e Padrón, o 7 de xuño; e entre Padrón e Santiago, o 8 de xuño.