BAIONA

A Xunta de Galicia levará a Baiona, no verán, a mostra itinerante da Cidade da Cultura sobre o Camiño Portugués

•  O conselleiro de Cultura, Lingua e Xuventude anunciouno durante unha visita á Biblioteca municipal deste concello pontevedrés  

•  López Campos destaca que as terras do Baixo Miño teñen un “especial protagonismo” nesta exposición con imaxes desta ruta de 35 fotógrafos de ambos dous lados da Raia

O conselleiro de Cultura, Lingua e Xuventude, José López Campos, na visita que hoxe realizou á Biblioteca municipal de Baiona

Foto: X.G.

Infogauda / Baiona

 A Xunta de Galicia levará no verán, a Baiona, a exposición O Camiño Portugués. Lembranzas de mar e terra da Cidade da Cultura, que recompila imaxes desta Ruta Xacobea, a través da ollada de 35 fotógrafos de ambos dous lados da Raia. Así o anunciou hoxe o conselleiro de Cultura, Lingua e Xuventude, José López Campos, na visita que realizou á Biblioteca municipal deste concello pontevedrés, onde salientou o “grande éxito” rexistrado pola mostra “con máis de 32.000 visitantes” durante a súa itinerancia ao longo destes dos últimos anos desde o Museo Centro Gaiás, en Santiago de Compostela, ao Museo do Mar de Galicia, en Vigo ata á Sala de Exposicións do Edificio Francisco Sánchez, en Tui.  

 O responsable de Cultura do Goberno galego lembrou que esta exposición está enmarcada no Plan de Itinerancias da Cidade da Cultura “para expandir a programación do Museo Centro Gaiás por de toda Galicia” e fixo fincapé no “especial protagonismo” nesta mostra das terras do Baixo Miño.  

71 instantáneas da paisaxe e patrimonio entre Porto e Santiago 

 O Camiño Portugués. Lembranzas de mar e terra amosa, a través de 71 instantáneas dos séculos XIX, XX e XXI, as realidades, paisaxes e patrimonio da ruta xacobea que unen as cidades do Porto e Santiago de Compostela. Con esta finalidade recolle, entre outras, fotografías históricas tiradas no primeiro terzo do século XX por Pacheco, José R. Seco, José Moreira ou o fotógrafo alemán Otto Wunderlich, quen retratou a vida, as xentes e as paisaxes da España dos anos 20.  

 A estas imaxes súmanse olladas antigas e contemporáneas da bisbarra e dos pobos lindeiros da fronteira portuguesa, como as que achegan José Gouveia Gomes Junior, Roberto de la Torre, Carmenchu Alemán, Antón Buciños, José Suárez ou Modesto Martínez, entre outros.