TECNOLOXÍA

Conectividade  

Abel Losada destaca o avance imparable da banda ancha na provincia e anima aos concellos a aproveitar tamén a conexión por Hispasat  

• O subdelegado sinala que a Internet ultrarrápida por satélite está dispoñible con tarifa plana de 35 euros ao mes gracias ao plan ÚNICO-Demanda Rural nos lugares onde non haxa fibra 

• A Subdelegación do Goberno organiza unha xornada informativa para que os alcaldes e alcaldesas de toda a provincia poidan ofertar tamén este servizo aos poucos núcleos rurais que van quedar sen fibra óptica  

• O servizo pode solicitarse por parte do usuario a través do sitio web www.conectate35.es seguindo uns sinxelos pasos  

• Miguel Ángel Argüelles (Hispasat): “Se ves o ceo, tes Internet” 

O subdelegado do Goberno en Pontevedra, Abel Losada, subliñou hoxe o avance imparable no despregue da Internet de alta velocidade na provincia

Fotos: S. de G.

Infogauda / Pontevedra 

 O subdelegado do Goberno en Pontevedra, Abel Losada, subliñou hoxe o avance imparable no despregue da Internet de alta velocidade na provincia e lembrou que o Goberno de España xa garante, a día de hoxe, a conexión á Internet de alta velocidade en todas as zonas rurais grazas ao programa UNICO Demanda Rural, que universaliza o acceso á banda ancha no cento por cento do territorio a través de tecnoloxía satelital alá onde non chega a fibra óptica. Así llo trasladou hoxe a preto de 40 alcaldes/as, concelleiros/as e técnicos municipais da provincia, no marco dunha xornada informativa que tivo lugar no salón de actos da sede da Axencia Tributaria de Pontevedra e que contou coa presenza do xerente de Proxectos Singulares de Hispasat, Miguel Ángel García Argüelles. 

 “Se ves o ceo tes Internet”, explicou Miguel Ángel García Argüelles, ao tempo que incidiu en que a banda ancha por satélite permite dar cobertura ao 100% de España, levando a conexión ás zonas máis remotas en igualdade de condicións. Así, Hispasat ofrece unha conexión satelital con 200 Mbps en sentido de baixada a un prezo con tarifa única de 35 euros, ata o 31 de decembro de 2027 e sen permanencia, baixo o programa denominado “Conéctate 35”. Ademais, recalcou que ata decembro de 2025 o Goberno subvenciona o 100% dos gastos de instalación da antena, cableado e router, cun tope de 600 euros.  

 Abel Losada abriu o encontro salientando a aposta “valente do Goberno de España por levar a conectividade ultrarrápida ao 100% do territorio aproveitando os fondos do Plan de Recuperación”. “Froito deste esforzo sen precedentes”, indicou, “estamos xa en condicións de dicir que o 88,42% da poboación da provincia de Pontevedra xa dispón de fibra óptica e o resto, dado que vai quedando o máis difícil e o que xa non é viable economicamente para as empresas, terá acceso satelital da máxima calidade”.  O investimento público neste despregue na provincia alcanza os 40,6 millóns de euros  e serviu para que as empresas subvencionadas a través das diferentes convocatorias do Plan ÚNICO-Banda Ancha mobilizasen 53,1 millóns. O operativo permitiu levar a fibra a 154.706 fogares e empresas da nosa provincia.  

 O subdelegado cualificou estas cifras como “mareantes” pero matizou que “o verdadeiramente importante é que o 100% do territorio estará conectado gracias a Hispasat”. Para alcanzar este obxectivo o Goberno de España impulsou o  plan ÚNICO-Demanda Rural sobre o que informou de maneira detallada o responsable de Hispasat, a empresa pública adxudicataria deste programa, e a quen o subdelegado lle agradeceu a súa dispoñibilidade para participar na sesión informativa.   

 Calquera usuario que non teña unha cobertura mínima fixa terreste de ata 50 Mbps pode acceder á conexión satélite a través de Hispasat. Ademais,a contratación non implica ningún trámite e basta con poñerse en contacto con algunha das seis empresas que agora mesmo funcionan como operadoras de servizo de Internet a través da “capa tecnolóxica” que proporciona Hispasat. Unha vez asinado o contrato o tempo medio para a instalación e posta en funcionamento é de só 11 días. O prazo para solicitar este servizo, contando coa subvención pública de ata 600 euros para os custos de instalación, estará aberto ata decembro de 2025 a través dun sinxelo trámite que se realiza a través da páxina web www.conectate35.es.   

 Miguel Ángel García Argüelles destacou, ademais, que Hispasat é unha ferramenta moi útil para os concellos, que poden contratar ata cinco conexións para dar servizo a locais municipais que non dispoñan de fibra. Ademais, incidiu, as persoas e empresas usuarias poden tamén contratar servizos adicionais como telefonía fixa ou maiores anchos de banda. Neste senso explicou a experiencia na provincia de Ourense, onde a conexión por satélite de altas prestacións é unha solución cada vez máis frecuente.  

 Os responsables municipais presentes mostraron gran interese neste plan e aproveitaron para resolver diferentes dúbidas ao respecto deste e doutros programas de conectividade do Goberno. Abel Losada pechou o encontro facendo fincapé en que “unha boa conexión a internet é un elemento básico para garantir a supervivencia dos pequenos concellos, porque é unha arma contra o despoboamento”. Por este motivo, agradeceu a participación dun amplo abano de municipios da provincia, nunha xornada na que tamén estiveron o xefe provincial de Inspección de Telecomunicacións, Tomás Rodríguez, e a secretaria xeral da Subdelegación, María Isabel Alonso.