PONTEVEDRA

Esta mañá no salón de actos da Subdelegación do Goberno en Pontevedra   

Abel Losada reivindica “a boa política” baseada na cooperación institucional na súa toma de posesión como subdelegado do Goberno  

• Destaca o “gran labor de transformación de España” do Goberno de Pedro Sánchez nun escenario de dificultades internacionais coa pandemia, o volcán, as crises e as guerras  

• Alude á “marea plástica” e afirma que cooperar non consiste en esconderse tras a rifa para acabar pedíndolle ao Estado o imposible, por terra, mar e aire ou en afirmar que a limpeza das praias é unha competencia rutineira dos concellos  

• O delegado do Goberno, Pedro Blanco, animou ao subdelegado para “asumir o reto de impulsar os proxectos que desenvolve o Goberno de España nesta provincia para consolidar “a súa acción transformadora e modernizadora”  

• Más de 200 persoas acoden á Subdelegación do Goberno nun multitudinario acto no que houbo tamén alusións á secuela da violencia machista  

Maica Larriba, Abel Losada e Pedro Blanco, esta  mañá no salón de actos da Subdelegación do Goberno en Pontevedra no acto institucional ao que a sistiron máis de 200 persoas que abarrotaron a sede da Praza de España

Fotos: S. de G.

Infogauda / Pontevedra 

 O novo subdelegado do Goberno en Pontevedra, Abel Losada, celebrou hoxe o acto institucional despois da súa recente toma de posesión apelando ao valor de “a boa política”, que é a que se practica a partir da cooperación e coordinación entre todas as Administracións. Un acto institucional presidido polo do delegado do Goberno, Pedro Blanco, quen animou ao subdelegado para “asumir os retos de impulsar os proxectos que desenvolve o Goberno de España nesta provincia para consolidar a transformación e a modernización que marca a acción do Goberno de España desde que Pedro Sánchez é presidente”.   

 Máis de 200 persoas abarrotaron a sede da Praza de España, “pretendo - afirmou Abel Losada -, que esta Subdelegación sexa un lugar de diálogo, de encontro e de servizo á comunidade”.  

 Ante os alcaldes de Pontevedra e Vigo, Miguel Anxo Fernández Lores e Abel Caballero e os representantes das Administracións estatal, autonómica e local, así como outras autoridades civís e militares, Losada reivindicou o valor da política, “pois nada hai máis aló da política” e a necesidade de que principios reitores como liberdade e igualdade, non queden reducidos a “palabras que se envolvan en bandos ou bandeiras”, en lugar de “envolvelas coidadosamente cos Orzamentos Xerais do Estado e co Boletín Oficial do Estado”. Fixo un repaso das medidas sociais aprobadas polo Goberno de España “en tempos de contratempos” e concluíu defendendo o valor dos impostos para garantir os servizos públicos esenciais “porque sen impostos é o sálvese quen poida”. 

 Na súa intervención quixo citar a Antonio Machado para afirmar que España “fai camiño andando, un camiño de progreso, de igualdade e de xustiza social” e apostou por continuar atendendo as demandas da cidadanía, “neste camiño machadiano, a pesar do ruído incesante dos insultos, o odio e a crispación”. O subdelegado aludiu á recente investidura do presidente Pedro Sánchez e expresou o seu compromiso persoal e político coa axenda de cambio do Goberno progresista nestes últimos cinco anos.  

 Na súa intervención relacionou as negociacións que deron paso ao actual Goberno co pacto do Majestic de 1996, cando outro Goberno pactou co nacionalismo catalán e, entre outras cousas, acordou “nada menos que a modificación da estrutura territorial do Estado”, suprimindo os antigos Gobernos Civís e creando as Subdelegacións do Goberno a través dunha lei que se aprobou aos poucos meses daquela investidura. “Serei por tanto o sexto subdelegado nesta provincia, seguindo os pasos de Alejandro Millán, Delfín Fernández, Antonio Coello, Ana Ortiz e Maica Larriba”. 

 Abel Losada reclamou a cooperación e coordinación institucional como única maneira de servir á cidadanía nun Estado tan descentralizado como España. Neste aspecto referiuse á crise pola “marea plástica” definíndoa como “un accidente do que ninguén ten a culpa, excepto a navieira”. Con todo, deixou claro que cooperar ante unha emerxencia ambiental como a actual pasa porque cada Administración recoñeza e exerza as súas competencias desde o primeiro momento. “Non consiste en esconderse detrás da rifa, en negarse despois a pedir axuda cando se necesita e, finalmente, acabar pedíndolle o imposible ao Estado por terra, mar e aire. Nin tampouco consiste en alegar que a limpeza das praias é unha competencia rutineira municipal”. “A min todo isto, pola miña tradición docente, sóame a materia repetida. Oxalá que desta aprendamos a lección e para a próxima catástrofe veña o aprobado”. 

 A violencia machista centrou boa parte do seu discurso e destacou que aínda que España é un país pioneiro iso “nin conforta, nin repara; só debe servir para motivarnos para seguir adiante con máis forza e máis determinación para que nin unha soa muller máis vexa coartada ou segada a súa vida polo simple feito de ser muller”. Lembrou ás 56 mulleres asasinadas o ano pasado e ás dúas vítimas da provincia, Beatriz e Ana, así como á dor que produciron crimes machistas tan brutais como os rexistrados en anos anteriores en Valga e Moraña. “Son perdas irreparables, que nos doen e avergóñannos”, insistiu. 

 Abel Losada criticou o afloramiento dos negacionismos de quen se nega a recoñecer o cambio climático, “do despropósito dos machistas, dos homófobos, dos clasistas e dos xenófobos, aos que, ao seu xuízo, sumáronse agora os negacionistas da democracia mesma, que vocifera que estamos nunha ditadura ou ante un Goberno ilexítimo, tratando de erosionar ás institucións que nos representan”. 

 A intervención rematou cun recoñecemento expreso ao alcalde de Vigo “a persoa da que máis aprendín e porque para min sempre foi un orgullo que no despacho veciño ao meu, estivese un doutor en Economía pola Universidade de Cambridge” e tamén ás súas raíces na cidade de Pontevedra, onde comezou a súa carreira como profesor universitario na Facultade de Ciencias Sociais. 

 Pola súa banda, o delegado do Goberno, Pedro Blanco, afirmou que Abel Losada era, pola súa valía profesional humana, “o mellor subdelegado posible, porque non se me ocorre mellor persoa para o cargo”. Ademais anticipoulle que “traballo non vai faltar” porque ás tarefas diarias súmanse sempre os imprevistos e os problemas en cuxa solución a Subdelegación actúa como catalizador. Finalmente, agradeceu o traballo da ex subdelegada, Maica Larriba, e da secretaria xeral, María Isabel Alonso de Linaje, quen exerceu como subdelegada en funcións na recta final do ano. Maica Larriba pechou a súa etapa na Subdelegación destacando o seu intento de “achegar a institución á cidadanía” e rememorando “momentos de gran dor” como o naufraxio do Villa de Pitanxo.