DEPORTES

PIRAGÜISMO

7 MEDALLAS PARA OS TEIXUGOS 

Na 3ª Copa Galega de Slálom

Membros do club Deportivo Miño, con Sandra González, alcaldesa de Tomiño

Informa: Rosa Fernández Carrera 

 Esta fin de semana nas augas do río Coura, no lugar de Covas, en Vila Nova de Cerveira, tivo lugar a 3ª Copa Galega de Slálom e o Campionato Galego de Novas promesas. Dobre competición na que ademais houbo unha demostración amigable de caiac extremo, que será nova modalidade olímpica en Paris.  

 Ao campionato de novas promesas, no que participan os deportistas máis novos de cada club, o Deportivo Miño so acudiu con dous piragüistas. En K1 cadete, Adrián Lluch, logrou o terceiro mellor tempo da categoría, conseguindo, por tanto, a medalla de bronce. O seu compañeiro, Rui Malheiro, na mesma categoría rematou noveno. 

 Na clasificación final por equipos, ao ter tan baixa participación, o Deportivo Miño-Teixugos, rematou en quinto lugar, o último posto.  

 Na 3ª Copa de Slálom, a participación foi máis numerosa, cun total de oito deportistas.  

Podio da clasificación por equipos, na que o Deportivo Miño acadou a segunda praza

 Nas categorías masculinas, en K1 veterano, Emilio Rodríguez foi o gañador da proba. En K1 sénior Brais Castro rematou cuarto, a décimas de segundo do podio. En K1 júnior, Alexis Segadaes, gañou a medalla de prata, na mesma categoría, Adrián Lluch foi sétimo e Rui Malheiro décimo cuarto. En C1 sénior, Luís Fernández gañou a proba, e o seu compañeiro Brais Castro foi terceiro.  

 Nas categorías femininas, Laura Alonso rematou terceira en K1 sénior e Ainhoa Barreiro foi segunda en K1 e primeira en C1.  

 Tres medallas de ouro para Luís, Emilio e Ainhoa; dúas de prata para Ainhoa e Alexis; e dúas de bronce para Brais e Laura, son un gran balance final para o Deportivo Miño na xornada. 

 Na clasificación por equipos acadaron o segundo lugar cun total de 145 puntos, compartindo podio co Montaña Quixós, de Monforte, con 149 e o Club Penedo, de Tui, con 142.