PONTEVEDRA

A Consellería de  Sanidade e os Colexios de Farmacéuticos de Galicia asinaron un novo Protocolo 

TEST DE  ANTÍXENOS DE SALIVA GRATUÍTOS A NENOS  DE ENTRE 5 E 11 ANOS EN FARMACIA  

· O Programa consiste na dispensación nas farmacias adheridas de  autotest  de  antíxenos de saliva aos nenos de 5 a 11 anos  provistos de tarxeta sanitaria Sergas. 

· Cada neno destas idades dispón dun test para recoller de forma gratuíta  na farmacia. 

· A proba realízase no domicilio e, se o resultado é positivo, os pais  deben confinar ao menor e chamar ao teléfono 881 540 045 no que lles  xestionarán a realización dunha proba  PCR de confirmación. 

Autotest  de  antíxenos de saliva

Infogauda / Pontevedra

 Esta semana a Consellería de Sanidade e os  Colexios de Farmacéuticos de Galicia deron un paso máis na loita contra a  infección por coronavirus na comunidade autónoma, na que participan activamente  as farmacias e a distribución farmacéutica, coa firma do “Protocolo para a  dispensación de  autotest de saliva entre a poboación de 5 a 11 anos para control da  Covid-19 en farmacia comunitaria”, que facilitará a dispensación aos nenos galegos  de entre 5 e 11 anos, dun test de  antígenos de saliva gratuíto. 

 Este programa está orientado á detección de casos  positivos na poboación infantil que, en caso  de infectarse, é na súa maioría   asintomática, o que dificulta a súa detección precoz e facilita a transmisión do virus ás  persoas da súa contorna. 

 En palabras da presidenta do Colexio de Farmacéuticos de Pontevedra, Alba Soutelo. “A Xunta  de Galicia facilita que os pais teñan  acceso a un test de  antígenos de saliva de forma  gratuíta para os seus fillos de entre 5 e 11 anos  porque a incidencia é alta nesas idades e,  aínda que algúns nenos xa están a ser vacinados, non teñen a pauta completa de vacinación. O vindeiro martes finalizan as clases e o obxectivo deste programa é  evitar que poidan contaxiar aos seus avós e familiares nas reunións e celebracións  do Nadal”. 

 O 95% das farmacias da provincia de Pontevedra, un total de 415, participan nesta  iniciativa que se suma aos demais programas que, desde o inicio da pandemia, están a realizar as farmacias en colaboración coa Consellería de Sanidade para facer  fronte á expansión do virus, dos que continúan activos tres. “Unha vez máis, a  resposta dos farmacéuticos foi exemplar,  máxime tendo en cuenta a carga  de traballo que xa supoñen os outros tres programas que se seguen desenvolvendo nas  farmacias: o  cribado de  PCR de saliva, a emisión de certificados de vacinación e a  realización de  autotest de  antígenos coa emisión do certificado co resultado da  proba”, sinalou Soutelo. 

 En relación á realización de test de  antígenos na farmacia, a presidenta do Colexio  lembrou que “a administración sanitaria galega permite aos farmacéuticos  procesar test de  autodiagnóstico de antíxenos nas farmacias e expedir un certificado  da Xunta de Galicia, que non serve para viaxar estritamente. Os  autotest non están  incluídos nas probas  diagnósticas de infección activa COVID-19 (PDIA) válidas para  o certificado europeo, e, por iso, non son válidos para expedir o certificado europeo  de probas  diagnósticas. A Consellería de Sanidade expón este certificado como  un certificado de uso interno, que facilita a mobilidade e serve para hostalería, lecer  nocturno, competicións deportivas e outros eventos dentro da Comunidade  Autónoma de Galicia”.  

 Antes de viaxar a persoa debe informarse sobre as esixencias do país de destino. Nalgúns  países non aceptan un resultado negativo de test de  antígenos, senón que esixen  unha  PCR negativa, por tanto, para viaxar a eses países non serve ningún certificado de test  de  antígenos. Dentro dos países que aceptan o certificado de test de  antígenos negativo, algúns están a aceptar o que emiten as farmacias e outros non, polo que  antes de viaxar é conveniente confirmarse de que o van a aceptar. 

 No “Programa para a dispensación de  autotest de saliva entre a poboación de 5 a 11  anos para control da Covid-19 en farmacia comunitaria” participan tres dos  distribuidores farmacéuticos de Galicia, que se encargan de fornecer ás farmacias os test de  antíxenos de saliva elixidos pola Consellería de Sanidade para utilizar neste  programa. 

 Dos 150.000 test adquiridos para cubrir á poboación galega de 5 a 11 anos, o  venres recibíronse en Galicia 60.000 que se distribuíron a razón de 20 test a cada farmacia adherida. O luns distribuiranse outros 20 e así ata finalizar as existencias  desta primeira entrega, estando á espera de que se reciba a seguinte remesa de 90.000  test. 

Procedemento do Programa 

 Os pais ou titores do menor  incluído na poboación diana (nenos de idades  comprendidas entre os 5 e os 11  anos, ambas as incluídas), acoden a calquera  farmacia adherida. 

 O farmacéutico comproba, coa  tarxeta sanitaria do menor, na  plataforma informática de rexistro  habilitada pola Consellería de Sanidade, se  ten unha proba dispoñible.  

 Se é así, facilítalle á persoa  responsable que recolle o test, información relativa á recollida da  mostra, a técnica da proba de  autodiagnóstico, a validez da mesma, a  posibilidade de falsos negativos ou positivos e como debe actuar en caso de resultado  positivo. 

 A continuación, o farmacéutico entrégalle o test de  antíxenos de saliva sen custo.  

 Os pais ou titores do menor realizan a toma dá mostra na súa casa, recollendo  a saliva do menor ao levantarse en xaxún sen tomar auga e sen lavarse os dentes,  e procesan o test no seu domicilio. 

 Se o resultado do test é positivo, os pais ou titores do menor deberán confinalo  e chamar ao teléfono 881 540 045 para que o  Servizo  Galego de  Saúde realícelle unha   PCR para confirmar o diagnóstico.

Fonte: Colexio de Farmacéuticos de Pontevedra