GALICIA

A Xunta de Galicia leva repartidas máis de 420.000 unidades de material de protección ao 98% dos concellos galegos  

O material, conseguido directamente pola Xunta, inclúe guantes, mascarillas, xel, desinfectante, batas protectoras e traxes antisalpicaduras  

A Xunta puxo en marcha esta semana unha plataforma loxística para axilizar o proceso e evitar desprazamentos dos concellos  

Nos próximos días realizaranse novos envíos de material, que chegarán tamén ás sete cidades e, polo tanto, ao 100 por cento dos concellos galegos

Infogauda / Galicia

 A Xunta leva repartidas máis de 420.000 unidades de material de protección ao 98% dos concellos galegos. A distribución comezou a semana pasada e axilizouse a partir deste luns grazas á posta en marcha dunha plataforma loxística, que axiliza o proceso e leva o material directamente aos concellos, evitando así desprazamentos.

 O material repartido ata agora -conseguido todo directamente pola Xunta- inclúe 317.700 guantes, 76.000 mascarillas, 1.120 botes de xel hidroalcohólico; 100 garrafas de desinfectante; 16.566 batas protectoras e 12.074 traxes antisalpicaduras. Está previsto que a finais desta mesma semana a cifra ascenda a 350.000 guantes, 122.000 mascarillas e 25.000 traxes. A todo este material, sumarase un novo envío, tamén nos próximos días, que chegará xa ás sete cidades e cubrirá, polo tanto, ao 100 por cento dos concellos galegos. Na distribución do material, priorizouse inicialmente aos concellos pequenos e medianos xa que dispoñen de menos recursos.

 

 O reparto do material, que conta coa colaboración da Fegamp, realízase en base a uns criterios obxectivos, que teñen en conta a poboación, o número de casos positivos, o número de efectivos de Policía, o número de voluntarios de Protección Civil, e o número de horas do servizo de axuda no fogar.

 Cómpre ter en conta que, ante a actual crise do coronavirus, a prioridade é dotar de material de protección ao persoal sanitario. Con todo, os concellos desenvolven servizos fundamentais, a través de recursos como Protección Civil ou os servizos de axuda no fogar, polo que a Xunta considera tamén importante dotalos do equipamento necesario. A Xunta é actualmente a única administración que está achegando material ás entidades locais.