TOMIÑO

VIOLETA DE SANTIAGO (VOCEIRA DO GRUPO MUNICIPAL SOCIALISTA NO CONCELLO DE TOMIÑO): “VOTAMOS EN CONTRA DO ORZAMENTO PORQUE É IRREAL, CONTINUISTA, NON SOLIDARIO, E QUE FOMENTA A DESIGUALDADE ENTRE OS VECIÑOS E VECIÑAS DEPENDENDO DE ONDE VIVAN”
 

Violeta de Santiago, portavoz do Grupo Municipal Socialista no Concello de Tomiño

Infogauda / Tomiño

 O 26 de Decembro de 2019, a Corporación Municipal do Concello de Tomiño celebrou o derradeiro pleno ordinario do ano 2019. Nel debateuse o proxecto de orzamento municipal para 2020. O Grupo Municipal Socialista, trasladou a súa “queixa ao considerar que nestas datas, coa interventora de vacacións e con moi pouca marxe para estudar a documentación polo miudo, este Goberno [municipal] demostra ter moi pouco talante democrático e ninguna empatía coa Oposición”. 

 O voto das concelleiras socialistas “foi en contra deste orzamento” pois cren que “está alterado ao incluir nel subvencións outorgadas pola Deputación de Pontevedra e Agader que suman preto de 500.000 euros”. Polo tanto consideran que “é irreal, continuista, non solidario, e que fomenta a desigualdade entre os veciños e veciñas dependendo de onde vivan”. 

 Por esa razón, a concelleira Violeta de Santiago, portavoz do Grupo Municipal Socialista no Concello de Tomiño non dubida en afirmar: “Os investimentos reais en servizos tan importantes como o saneamento ou o abastecemento de auga son claramente insuficientes e incoherentes coa defensa e posta en valor das traídas de augas, que os nacionalistas declaran na prensa. 

 O noso convencemento é que non se trata de gañar unha carreira para ver que concello aproba antes esta ferramenta, se non que ten que ser útil e dar respostas ás verdadeiras demandas da veciñanza”. 

 As concelleiras socialistas votaron “a favor da proposta de participación no pacto de alcaldes e alcaldesas polo clima e a enerxía, e tamén, como non podía ser doutra maneira, na moción presentada polo Centro San Xerome Emiliani instando a Xunta de Galicia a que normalice a situación de dous usuarios”. 

 No eido da Cultura, Violeta De Santiago e Mirta Misa apoiaron “a colaboración coa Fundación Rosalía de Castro” e aproveitaron para “voltar a pedir que se achegue a cultura as parroquias, petición non atendida polo goberno do B.N.G., argumentando que a centralización é mais eficiente”. 

 No apartado de Rogos e preguntas, preguntaron “por qué non se activou o Plan Municipal de Emerxencias nestas últimas grandes borrascas; pola situación actual da gasolineira de Sobrada; polo estado ruinoso do pantalán de Sobrada, dende hai máis de seis meses”. E rogaron “que a Cabalgata de Reis sexa respectuosa co medio ambiente e teña en conta aos nenos e nenas que padecen algunha alerxia”. 

 Por outra banda a Agrupación Socialista de Tomiño quere desexar un feliz, próspero e ventureiro ano 2020 a todas e todos os tomiñeses e transmitir a nosa ilusión e compromiso por facer un Tomiño máis igualitario. Un Tomiño mellor!