FOLGOSO DO CAUREL

II ROMARÍA DE VILAR

UN REENCONTRO COA TRADICIÓN CAURELÁ

 Vista parcial do participantes na II Romaría de Vilar

Fotos: Santiago Baz Lomba 

 

Ricardo Rodríguez Vicente / Folgoso do Caurel 

 Baixo o lema "Imos armar un baile", a Asociación Fonte do Milagro (fundada en febreiro de 1999) ven de organizar - coa colaboura do Concello de Folgoso do Caurel, No Cómbaro e Repichoca Ferrol - a II Romaría de Vilar, unha aldea de Folgoso do Caurel. Un evento no que ademáis da participación de Xan de Vilar e outros persoeiros singulares, grandes músicos e persoas convidadas; houbo tempo e espazo natural para o reencontro no Campazo, coa esencia do que eran antigamente as romarías galegas. Dese xeito, veciños e visitantes sacaron dos baúles súas mellores roupas e complementos de época para compartir unha xornada - a do sábado 15 de xuño - de boa veciñanza, baile e música, gastronomía tradicional e sobor de todo, a ledicia de vivir en harmonía coa paisaxe da Nosa Terra.

                         Dous dos grupos tradicionais que actuaron no palco da música 

 O evento, que comezou ás 11:00 horas e rematou na mañanciña do domingo, estivo amenizado por: Corentaechinco, Son D´Aquí, No Cómbaro, A. C. Xirandela, Airiños do Eume, Os do Xalo, Cantores do Courel, Batifoula, Foliada de Nela e Zanfonas de Ortigueira.

 Antes comezar a Sesión Vermú, con música e baile, acompañados de pulpeira para xantar e ambigú todo o día; houbo un roteiro ata O Castro, guiado por Evaristo Méndez Vila, e o mediodía na Capela de San Roque, os participantes puderon escoitar as cantigas de Marías e Xaime.

 Logo da comida houbo xogos tradicionais (bolos, chave, carreira de sacos,...), e a tardiña un gran concurso de bailes agarrados.

  Foi un magnífico xeito de compartir respectuosamente a Natureza como un legado sacro que nos foi dado e que compre conservar do mellor xeito posible para ás xeracións vindeiras.

 Desde Infogauda, nosos parabens a Asociación Fonte do Milagro, cuxo domicilio social está na aldea de Froxán (Lugo), pola súa magnífica traxectoria de recuperación e mantemento da cultura, coidado e sinalización do entorno, etnografía, tradicións,... E tamén, como non, parabens polo éxito da II Romaría de Vilar, da que noso compañeiro Santiago Baz Lomba nos agasalla coa súa encantadora reportaxe fotográfica.

GALERÍA DE IMAXES, DA AUTORÍA DE SANTIAGO BAZ LOMBA