Os problemas no
acceso ao Hospital Álvaro Cunqueiro, que son ben coñecidos, afectan a
diferentes colectivos:
·
As traballadoras e traballadores,
que teñen serios problemas para acceder aos seus postos de traballo en tempo e
forma, con serios problemas para acceder ao aparcadoiro reservado para o
persoal, con colas interminábeis para pasar a barreira.
· Ao persoal das ambulancias, que se
atopan con verdadeiros tapóns para acceder ao Servizo de Urxencias ou a outros
Servizos con persoas que precisan traslado en ambulancia, xerando situacións de
tensión para eles e para o resto de usuarias e usuarios dos viais de acceso no
caso de traslado de pacientes urxentes.
· Ao persoal do transporte público,
urbano e interurbano, que a determinadas horas ten difícil manobrar no entorno
do Hospital e cumprir cos horarios programados.
· E ao conxunto de usuarias e
usuarios do Hospital, que teñen dificultado o acceso, tanto en transporte
público como en vehículos privados.
Esta situación
obedece a unha mala planificación desde a concepción mesma do proxecto, que se
centrou en dirixir o tráfico de vehículos privados ao aparcadoiro de pago,
deixando nun lugar secundario o acceso peonil, o transporte público e a
garantía de acceso das e dos profesionais e das ambulancias. So así podemos
entender a situación actual.
Como Xunta de
Persoal temos reclamado, desde antes do inicio da actividade do Hospital, a
subsanación destas deficiencias, e temos conseguido 700 prazas de aparcamento
gratuíto para o persoal e unha redución do 40% das tarifas das usuarias e
usuarios, iso si, con autentica falta de transparencia sobre como se repercuten
estas reducións no que ten que paga o SERGAS á empresas concesionaria,
propietaria do Hospital.
Pero a situación
dista de estar resolta, nin se prevé que a resolva o paso do tempo como
pretenden algúns xestores, nin o persoal ten resolto o seu acceso e
aparcamento, nin o trasporte público presta o servizo que se precisa, nin é
posible o acceso peonil, nin se remataron os atascos a horas punta que limitan
o acceso das ambulancias.
Por todo isto
reclamamos da Xunta de Galicia e do Concello de Vigo, cada un coas súas
competencias, que se poñan de acordo para realizar un estudio de ordenación do
tráfico no entorno do Hospital Álvaro Cunqueiro, tanto nos viais interiores
como nos de acceso ao Hospital pola estrada da Venda, por Clara Campoamor ou
pola VG-20.
Tamén reclamamos da
Xunta de Galicia e do Concello de Vigo que tomen tódalas medidas oportunas para
habilitar os espazos existentes en superficie, dependentes das dúas
administracións, que permitan o aparcamento regulado e ordenado de xeito
gratuíto.
Vigo, 20
de decembro de 2016
Xunta de
Persoal da Área sanitaria de Vigo
(R.)
Ningún comentario:
Publicar un comentario