VITICULTURA

A escaseza de días de frío durante o inverno, pode estar detrás da redución da colleita que se prevé este ano

OS TRATAMENTOS CONSEGUIRON FREAR A EVOLUCIÓN DO MILDIU NESTES MOMENTOS, PERO O RISCO DE REAPARICIÓN SEGUE SENDO ELEVADO

·       As bruscas variacións meteorolóxicas crearon o clima propicio para o desenvolvemento da enfermidade, que a principios de maio xa afectaba a numerosas parcelas

 “Período de máximo risco”. Esa é a situación na que se atopa nestes momentos o viñedo na provincia de Pontevedra, segundo asegurou esta mañá o responsable da Estación Fitopatolóxica de Areeiro, Pedro Mansilla.

Mansilla, que compareceu xunto co presidente da Deputación, Rafael Louzán, na rolda de prensa posterior á Xunta de Goberno, informou que o ataque de mildiu que xa desde principios de maio afectou a numerosas parcelas, está nestes momentos “moi ben controlado”, pero iso non pode levar a baixar a garda dado que “estamos no período de máximo risco para o viñedo porque xa está en floración e xogámonos a colleita de todo o ano”.

De feito, na visita que durante esta mañá están a realizar os técnicos de Areeiro ás parcelas da comarca de O Salnés puideron comprobar que, aínda que o uso correcto de tratamentos conseguiu frear o avance da enfermidade, nas parcelas testemuña –que non se tratan– detéctanse xa novos brotes de infección, polo que é preciso “extremar as precaucións e estar moi atentos” ante a posible reaparición do mildiu, especialmente tendo en conta que as predicións meteorolóxicas falan de choivas abondosas a partir do xoves con baixadas de temperatura nocturnas, o que favorece o desenvolvemento da enfermidade.

Avisos semanais

Neste sentido, Rafael Louzán destacou o papel que a Deputación de Pontevedra, a través de Areeiro, está a realizar para axudar a todos os viticultores a controlar as diferentes pragas e enfermidades que afectan ao viñedo e a outros frutais e lembrou que, ademais dos avisos e recomendacións que xa reciben de forma directa todos os que forman parte do proxecto Viñas Atlánticas, calquera persoa interesada pode obter información detallada das recomendacións para o viñedo todas as semanas a través da páxina de Areeiro.

Louzán lembrou que “este é un momento crucial no sector vitivinícola” e as “bruscas variacións meteorolóxicas” que se están a dar nestes días e durante toda a primaveira poden favorecer a proliferación do mildiu que, tal e como indicou Mansilla, é unha enfermidade para a que desde Areeiro xa se prevía “un ano complicado” debido, precisamente, ás oscilacións térmicas e meteorolóxicas.

Por iso, é recomendable un seguimento exhaustivo das parcelas e estar atento aos avisos que semanalmente emite Areeiro sobre o estado das viñas e as recomendacións para o seu tratamento, que poden permitir atallar o problema.

No que respecta ás demais enfermidades, como o oidio, as acariosis ou a polilla, Mansilla indicou que este ano “están afectando moi pouco” ao viñedo.

Menor colleita

No que respecta á preocupación dos viticultores pola posible redución da produción este ano, Mansilla asegurou que non existe unha “razón patolóxica”, pero si pode estar relacionada coas escasas horas de frío do inverno.

“As horas de frío –asegurou- son fundamentais para poder ter unha boa colleita, para que se diferencien as xemas e haxa froito”. De feito, pódese calcular que o albariño precisaría unhas 700 horas de frío “e en ningunha parte da provincia se chegou a ese punto este inverno”.

Malia todo, haberá que agardar aínda para valorar se realmente existe esa redución da produción e en canto se cifra a mesma, máis tendo en conta que se está a comparar coa colleita de 2013, que fora extraordinariamente positiva.

Neste sentido, tanto Louzán como Mansilla indicaron que, no que respecta á fitopatoloxía, haberá que agardar a finais do mes de xuño para comprobar a afectación total do mildiu, dado que será nese momento cando se poida considerar “superado o período de máximo risco”