PONTEVEDRA

Nos próximos días celebraranse en Redondela, Salceda de Caselas, Gondomar, As Neves e Forcarei

MARÍN E CANGAS ACOLLEN ESTA TARDE CADANSÚA CHARLA INFORMATIVA SOBRE PREFERENTES

·       Os afectados de Ponteareas, Nigrán, Baiona, Valga e O Porriño recibiron o luns e o martes a información ofrecida por letrados especialistas

·       Estes encontros completan o labor das oficinas de asesoramento legal, que desde a súa posta en funcionamento levan atendido a máis de 1000 persoas

Os afectados polas preferentes e subordinadas de Marín e Cangas terán esta tarde ocasión de aclarar as súas dúbidas e consultas con asesores especializados nestes produtos.

Os dous concellos acollerán cadansúa charla informativa organizada pola Deputación de Pontevedra e a Unión de Consumidores, ao abeiro do convenio de colaboración asinado entre ambas as dúas entidades co obxectivo de darlle o maior apoio e asesoramento posible a todos os afectados.

Estas charlas complementan a atención personalidade e individual que están a prestar as 9 oficinas de asesoramento legal que a Deputación e a Unión de Consumidores manteñen abertas desde o 18 de xuño en outros tantos concellos da provincia, e que xa levan atendido a máis de 1.000 persoas.

Calendario de charlas

No caso das xornadas informativas, en Marín terá lugar ás 18,00 horas na Biblioteca Municipal, mentres que en Cangas será dúas horas despois, ás 20,00 horas, no Salón de Plenos do concello.

A elas seguiranlle mañá as de Redondela, que terá lugar no Auditorio do Multiusos A Xunqueira ás 18,00 h. e a de Salceda de Caselas, á mesma hora no Auditorio Municipal.

O venres terá lugar unha nova charla no Centro Neural de Gondomar, ás 20,00 h. e, á mesma hora, en As Neves, no Centro Social de Maiores. Inicialmente, este ciclo pecharase o luns, ás 20,00 h. cunha charla no salón de actos do Concello de Forcarei, aínda que se organizarán outras se así existe demanda noutros concellos.

Estas conferencias informativas súmanse ás celebradas en Ponteareas, Nigrán, Baiona, Valga e O Porriño, onde os afectados tiveron xa ocasión de consultar o luns e o martes as súas dúbidas.

Asesoramento legal por áreas

Para un asesoramento máis pormenorizado están en funcionamento desde o 18 de xuño 9 oficinas noutros tantos concellos da provincia que, despois de 10 días de funcionamento, están a traballar cun ritmo de afluencia máis estable.

Nesta liña, as oficinas de Tui e Ponteareas, xunto coas instaladas nas sedes da Deputación provincial en Pontevedra e Vigo manteñen un ritmo de actividade e de recepción de afectados interesados en recibir asesoramento legal moi similar ao dos primeiros días, mentres que no resto das oficinas a afluencia vaise reducindo.

Esta redución obedece a que boa parte dos afectados que reclaman atención xa fixaron cita para ser atendidos de aquí ata que se pechen os puntos de información (inicialmente o 18 de agosto).

Por áreas, a oficina de Lalín é a que mantén unha menor afluencia de afectados, de forma que a ata hoxe se atenderon unhas 75 persoas.

En A Estrada, a media de persoas atendidas por día é de 11-12, levando nestes momentos unhas de 120 consultas.

En Cambados, o número de atendidos nos 10 primeiros días foi de 90 persoas, cifra moi similar á de Redondela. En Tui supéranse as 105 consultas, mentres que en Ponteareas os atendidos ata onte ascendían a 122 e en Cangas situáronse nos 110.

Pontevedra e Vigo, tanto por ser as dúas principais cidades e referencia para afectados de moitos concellos do seu contorno como por ter un horario de atención máis amplo (de mañá e tarde), son as oficinas con maior afluencia de afectados.

Na capital do Lérez atendéronse preto de 170 persoas entre o 18 de xuño e o 2 de xullo; mentres que en Vigo foron máis de 155.