O ROSAL

O Rosal rexeita o macroproxecto de hidroeléctricas no Chan do Corno, en Portecelo  

• O Concello alerta do risco para os acuíferos neste espazo de alto valor ambiental e lamenta a falta de información   

• O Concello está xa a traballar nas alegacións a esta iniciativa e porá a disposición da veciñanza un modelo para que poidan deixar as súas propias alegacións  

Vista aérea do emprazamento previsto para unha central hidroeléctrica no Chan do Corno, en Portecelo (O Rosal)

Foto: Bruno Centelles

Infogauda/O Rosal

 O Concello do Rosal manifesta o seu claro rexeitamento ao macroproxecto de hidroeléctricas con auga de mar na Serra da Groba, que contempla unha central no Chan do Corno, en Portecelo. O Goberno municipal destaca que esta iniciativa é incompatible coa conservación dun enclave de gran valor ambiental e que podería comprometer uns acuíferos fundamentais para o abastecemento de auga á poboación. 

 O Concello amosa a súa preocupación polo impacto que podería ter unha das balsas contempladas no proxecto sobre este espazo, considerado estratéxico polos seus recursos hídricos. Nun contexto de cambio climático, no que a dispoñibilidade de auga constitúe un dos grandes desafíos de futuro, o Concello do Rosal considera imprescindible priorizar a protección deste recurso. 

 A alcaldesa do Rosal, Ánxela Fernández Callís, sinala que "non podemos permitir que un macroproxecto destas características poña en risco un espazo de enorme valor ambiental e uns acuíferos dos que depende a nosa veciñanza. A auga é un recurso estratéxico que debemos protexer por responsabilidade co presente e coas xeracións futuras". A rexedora considera ademais que se trata dunha actuación impulsada cun claro interese empresarial e sen un retorno real para o territorio, xa que non achegará riqueza nin oportunidades para o municipio nin para os seus veciños e veciñas.  

 O Concello critica tamén a falta de información sobre a iniciativa, xa que tanto a administración local como os axentes do territorio souberon da existencia do proxecto a través dos medios de comunicación e da súa publicación no Diario Oficial de Galicia [correspondente ao luns día 20 de xullo de 2026], sen que existise ningún proceso previo de comunicación ou participación. O Goberno municipal lamenta ademais que esta publicación se realizase nos últimos días de xullo, coincidindo co período vacacional e deixando só vinte días hábiles para presentar alegacións a un proxecto de enorme complexidade técnica.  

 Ante esta situación, o Concello xa está a preparar as súas alegacións e, ao mesmo tempo, elaborará un modelo de alegacións que estará dispoñible para toda a veciñanza a partir do vindeiro mércores. As persoas interesadas poderán presentalas a través do Rexistro municipal ata o 17 de agosto, expresando o seu rexeitamento ao proxecto ou incorporando aquelas consideracións ambientais e sociais que consideren oportunas. 

 Ademais, durante o mes de agosto o Concello organizará unha xornada aberta con persoas expertas en materia ambiental, hídrica e enerxética para ofrecer información rigorosa sobre o alcance desta iniciativa e as súas posibles consecuencias para o territorio. 

 O Concello do Rosal anima á veciñanza a participar neste proceso de alegacións para defender de forma colectiva un dos espazos naturais máis valiosos do municipio e uns recursos hídricos fundamentais para o seu futuro.