DEPORTES

BALONMÁN

Gloria Rodríguez deixa de ser a delegada do Atlético Guardés despois de cinco anos 

• A ata o de agora vicepresidenta e delegada do Club deixa ambos os cargos por motivos laborais, como ela mesma anunciou hai uns días 

• Gloria, filla de Juan Rodríguez, estivo presente na vida do Atlético Guardés dunha ou outro xeito durante case toda a súa vida. Agora ocupará o seu cargo como delegada no corpo técnico Elena García, actual responsable de prensa 

Gloria Rodríguez

Foto: SportCoeco

Redacción Deportes/A Guarda

 Continúan os anuncios deportivos no Atlético Guardés. Esta vez, a noticia volve afectar ao seu corpo técnico: a que fose delegada do Club desde 2021, Gloria Rodríguez, debe deixar agora o seu cargo por motivos laborais. 

 Como ela mesma anunciou nas súas redes sociais hai uns días, a ata o de agora vicepresidenta e delegada da entidade baixomiñota cesa de ambas as funcións esta tempada 2026/2027. Xa ausente da Xunta Directiva formada fai un par de semanas, Rodríguez tampouco continuará co seu cargo no corpo técnico por motivos de incompatibilidade cos seus compromisos laborais. 

 Xogadora ata os 15 anos na base do equipo, a guardesa estivo ligada ao Club durante practicamente toda a súa vida da man do seu pai, Juan Rodríguez, o defunto presidente de Honra do Guardés e un dos nomes sen os que non se pode explicar a súa historia recente. Tras anos adquirindo cada vez máis peso na vida diaria da entidade, primeiro como colaboradora e despois como vicepresidenta, Gloria recolleu a testemuña do seu pai asumindo o posto de delegada do corpo técnico, unha figura de unión entre a Directiva e o persoal e, sobre todo, de absoluta confianza para as xogadoras. 

 É por todo iso que o Club agradece enormemente o seu labor e lémbralle a Gloria Rodríguez que o Atlético Guardés sempre será a súa casa, un proxecto ao que sempre estará ligada e no que o seu legado queda máis que demostrado ao longo dos anos. Grazas, Gloria, e moita sorte nos teus proxectos futuros! 

 O seu posto ocuparao agora Elena García, actual responsable de prensa e comunicación, compatibilizándoo con este labor. Pola súa banda, o resto do corpo técnico tamén vive cambios case na súa totalidade: José Ignacio Prades relevará a Ana Seabra como adestrador e estará acompañado por Fabio Lima como segundo ao mando, quen substitúe a Will Ferrari. Continúan como preparador físico e fisioterapeuta, respectivamente, Iván Vázquez e Jorge Alonso, mentres o Club está pendente de confirmar a identidade do seu médico para esta tempada.