DEPORTES

O IX Torneo 3x3 Vila da Guarda concentrará toda a súa programación nunha gran mañá de baloncesto, música e actividades  

Redacción Deportes/A Guarda

 O Club Baixo Miño Basket prepara unha nova edición do Torneo 3x3 Vila da Guarda, que volverá reunir deporte, música e ambiente festivo o próximo 25 de xullo no Centro Cultural de A Guarda. 

 A principal novidade desta novena edición será que o torneo se celebrará integramente pola mañá, nunha programación concentrada aproximadamente entre as 9:00 e as 14:00 horas, apostando por un formato máis dinámico e cómodo tanto para participantes como para o público asistente. 

 O obxectivo da organización é ofrecer unha gran xornada de baloncesto en formato reducido, con todos os encontros disputándose durante a mañá e cunha programación paralela que permita que o evento sexa unha proposta de ocio para toda a familia. 

 O torneo contará cun grupo único de competición, unha fórmula deseñada para que os equipos participantes poidan disputar o maior número posible de partidos e para manter un ritmo continuo de xogo durante toda a mañá. 

 Ademais do baloncesto, o IX Torneo 3x3 Vila da Guarda volverá contar con numerosas actividades para converter a xornada nunha experiencia aberta a todos os públicos. Durante a mañá haberá xogos e propostas para os máis pequenos, sorteos e actividades para participantes e asistentes, ademais dunha barra habilitada durante todo o evento. 

 Un dos momentos destacados da programación será o tradicional concurso de triplas, que volverá poñer emoción e espectáculo ao torneo. 

 Como peche da xornada, a organización preparou unha sesión vermú coa actuación de Dr. Flaming, que será o broche perfecto para unha mañá na que o deporte, a música e o ambiente familiar serán os protagonistas. 

 Desde o Club Baixo Miño Basket convidan a toda a veciñanza de A Guarda e da comarca do Baixo Miño a achegarse o próximo 25 de xullo ao Centro Cultural para gozar dunha nova edición dun torneo que xa forma parte da programación deportiva e social do verán guardés. 

 Unha mañá de baloncesto, diversión e convivencia para todas as idades.