CULTURA

Lalín lembra a figura de Laxeiro no 30 aniversario do seu pasamento cunha nova incorporación ao seu legado artístico 

José Crespo, alcalde de Lalín, nun momento da súa intervención

Fotos: CL

Vista da afluencia de público ao acto en lembranza de Laxeiro

Infogauda/Lalín

 Lalín conmemorou onte martes, 21 de xullo, o 30 aniversario do pasamento de José Otero Abeledo, coñecido artisticamente como Laxeiro, cun programa de actos que puxo en valor a figura dun dos grandes nomes da arte galega do século XX e reforzou o vínculo do artista coa súa terra natal.  

 A xornada comezou pola mañá cunha ofrenda floral ante a estatua de Laxeiro situada na rúa Observatorio. O alcalde de Lalín, José Crespo, e a concelleira de Cultura, Begoña Blanco, participaron nesta homenaxe acompañados pola música do gaiteiro Plácido, nun momento simbólico de lembranza e recoñecemento ao pintor lalinense.

 O acto central desenvolveuse no Museo Municipal Ramón María Aller, onde representantes institucionais, do mundo da cultura e da arte se reuniron para lembrar o legado de Laxeiro. No encontro interviñeron o alcalde José Crespo; o presidente da Real Academia Galega de Belas Artes, Quintana Martelo; o director xeral de Cultura, Anxo Lorenzo; o deputado provincial Jorge Cubela; o comisario e crítico de arte Antón Castro; un neto de Laxeiro en representación da Fundación Laxeiro; e a concelleira de Cultura, Begoña Blanco.  

 Un dos momentos máis destacados da celebración foi a formalización da doazón ao Concello de Lalín dunha obra orixinal do artista por parte da familia Santomé González. Trátase da pintura “Belas Artes pra Galicia!”, realizada en 1985, unha peza que pasa así a enriquecer o patrimonio artístico municipal e a memoria colectiva arredor da figura de Laxeiro.

O pianista Miguel Matamoro recibindo os aplausos do respectable público logo de presentar o seu proxecto “Écfrase”

 A conmemoración pechouse cunha proposta artística na que música e pintura dialogaron a través do concerto do pianista Miguel Matamoro. O intérprete presentou o seu proxecto “Écfrase”, unha creación baseada na improvisación pianística e inspirada nas obras de Laxeiro, establecendo unha ponte entre as linguaxes visual e sonora.  

 Trinta anos despois do seu pasamento, Lalín volveu reivindicar a dimensión universal de Laxeiro e a importancia de preservar e difundir unha obra que segue sendo unha referencia fundamental da identidade cultural galega.