TOMIÑO

En Tomiño este verán  as compras valen dobre  

• Concello e ADETO lanzan a ruta ‘Verán+Verán’, que premiará a clientela que aposte polo comercio local con ata 3.000 euros en vales para as compras realizadas entre o 3 e o 22 de xuño  

O Concello e ADETO poñen en marcha a ruta ‘Verán+Verán

Foto: CT

Infogauda/Tomiño

 Este verán cada compra pode ter premio en Tomiño. O Concello e ADETO poñen en marcha a ruta ‘Verán+Verán’, unha iniciativa que busca dar un novo pulo ao comercio local no período estival e agradecer a fidelidade da clientela que aposta polas compras de proximidade.  

 Con esta nova campaña, as persoas que compren entre o 3 e o 22 de xuño nos establecementos adheridos poderán participar no sorteo de ata 3.000 euros en vales de compra. A mecánica é sinxela: todas as persoas que realicen compras superiores a 20 euros mentres a ruta está en marcha, poderán depositar o seu ticket nas urnas habilitadas nos comercios participantes para entrar no sorteo dos vales, que serán do dobre do valor do tícket depositado ata un máximo de 100€. 

 Desde o Concello anímase á veciñanza a sumarse a esta iniciativa e a seguir apostando polo comercio local. “Cada compra que facemos en Tomiño contribúe a manter vivo o tecido comercial do municipio, xera emprego, dinamiza as rúas e fortalece a economía local. Campañas como esta son unha forma de premiar á clientela e de recoñecer o esforzo diario dos nosos establecementos”, destacan desde o goberno municipal. 

 A campaña inclúe ademais un concurso de decoración entre os establecementos adheridos, co obxectivo de contribuír a crear un ambiente atractivo e dinamizador nas rúas comerciais do municipio durante o inicio da tempada estival. Os negocios participantes optarán a tres premios aos mellores escaparates: 400€ ao que quede na primeira posición e 300 e 200€ ao segundo e terceiro premiado, respectivamente. Deste xeito, a iniciativa non só incentiva as compras, senón que tamén promove a creatividade, a implicación dos negocios e a mellora da imaxe comercial de Tomiño. 

 A campaña reúne unha ampla representación do comercio tomiñés, con negocios de sectores tan diversos como moda, calzado, alimentación, deporte, fotografía, decoración, librarías, estética, parafarmacia ou ferraxaría, demostrando a variedade e calidade da oferta comercial existente no municipio. Os establecementos participantes son:  

- A Cova dos Manxares - Agrícola Tomiño - Alimentación Olga - Arte Peluquería - Calzados González - Celdis Estipel - Chévere - Confecciones Isabel - Ferraxaría A Roda - Fotomiño - J. Carrera Decoración - Joyería Pazo - Librería Ideas - Librería Novidades - Litosport - Mercería Chantilly - Parafarmacia Roma - Ro&Ro - Rodríguez The Brand Store - Roupa Paredes - Xoaniña de Cores 

 Con esta nova acción promocional, Concello e ADETO continúan traballando da man para impulsar o consumo de proximidade e reforzar o papel fundamental que desempeña o comercio local na vida económica e social de Tomiño.