DEPORTES

ATLETISMO 

SERGIO SILVA SOUTO IMPÚXOSE NO TROFEO CORPUS TOLEDO MEETING PROMESAS DO ATLETISMO  

• O atleta tomiñés da Sociedade Atlética do Trega logrou a vitoria nos 600 metros lisos con marca persoal 

Sergio Silva Souto

Foto: SAdoT

Redacción Deportes/A Guarda

 O atleta tomiñés Sergio Silva Souto, pertencente á Sociedade Atlética do Trega, protagonizou unha salientable actuación o pasado sábado, 30 de maio, ao conseguir o primeiro posto na proba de 600 metros lisos do Trofeo Corpus Toledo Meeting Promesas do Atletismo, celebrado nas pistas Fernando Fernández Gaitán, de Toledo. 

 Ata a cita desprazouse acompañado polos seus adestradores da Sociedade Atlética do Trega. Baixo unha calor sufocante que marcou o desenvolvemento da competición, Sergio Silva demostrou o seu excelente estado de forma realizando unha carreira impecable de principio a fin. O atleta do club tomiñés cruzou a liña de meta en primeira posición cun tempo de 1.28.31, rexistro que ademais supón unha nova mellor marca persoal (MMP) na distancia. 

 O evento estivo orientado a reunir a novas promesas do atletismo, ofrecendo unha oportunidade de competición e seguimento para atletas en progresión.