DEPORTES

BALONMÁN FEMININO

O Guardés xogarase o pase á final europea na Sangriña 

• O equipo baixomiñoto xa coñece os horarios dos dous partidos de semifinais da EHF European Cup ante o Costa del Sol Málaga: a ida xogarase en Málaga o domingo 19 de abril ás 12.00 horas, mentres que o encontro decisivo terá lugar na Guarda o sábado 25 ás 20.30 

• En caso de cualificarse, o Guardés xogaría a segunda final europea de toda a súa historia como Club, despois da de 2023 en Turquía, na que quedou ás portas do título 

• A eliminatoria afecta ao calendario ligueiro, movendo para o conxunto galego a Xornada 26 ao mércores 15 e o inicio da eliminatoria polo título ao mércores 29 

As xogadoras do Mecalia Atlético Guardés saúdando aos afeccionados ao remate dun encontro no pavillón municipal A Sangriña

Foto: SportCoeco

Redacción Deportes / A Guarda

 O Mecalia Atlético Guardés xogarao todo aos seus no soño europeo. O equipo baixomiñoto confirmou esta semana os horarios do seu vindeiro chanzo no camiño da EHF European Cup, a eliminatoria de semifinais ante o Costa del Sol Málaga, de xeito que os afeccionados interesados poden xa planificar as súas viaxes á cidade andaluza para o primeiro dos dous encontros; mentres os locais vanse preparando para o partido decisivo, que terá lugar na Sangriña. 

 Así, a ida xogarase o domingo 19 de abril en horario matinal, ás 12.00 horas, no José Luis Pérez Canca, da Ciudad Deportiva de Carranque malagueña. As de Suso Gallardo tirarán a primeira pedra coma anfitrioas, buscando deixalo todo atado para unha eliminatoria que, en importante desvantaxe para ela, terá a derradeira palabra na Sangriña. O inferno guardés será decisivo unha semana despois, o sábado 25 ás 20.30 horas, nun partido que se prevé como toda unha festa para un equipo que toca xa a gloria europea coa punta dos dedos. 

 Pois de lograr a clasificación, o Mecalia xogaría a que sería a súa segunda final europea despois de quedar ás portas de erguer o título o pasado ano 2023, en aquela demoledora visita ao Konyaalti turco. Para o rival andaluz, campión en 2021 e resignado á prata ao ano seguinte, a terceira final da súa historia sería tamén todo un fito; se ben está claro que o movemento determinante terao unha afección guardesa que o dará todo por levar en andas ás súas cara á fazaña. 

 As entradas para este segundo partido de semifinais, e terceiro da competición europea esta tempada na Sangriña, sairán á venda previsiblemente cunha ou dúas semanas de antelación, tal como sucedeu para os cuartos de final.  

Afectación ao calendario ligueiro 

 A competición europea volverá afectar ao calendario previsto para a Liga Guerreras Iberdrola. O sábado 18 de abril, un día antes da primeira cita de semifinais, o Guardés esperaba xogar a súa derradeira xornada da fase regular na casa do Balonmano Morvedre; duelo que se moverá finalmente ao mércores 15 ás 20.00 horas no René Marigil. 

 Pola súa banda, o encontro definitivo desta eliminatoria modificará igualmente o comezo da eliminatoria polo título ligueiro de ambos equipos, previsto para a mesma fin de semana do 25 e 26 de abril. A RFEBM indicou que tanto o Málaga coma o Mecalia disputen cadanseus partidos de ida de cuartos de final desta liguiña o mércores 29 de abril. 

 O torneo continental volve apertar a axenda dos demais torneos e incrementar a carga de partidos nun momento crucial para a tempada. Como indicou a adestradora baixomiñota, Ana Seabra, ao coñecer a identidade do seu vindeiro rival, grande parte da chave para avanzar a ansiada final europea estará no estado físico e mental de dous planteis con moita quilometraxe ás costas.  

AXENDA 

Liga Guerreras Iberdrola | Xornada 26 

Balonmano Morvedre – Mecalia Atlético Guardés  

Mércores, 15 de abril | 20.00 horas | Pavillón René Marigil (Sagunto) 

EHF European Cup | Semifinal – IDA 

Costa del Sol Málaga – Mecalia Atlético Guardés 

Domingo, 19 de abril | 12.00 horas | Pavillón José Luis Pérez Canca (Málaga) 

EHF European Cup | Semifinal – VOLTA

Mecalia Atlético Guardés – Costa del Sol Málaga  

Sábado, 25 de abril | 20.30 horas | Pavillón da Sangriña 

Liga Guerreras Iberdrola | Cuartos de final da eliminatoria 

Mecalia Atlético Guardés – Por determinar  

Mércores, 29 de abril | Horario e ubicación por determinar