Alcaldes e alcaldesas de Galicia e o Alto Minho esixen respostas urxentes para o río Miño
Infogauda / O Baixo Miño
Os e as alcaldesas dos municipios bañados polo río Miño esixen unha xestión conxunta e coordinada do treito internacional e reclaman respostas urxentes dos gobernos de Portugal e de España ante problemas que se están agravando sobre o terreo.
A causa é a ausencia dunha resposta eficaz a problemas estruturais que afectan ao río Miño, nomeadamente o asolagamento do treito internacional, con impactos directos na navegabilidade, na seguridade, na pesca e no turismo; a proliferación de especies exóticas invasoras; e a xestión dos caudais transfronteirizos, con efectos significativos nos ecosistemas, nas actividades económicas tradicionais e na seguridade das poboacións.
Os municipios das dúas marxes advirten de que a fragmentación institucional e a falta de coordinación entre entidades continúan a impedir respostas eficaces sobre o terreo, malia a gravidade e persistencia dos problemas identificados.
Neste contexto, os municipios reiteran a petición de que ambos Estados asuman os problemas ambientais do río Miño como prioridade na XXXVI Cimeira Luso-Española, prevista para o 29 de xaneiro, defendendo que o río sexa incluído na axenda do encontro bilateral.
“O territorio está unido e fala cunha soa voz”, afirman os municipios, defendendo que o río Miño require respostas conxuntas, estruturadas e urxentes.
Os alcaldes están traballando de maneira articulada entre ambas as marxes e subliñan que o treito internacional do río Miño é o máis humanizado e dinámico de toda a fronteira luso-española, asumindo un papel central na identidade cultural do territorio e sendo un recurso ambiental, social e económico fundamental para as comunidades ribeirás. Alertan tamén da percepción de abandono por parte dos Estados centrais, en contraste coa importancia estratéxica do río Miño para o territorio e para as poboacións que del dependen.
A posición foi asumida de maneira unánime no marco da Comisión de Traballo do Pacto do Río Miño, creada por proposta da actual Dirección da Agrupación Europea de Cooperación Territorial (AECT) do Río Miño, liderada por José Manuel Vaz Carpinteira, e aprobada en Asemblea Xeral, que acordou a integración dos municipios de Salvaterra do Miño, Tui e O Rosal, na marxe galega, e de Melgaço, Valença do Minho e Caminha, na marxe portuguesa, reflectindo un mandato político claro dos autarcas e afirmando o AECT como espazo central de articulación e cooperación transfronteiriza na defensa do río Miño.
Ningún comentario:
Publicar un comentario